ދައުލަތުގެ އިސް ފަރާތްތަކެއްގެ އޮރިޔާން ވީޑިއޯ ބޭނުންކޮށްގެން ބްލެކްމެއިލް ކުރުމާއި އޭގެ ވިޔަފާރިކުރަން އުޅުނު ކަމުގެ ތުހުމަތުގައި ފުލުހުން ހައްޔަރުކުރި އަހުމަދު ފާއިޒް ގައުމީ އިއްތިހާދު ޕާޓީގެ ކައުންސިލްގެ މެމްބަރުކަމުން އިއްޔެ ވަކިކޮށްފި އެވެ.
ރައީސް މުހަންމަދު ވަހީދުގެ ޕާޓީގެ ކައުންސިލް މެމްބަރުކަމުން ފާއިޒް ވަކިކުރީ އިއްޔެ ބޭއްވި ކައުންސިލް ބައްދަލުވުމުގައި ކަމަށް އެ ޕާޓީގެ އިސް އޮފިޝަލަކު ރޭ ވިދާޅުވި އެވެ.
"ފުލުހުން މިހާރު ތަހުގީގުކުރާ މައްސަލައާ ގުޅިގެން ފާއިޒް ވަކިކުރީ،" އޮފިޝަލް ވިދާޅުވި އެވެ.
އޭނާ ވިދާޅުވި ގޮތުގައި ފާއިޒްގެ ޝަރީއަތް ނިމޭ ގޮތަކުން ޕާޓީން ވެސް ވަކިކުރުމާ މެދު ގޮތެއް ނިންމާނެ އެވެ.
ފާއިޒް ހައްޔަރުކުރިއިރު އޭނާ ހުރީ ހައުސިން މިނިސްޓްރީގެ އެޑްވައިޒަރުގެ މަގާމުގަ އެވެ. ޖޫން 26، 2013 ގައި ފާއިޒް ހައްޔަރު ކުރުމަށް ފަހު އޭނާގެ ބަންދުގެ މުއްދަތަށް ވަނީ 15 ދުވަސް އިތުރުކޮށްފަ އެވެ.