މިހާރު އޮތީ މަދަނީ އިއްތިހާދުގައި ހިމެނޭ ސިޔާސީ ޕާޓީތަކުން ތާއީދުކުރާ ސަރުކާރެއް ކަމުގައިވީ ނަމަވެސް އިބްރާހިމް ނާސިރު އިންޓަނޭޝަނަލް އެއާޕޯޓު (އައިއެންއައިއޭ) ހިންގާ އިންޑިއާގެ ޖީއެމްއާރު ކުންފުނީގެ އަތުން އެ އެއާޕޯޓު އަތުލަން ސަރުކާރު ފަހަތު ފަޔަށް ބަރުވެފައިވާ ކަމަށް ޕީޕީއެމްގެ އިންތިގާލީ ނާއިބު ރައީސް އުމަރު ނަސީރު މިއަދު ވިދާޅުވެއްޖެ އެވެ. "ދިވެހިންގެ އެއާޕޯޓް ދިވެހިންނަށް" މި ޝިއާރުގެ ދަށުން ޖީއެމްއާރު އަތުން އަނބުރާ އެއާޕޯޓު އަތުލުމުގެ އާ މަސައްކަތްތަކެއް ފެށިކަން އިއުލާން ކުރުމަށްޓަކައި ސަރުކާރަށް ތާއީދުކުރާ ޕާޓީތަކުން މިއަދު ބޭއްވި ނިއުސް ކޮންފަރެންސްގައި އުމަރު ވިދާޅުވީ ބޭނުންވަނީ މިހާރުން މިހާރަށް ވެސް އެއާޕޯޓު ދިވެހި ސަރުކާރުގެ ދަށަށް ގެނައުމުގެ ކަންކަން ނިންމުމަށް ކަމަށެވެ. "މާދަން ]އެއާޕޯޓް[ ނަންގަވަން، އަނެއް ދުވަހު ނަންގަވަން، އޭނާ ކައިރިން އަހާލަން، މީނާ ކައިރިން އަހާލަން، ހަމަ އެ ގޮތަށް އަދިވެސް މިދަނީ. އަޅުގަނޑުމެން ބޭނުމެއް ނޫން މި ގޮތަށް މިކަން ވާކަށް. އަޅުގަނޑުމެން ބޭނުންވަނީ މިހާރުން މިހާރަށް މި ނިންމުން ނިންމާފައި އެއްވެސް ޝަކުވާއެއް އޮތް ކަމަށް ކަމަށް ވާނަމަ އެ ޝަކުވާއެއް އޮތް ޕާޓީއެއް، އެ މައްސަލަ ހިފައިގެން ހިނގަންވާ ކޯޓަކަށް ހިންގަވާނީ،" ނަސަންދުރަ ޕެލަސް ހޮޓަލުގައި ބޭއްވި ނިއުސް ކޮންފަރެންސްގައި އުމަރު ވިދާޅުވި އެވެ. މި ނިއުސް ކޮންފަރެންސްގައި ސަރުކާރަށް ތާއީދުކުރާ ސިޔާސީ ޕާޓީތަކުގެ ތެރެއިން ޑީއާރުޕީ ފިޔަވައި ހުރިހާ ޕާޓީއަކާއި މަދަނީ އިއްތިހާދުން ބައިވެރިވި އެވެ. އެއީ އަދާލަތު ޕާޓީ އާއި ޕީޕީއެމް އާއި ޖުމްހޫރީ ޕާޓީ އާއި ގައުމީ ޕާޓީ އާއި ޕީއޭ އާއި ގައުމީ އިއްތިހާދާއި ޕީއޭ އެވެ. އަދާލަތު ޕާޓީގެ ރައީސް ޝައިހު އިމްރާން އަބްދުﷲ ވިދާޅުވީ އެއާޕޯޓު އަނބުރާ ހޯދުމުގެ އާ މަސައްކަތްތައް ފަށަން ޑީއާރުޕީ އަށް ވެސް ދައުވަތު ދެއްވި ކަމަށެވެ. އެހެން ނަމަވެސް ޖީއެމްއާރުގެ އެއްބަސްވުން ބާތިލުކުރުމުގެ ނަތީޖާ ސާފުކޮށްދިނުމަށް ސަރުކާރުގައި އެދިފައިވާ ކަމަށާއި އެކަންކަން ހާމަވުމުގެ ކުރިން ޖީއެމްއާރާ ދެކޮޅު ކަންތައްތަކުގައި ބައިވެރި ނުވާން ނިންމާފައިވާ ކަމަށް ޑީއާރުޕީން ބުނެފައިވާ ކަމަށް އިމްރާން ވިދާޅުވި އެވެ. މިއަދުގެ ނިއުސް ކޮންފަރެންސްގައި މި ހުރިހާ ޕާޓީތަކުން ވެސް ބުނީ މިހާރުން މިހާރަށް ވެސް ޖީއެމްއާރު އަތުން އެއާޕޯޓު އަތުލަންޖެހޭ ކަމަށެވެ. އަދި އެކަން މަދު ދުވަސްތަކެއްގެ ތެރޭގައި ކުރާނެ ކަމުގެ ޔަގީންކަން ޕާޓީތަކުން ވަނީ ދީފަ އެވެ. "މި އެގްރީމަންޓަކީ ސައްހަ އެގްރީމަންޓެއް ނޫންކަން އަޅުގަނޑުމެންނަށް ވަރަށް ރަނގަޅަށް އެނގޭ ދުވާލުގެ މެންދުރުގެ އިރު އެނގޭ ފަދައިން. މިކަމާ މެދު ކުރާނެ ފިކުރެއް ނެތް. އަޅުގަނޑުމެންނަށް އެނގޭ މި ކުރެވޭ ކަންތަކާއި މި ބުނެވޭ އެއްޗެއް. ދިވެހި ސަރުކާރަށް ލާޒިމްވެގެން ވަނީ މިއަދުން މިއަދަށް ވެސް އެ ބޭފުޅުންނަށް ]ޖީއެމްއާރު[ ފުރާވަޑައިގަންނަވާށޭ ދެންނެވުން. މައްސަލަ ޖައްސާނީ ވާހަކަ ދައްކައިގެން ނޫން ކަމަށްވާނަމަ އެ ބޭފުޅުން ކޯޓަށް ވަޑައިގަންނަވާނީ. ވަޑައިގަތުމަށް ފަހު ދެން އަޅުގަނޑުމެން ދޭންޖެހޭ އެއްޗެއް ހުކުމެއް އައިސްފިއްޔާ އެ ވިދާޅުވާ އެއްޗެއް އަޅުގަނޑުމެން އިށީނދެގެން ނެގޯޝިއޭޓް ކުރަންޖެހޭ ކަމެއް ކުރާނީ. ހަމަކަށަވަރުން ވެސް އަޅުގަނޑުމެންނަށް ގަބޫލު ކުރެވޭ ގޮތުގައި އެއީ ސައްހަ އެގްރީމަންޓެއް ނޫން،" ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހީމް ވިދާޅުވި އެވެ. އަދާލަތު ޕާޓީގެ ރައީސް އިމްރާން ވިދާޅުވީ ޖީއެމްއާރު އަތުން އެއާޕޯޓް ނެގުމަކީ ސިޔާސީ ޕާޓީތަކުގެ އިތުރުން އެންމެން އެކުވެގެން މަސައްކަތްކޮށްފި ކަމަށް ވަނީ ނަމަ ދާދި އަވަހަށް ކުރެވިދާނެ ކަމެއް ކަމަށެވެ. އަދި އެއާޕޯޓު ދިވެހި ސަރުކާރުގެ ދަށަށް ގެނައުމަކީ ދިވެހި ރައްޔިތުންގެ ހުރިހާ މަސްލަހަތުތަކާ ގުޅިފައިވާ ކަމެއް ކަމަށް ވެސް އޭނާ ވިދާޅުވި އެވެ. "އަޅުގަނޑުމެން ދެކޭ ގޮތުގައި މިފަދަ ސްޓްރެޓީޖިކް އިންވެސްޓަކީ ނުވަތަ ލޮކޭޝަންތަކަކީ ދުނިޔޭގެ އެއްވެސް މިނިވަން ގައުމަކުން ކޮމްޕްރޮމައިޒް ކުރާެ ކަމެއް ނޫން. އަޅުގަނޑުމެންގެ މައި ދޮރޯށި އަދި އަޅުގަނޑުމެންގެ އިގުތިސާދުގެ މައިބަދަ އެހެން ބަޔަކާއެކު ކޮމްޕްރޮމައިޒެއް ނުކުރެވޭނެ. މިއީ ތާރީހުން ދައްކައިދޭ ހަގީގަތެއް. ދުނިޔޭގެ އެތައް މިތަނުން އަޅުގަނޑުމެންނަށް އިބުރަތް ލިބެން އޮތް އަސްލެއް،" ޖީއެމްއާރު އަތުން އެއާޕޯޓް ހޯދުމަށް ސަރުކާރަށް ތާއީދުކުރާ ޕާޓީތަކުން ފެށި އާ މަސައްކަތުގައި އިސްވެ ހަރަކާތްތެރިވާ އަދާލަތު ޕާޓީގެ ރައީސް ވިދާޅުވި އެވެ. "އަޅުގަނޑުމެން ގަބޫލުކުރާ ގޮތުގައި މި ތިން އަހަރަށް ފަހު އެއާޕޯޓު މިނިވަންކުރުމުގެ ހިތްވަރު އަދި އެ ސާބިތުކަން އަޅުގަނޑުމެންގެ މި ތިއްބެވި ސިޔާސީ ލީޑަރުންނަށް ލިބިގެންވޭ. އިރާދަކުރެއްވިއްޔާ އަޅުގަނޑުމެން މިކަމުގައި ފަހަތަކަށް ނުޖެހޭނަން. އަޅުގަނޑުމެންނާ އެކުގައި ދިވެހި ރައްޔިތުންގެ ތާއީދާއި އެއްބާރުލުން އޮތްކަން އަޅުގަނޑުމެން މިކަމަށް ފެށިއިރު ވެސް ވަރަށް ރަނގަޅަށް ދެނެތިބީމު." އިމްރާން ވިދާޅުވީ ޖީއެމްއާރު އަތުން އެއާޕޯޓް ހޯދުމުގެ އާ މަސައްކަތްތައް ޕާޓީތަކުން ފެށީ ވަރަށް ބޮޑަށް ރާވައިގެން ކަމަށެވެ. އަދި ކަންކަން ކުރިއަށް ގެންދާނެ ގޮތުގެ ތަފުސީލު އެ ވަގުތެއް ޖެހުމުން ހާމަކުރައްވާނެ ކަމަށް ވެސް އޭނާ ވިދާޅުވި އެވެ. "ﷲ އިރާދަކުރެއްވިއްޔާ މަދު ދުވަސްކޮޅެއްގެ ތެރޭގައި އަޅުގަނޑުމެން މީގެ ނަތީޖާ ނެރޭނަން. މި ކަމަށްޓަކައި ވަރަށް ގިނަ މަސައްކަތްތަކެއް ހުރީ ރޭވިފައި. ކޮންމެ ކަމެއް އެ ކަމެއްގެ ވަގުތުގައި އެކަމެއް ކުރަންޖެހޭ ގޮތަކަށް ފުރިހަމައަށް އިރާދަކުރެއްވިއްޔާ ކުރެވިގެންދާނެ،" އިމްރާން ވިދާޅުވި އެވެ. ގައުމީ ޕާޓީގެ ނާއިބު ރައީސް އަދި ވިލުފުށީ ދާއިރާގެ މެމްބަރު ރިޔާޒް ރަޝީދު ވިދާޅުވީ "އަޅުގަނޑުމެންގެ ތެރޭގައި ތެދުވެރި ލީޑަރުން" ގެ އިތުރުން "މަކަރުވެރި ލީޑަރުން" ވެސް އެބަތިބި ކަމަށާއި މިއަދު ވެސް އެކަން ފާހަގަ ކުރެވިއްޖެ ކަމަށެވެ. އަދި ބޭނުންވާ ކަންތައްތައް މިހާތަނަށް ހާސިލް ނުވެ ދިޔައީ ވެސް އެ "މަކަރުވެރި ލީޑަރުން" ގެ ސަބަބުން ކަމަށް ވެސް ރިޔާޒް ވިދާޅުވި އެވެ. އޭނާ ވިދާޅުވީ އަމިއްލަ މަސްލަހަތަށް ވުރެ އަބަދުވެސް އިސްކުރާނީ ގައުމީ މަސްލަހަތު ކަމަށާއި ޖީއެމްއާރު އަތުން އެއާޕޯޓު އަތުލުމުގެ މަސައްކަތް އަވަސް މުސްތަގުބަލެއްގެ ތެރޭގައި ކާމިޔާބު ކުރާނެ ކަމަށެވެ. ރައީސުލްޖުމްހޫރިއްޔާ މުހަންމަދު ވަހީދުގެ ގައުމީ އިއްތިހާދުގެ އާމިނަތު އަލީ ވިދާޅުވީ އެއާޕޯޓް ދިވެހިންނަށް ހޯދައި ދިނުމުގައި އެހެން ޕާޓީތަކާ އެއް ސަފެއްގައި އެ ޕާޓީން ވެސް ހަރަކާތްތެރިވާނެ ކަމަށެވެ. އޭނާ ވިދާޅުވީ ދިވެހިންގެ ފައިދާ އާއި މަސްލަހަތަށްޓަކައި އިއްތިހާދުވެގެން މަސައްކަތްކުރާ ހުރިހާ ބައިވެރިންނާއެކު ގައުމީ އިއްތިހާދު ޕާޓީ ކުރިއަށް ދާނެ ކަމަށެވެ. "ދިވެހި ދަރިންގެ އިގުތިސޯދު ހިމާޔަތްކުރުމަށް، ރައްކާތެރިކުރުމަށް، އިއްތިހާދުވެފައިވާ ހުރިހާ ޕާޓީތަކާއެއްކޮށް އަޅުގަނޑުމެން އަބަދުވެސް އެއްބާރުލައިގެން ކުރިއަށް ގެންދާނެ،" އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އައިމިނަތު އަލީ ވިދާޅުވި އެވެ. މަދަނީ އިއްތިހާދުގެ ރައީސް ޝައިހު މުހަންމަދު ދީދީ ވިދާޅުވީ އައިއެންއައިއޭ ބޭރުގެ ބަޔަކަށް ދިނުމަކީ ދިވެހި ރައްޔިތުންގެ "އިގުތިސާދީ އަޅުވެތިކަމުގެ" ފެށުން ކަމަށެވެ. އަދި އެއީ އެހެން ހުރިހާ އަޅުވެތިކަމަށް މަގު ފަހިކޮށްދޭ ކަމެއް ކަމަށް އޭނާ ވިދާޅުވި އެވެ. މުހަންމަދު ދީދީ ވިދާޅުވީ އައިއެންއައިއޭ އަކީ ރާއްޖޭގެ އެންމެ މުހިންމު ތަން ކަމަށާއި އެތަން ޖީއެމްއާރާ ހަވާލުކޮށްފައި ވަނީ އޮޅުވާލުމާއި މަކަރުވެރި ރޭވުމެއްގެ ތެރެއިން ކަމަށެވެ. "މިކަން އަޅުގަނޑުމެން ތަހައްމަލެއް ނުކުރާނަން މަދަނީ އިއްތިހާދުގެ ފަރާތުން. މިކަމުގައި އަޅުގަނޑުމެން އެއްވެސް ކަހަލަ ކޮމްޕްރޮމައިޒަކަށް ނުދާނަން. އަޅުގަނޑުމެން ފަހަތަކަށް އެންމެ ފިޔަވަޅެއް ވެސް ނާޅާނަން. އަޅުގަނޑުމެން މި ގުޅިފައިވާ ހުރިހާ ސިޔާސީ ޕާޓީތަކާއެކު މަދަނީ އިއްތިހާދުން މަސައްކަތްކުރާނީ ދިވެހިންގެ އެއާޕޯޓު ދިވެހިންނަށް ހޯދައި ދިނުމަށްޓަކައި. އިރާދަކުރެއްވިއްޔާ އެކަމަށް މާ ގިނަ ދުވަހެއް ނެތް،" މުހަންމަދު ދީދީ ވިދާޅުވި އެވެ. ޖީއެމްއާރު އަތުން އެއާޕޯޓު ހޯދުމުގެ އާ މަސައްކަތްތަކެއް ޑީއާރުޕީ ފިޔަވައި ސަރުކާރަށް ތާއީދުކުރާ އެހެން ޕާޓީތަކުން މި ފެށީ ދިވެހި ސަރުކާރާއި ޖީއެމްއާރާ ދެމެދުކޮށްފައިވާ އެއްބަސްވުން ސަރުކާރުގެ ކަމާ ބެހޭ ކޮމެޓީން ދިރާސާކޮށް އޭގެ ގެއްލުން ހާމަކުރިތާ ހަފުތާއެއް ވެސް ނުވަނީހެވެ. ޑީއާރުޕީން މިއަދު ނެރުނު ނޫސްބަޔާނެއްގައި ވަނީ ޖީއެމްއާރުގެ އެއްބަސްވުމުގެ މައްސަލަ އަވަހަށް ހައްލު ކުރުމަށް ސަރުކާރަށް ގޮވާލާ ކަމަށެވެ. އެއީ ސައްހަ އެއްބަސްވުމެއް ނޫން ކަމަށް ސަރުކާރަށް ފެންނަ ނަމަ އެކަން ޝަރުއީ މަރުހަލާތައް މެދުވެރިކޮށް އަވަހަށް ނިންމުމަށް ޑީއާރުޕީގެ ބަޔާނުގައި ގޮވާލާފައިވެ އެވެ. "އަދި މި އެގްރީމަންޓް ކުރުމުގައި ކުރީގެ ސަރުކާރުން ކޮރަޕްޝަނަށް މަގުފަހިވާ ގޮތަށް ކޮށްފައިވާ ކަމަށް ތުހުމަތުކުރެވޭ މައްސަލަތައް ވެސް އަވަހަށް ބަލައި ނިންމުމަށް މި ޕާޓީން ގޮވާލަމެވެ،" ޑީއާރުޕީން ބުންޏެވެ.