އިއްޔެ ކުއްލި ގޮތަކަށް މާލެއިން ކަރަންޓު ކެނޑުނު މައްސަލާގައި ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން މައާފަށް އެދިއްޖެ އެވެ. ސްޓެލްކޯ އިން އިއްޔެ އާންމުކުރި ބަޔާނެއްގައި ބުނީ، އިއްޔެ ގާތްގަނޑަކަށް 1:00 ހާއިރު މާލެއިން ކަރަންޓު ކެނޑެން މެދުވެރިވީ އެމްޑަބްލިޔުއެސްސީ އަށް ކަރަންޓު ދިނުމަށް ވަގުތީގޮތުން ބަހައްޓާފައި ހުރި ޓްރާންސްފޯމަރެއްގެ ހައިވޯލްޓޭޖް ކޭބަލަށް ދިމާވި މައްސަލައަކުން ކަމަށެވެ. އެގޮތުން ކޭބަލް ޝޯޓް ސާކިޓް ވުމުގެ ސަބަބުން ކަރަންޓު ކެނޑުނީ ކަމަށް ސްޓެލްކޯގެ ބަޔާނުގައިވެ އެވެ. "ކަރަންޓު ކެނޑުމުގެ ސަބަބުން މި ކުންފުނީގެ ކަސްޓަމަރުންނަށް ދިމާވި ދަތިތަކަށް މި ކުންފުނިން ނިހާޔަތަށް މަޢާފަށް އެދެމެވެ،" ސްޓެލްކޯގެ ބަޔާނުގައިވެ އެވެ. ސްޓެލްކޯގެ ބަޔާނުގައި ބުނީ އެ ހާދިސާ ހިނގަން މެދުވެރިވި ސަބަބު އެކުންފުނިން އިތުރަށް ތަހުގީގު ކުރަމުން އަންނަ ކަމަށެވެ. އަދި އެކަން ކުންފުނީގެ ކަސްޓަމަރުންނާ ހިއްސާކުރާނެ ކަމަށް ވެސް އެ ކުންފުނިން މައުލޫމާތުދެ އެވެ. ކަރަންޓުގެ ހިދުމަތް މެދުކެނޑުމުން އެ ކުންފުނިން ކުރި މަސައްކަތުން ވަނީ މައްސަލަ ހައްލުކޮށް އިއްޔެ ހަވީރު 4:25 ގެ ނިޔަލަށް މާލޭގެ ހުރިހާ ހިސާބަކަށް ކަރަންޓު ދީފަ އެވެ.