ނުކުޅެދުންތެރިކަން ހުރި ކުއްޖަކަށް ޖިސްމާނީ އަނިޔާކުރި މައްސަލައެއް އެޑިއުކޭޝަން މިނިސްޓްރީން ފުލުހަށް ހުށަހަޅައިފި އެވެ.
ވީކިހިނެއް؟ - އެޑިއުކޭޝަން މިނިސްޓްރީން މީޑިއާތަކަށް ފޮނުވި މެސެޖެއްގައިވާ ގޮތުން އަނިޔާގެ ޝިކާރައަށްވީ މާލޭގެ ސްކޫލެއްގެ ޕްރައިމަރީ ގްރޭޑެއްގައި ކިޔަވާ ދަރިވަރަކަށެވެ.
ބުނީ ކީކޭ؟ - އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވީ މިފަދަ އަނިޔާ ދިނުމަކީ އެއްވެސް ވަރަކަށް ބަލައިގަނެވޭނެ ކަމެއް ނޫން ކަމަށެވެ.
މިފަދަ މައްސަލައެއް މިނިސްޓްރީގެ ސަމާލުކަމަށް އައުމުން ޒިންމާދާރުކަމާ އެކު އަޅަން ޖެހޭ ފިޔަވަޅުތައް އަޅައި، މިފަދަ ކަންކަން ތަކުރާރުނުވާނެ ގޮތަށް ވެސް ފިޔަވަޅު އަޅާނޭ ކަމަށެވެ.
"ޒިންމާދާރުކަމާ އެކު ދަރިވަރުންގެ ހައްގުތައް ހިމާޔަތްކޮށް އުފާވެރި އަމާން މާހައުލެއްގައި ދަރިވަރުން ތައުލީމު ހާސިލްކުރުމަށް ޓީޗަރުން ހާއްސަ ސަމާލުކަމެއް ދެއްވުމަށް އެދެން،" މިނިސްޓަރު ވިދާޅުވި އެވެ.