ގެދޮރުވެރިޔާ ސްކީމުގެ ދަށުން ދޫކުރާ 4000 ފުލެޓު ލިބޭނެކަމަށް އިއުލާނުކޮށްފައިވާ ފަރާތްތަކުގެ ފޯމުތައް މިހާރު ވެރިފައިކުރަމުންދާ ކަމަށް ކޮންސްޓްރަކްޝަން މިނިސްޓްރީން ބުނެފިއެވެ.
އެ މިނިސްޓްރީން ކުރި އިއުލާނެއްގައި ބުނެފައިވަނީ މިދިޔަ އަހަރުގެ ޑިސެމްބަރު މަހުގެ 26 ވަނަ ދުވަހު މިނިސްޓްރީ އޮފް ހައުސިންގ ލޭންޑް އެންޑް އަރބަން ޑިވެލޮޕްމަންޓް އުވާލުމަށްފަހު ވަޒީރުންގެ މަޖިލީހަށް ރައީސުލްޖުމުހުރިއްޔާ ގެންނެވި ބަދަލާއި ގުޅިގެން އެ މިނިސްޓްރީގެ ހައުސިންގ ޕޯޓްފޯލިއޯ ކޮންސްޓްރަކްޝަން މިނިސްޓްރީގެ ބެލުމުގެ ދަށަށް ގެނައުމާއެކު މިނިސްޓްރީ އޮފް ނޭޗަނަލް ޕްލޭނިންގް ހައުސިންގ އެންޑް އިންފްރާސްޓްރަކްޗަރގެ ފަރާތުން 2022 ވަނަ އަހަރު ކުރިއަށް ގެންގޮސްފައިވާ ގެދޮރުވެރިޔާ ސްކީމުގެ ދަށުން ފްލެޓު ދޫކުރުމުގެ އުސޫލާއި ގުޅިގެން ކުރަން ޖެހޭ އެންމެހާ މަސައްކަތްތައް ކުރަން ފަށާފައިވާކަމަށެވެ.
އަދި 2022 ވަނަ އަހަރު އެ ސްކީމުގެ ދަށުން ފްލެޓަށް އެދި ހުށަހަޅާފައިވާ ފަރާތްތަކުގެ ޝަރުތު ހަމަވޭތޯ ކަނޑައެޅުމުގައާއި ޕޮއިންޓު ދިނުމުގައި އަމަލުކޮށްފައިވަނީ އެކިފަހަރު އެކި އަސާސްތަކުގެ މައްޗަށް ބިނާކޮށްކަމާއި އެއް މިންގަނޑަކުން ފޯމުތައް އިވެލުއޭޓްކޮށްފައިނުވާކަމާއި އެޕްލިކަންޓުންގެ މެދުގައި ހަމަހަމަކަން ގާއިމްކޮށްފައި ނެތްކަން އެންޓި-ކޮރަޕްޝަން ކޮމިޝަންގެ ތަހުގީގަށް ފާހަގަކުރެވިފައިވާތީ އެފަދަ މައްސަލަ ހުރި ފޯމުތައް ބަލައި މުރާޖާކުރުމަށް އެ ކޮމިޝަނުން އިރުޝާދު ދީފައިވާކަމަށްވެސް މިނިސްޓްރީގެ އިއުލާނުގައި ބުނެފައިވެއެވެ.
އެހެންވެ 4000 ފްލެޓު ލިބޭ ފަރާތްތަކުގެ ގޮތުގައި 15 ނޮވެމްބަރު 2023 ގައި އިއުލާނުކޮށްފައިވާ ފަރާތްތަކުގެ ޝަރުތު ފުރިހަމަވާކަން ކަށަވަރުކުރުމަށް ފޯމު ވެރިފައިކުރުމަށް ނިންމާފައިވާކަމަށް އެ އިއުލާނުގައި ބުނެފައިވެއެވެ.
އެ ލިސްޓުގައި މައްސަލަތަކެއް ހުރިކަމަށް ބުނެ އެކި ފަރާތްތަކުން ކުރި ޝަކުވާތަކާ ގުޅިގެން އޭސީސީން އެ މައްސަލަ ތަހުގީގުކުރުމުގެ ތެރެއިން ބެކްއެންޑަށް ވަދެ ބައެއް ފޯމުތަކުގައި ހުރި މައުލޫމާތުތައް ބަދަލުކޮށްފައިވާކަން އޭސީސީއަށް ފާހަގަވެފައިވާކަމަށް އެ ކޮމިޝަނުން ބުނެފައިވެއެވެ. އަދި ތަހުގީގު ނިމެންދެން ފުލެޓު ހަވާލުކުރުން މަޑުޖައްސައިލަން ކޮމިޝަނުން އަންގާފައިވެއެވެ.