ނެޓްފްލިކްސްގައި މި ދުވަސްކޮޅު އެންމެ ހިނގަނީ ލިމިޓެޑް ސީރީސް 'އެޑޮލަސެންސް' އެވެ. އަށްޑިހަ ގައުމެއްގައި ޗާޓުގެ އެންމެ ކުރީގައި އޮތް މި ސީރީސް ނެރުމާ އެކު، ފުރަތަމަ ދެ ހަފްތާގައި 66.3 މިލިއަން ވިއުސް ލިބިފައިވެ އެވެ.
'އެޑޮލަސެންސް' ފަށަނީ 13 އަހަރުގެ ފިރިހެންކުއްޖެއް ކަމަށްވާ ޖޭމީ މިލާ އޭނާއާ އެއް ސުކޫލަކަށް ދާ އަންހެން ދަރިވަރަކަށް ވަޅިން ހަމަލާދީ މަރާލައިގެން ހައްޔަރު ކުރާ ހިސާބުންނެވެ.
މިއީ އޭނާގެ އާއިލާއަށް ބޮޑު ސިހުމެއް ގެންނަ ކަމެކެވެ. ސީރީސްގައި ދެން ދައްކުވައިދެނީ އޭނާ މިކަން ކުރަން މެދުވެރިވާ ސަބަބެވެ.
ހަތަރު އެޕިސޯޑްގެ މި ސީރީސް ބިނާކޮށްފައިވަނީ މި ޒަމާނުގައި ފުރާވަރު ކުދިންގެ ހިޔާލުތަކާއި ފިކުރުތައް އިންޓަނެޓްގެ ސަބަބުން ބައްޓަންވެގެންދާ ގޮތުގެ މައްޗަށެވެ.
އަންހެނުންނާ މެދު ދެކޭ ގޮތާއި އޮންލައިން ބުލީން އަދި ފުރާވަރު ކުދިން ބޮޑުވަމުން އަންނަ އިރު ނަމޫނާ ޝަހުސިއްޔަތުންގެ ގޮތުގައި ބަލައިގަންނަ މީހުންގެ ނުފޫޒުގެ މައްޗަށް ސީރީސްގައި އަލިއަޅުވާލަ އެވެ.
'އެޑޮލަސެންސް'އާ އެކު އެތަކެއް ބެލެނިވެރިންގެ ލޯ ހުޅުވިގެން ދަނީ މި ޖީލުގެ ދަރިން ތަރުބިއްޔަތު ކުރުމުގައި ހުރި ގޮންޖެހުންތަކަށެވެ. އެނގެނީ ދަރިފުޅަކީ ގޭގައި ކޮޓަރީގައި އަބަދު ހުންނަ ކުއްޖެއް ކަމުގައި ވިޔަސް އަދި އޭނާ ރައްކާތެރި ނޫން ކަމެވެ. 
ސީރީސްގައި ދައްކާ ޖޭމީ މިލާ އަކީ މަންްމަ އާއި ބައްޕަ އަދި ދައްތައާ އެކު އުޅެމުން އަންނަ މައުސޫމް ކުއްޖެކެވެ. އޭނާގެ ބެލެނިވެރިންނަށް ވިސްނިފައި އޮންނަނީ ކޮޓަރި އޭނާއަށް ރައްކާތެރިކަމެވެ. އެކަމަކު، ދެން އެނގިގެންދަނީ އިންޓަނެޓް މެދުވެރިކޮށް ބަލާ ކޮންޓެންޓުން އެ ކުދިންގެ އުޅުމަށް ހީވެސް ނުކުރާ ކަހަލަ އަސަރެއް ކުރާ ކަމެވެ. 
ޓޮކްސިކް މެސްކިއުލިނިޓީ ކުދިންގެ ކިބައިގައި އަށަގަނެ އަންހެނުންނާ ދޭތެރޭ ކުދިން ދެކޭ ގޮތް ބަދަލުވެ އެވެ. އަންހެނުންނަކީ ދަށް ބައެއްގެ ގޮތުގައި ދެކި އަންހެނުންނަށް އަނިޔާ ކުރުމަކީ މައްސަލައެއް ނޫން ކަމަށް، ބައެއް ކުދިންނަށް އެ މީހުން ބަލާ ކޮންޓެންޓާއި އެމީހުން ފޮލޯ ކުރާ ސެލެބްރީޓީންގެ ފަރާތުން ކޮންމެވެސް ހިސާބަކުން ވިސްނެން ފަށަ އެވެ.
އިނގިރޭސިވިލާތުގައި ބޮޑުވަޒީރު ކިއާ ސްޓާމާގެ އިސްނެންގެވުމަކާ އެކު ހުރިހާ ސެކަންޑްރީ ސުކޫލެއްގައި މި ސީރީސް ސްޓްރީމް ކުރެވޭ ގޮތަށް ވަނީ ހަމަޖައްސައިފަ އެވެ. މަގުސަދަކީ ޓީޗަރުންނާއި ބެލެނިވެރިން އަދި ކުދިން ބަލަހައްޓާ މީހުން، ކުދިން ދުވަހީ ގޮތެއްގައި ކުރިމަތިލަމުންދާ ގޮންޖެހުންތަކަށް ހޭލުންތެރި ކުރުމެވެ.
ސްޓާމާ ވިދާޅުވިގޮތުގައި އޭނާގެ އަމިއްލަ ފުރާވަރު ދެ ދަރިންނާ އެކު ސީރީސް ބެއްލެވި އިރު ބޮޑު އަސަރެއް ކުރުވި އެވެ. ވީހާވެސް ގިނަ ދަރިވަރުން މި ޝޯ ބެލުން މުހިއްމު ކަމުގައި އޭނާ ވިދާޅުވެފައިވެ އެވެ. މި ޒަމާނުގައި ކުދިން ވާހަކަ ދައްކާ ގޮތާއި ބަލާ ކޮންޓެންޓާއި އެކުވެރިންނާ ވާހަކަ ދައްކާ ގޮތާއި އަދި އޭގެ ސަބަބުން އެ މީހުންނަށް ކުރާ އަސަރުތައް ދެނެގަނެ، އެ މީހުން ކުރިމަތިލާ ގޮންޖެހުންތަކުން އަރައިގަތުމަށް އެހީތެރިވުމަށް މި ޝޯ ލޯ ހުޅުވައިދޭނެކަން ސްޓާމާ ފާހަގަ ކުރެއްވި އެވެ.
ބެލުންތެރިންނަށް މި ސީރީސް ވަރަށް ބޮޑަށް ކަމުގޮސް އެކި މީހުން އަންނަނީ ޝުއޫރުތައް ފާޅުކުރަމުންނެވެ. ސީރީސް ކަމުދިޔަ ސަބަބުތަކަށް ބަލާއިރު، އެއް ޝޮޓުން ވީޑިއޯކޮށްފައިވާ ހަތަރު އެޕިސޯޑު ކަމުން ސީރީސްގެ ތެރެއަށް މީހާ ބޮޑަށް ވައްދާލަ އެވެ.
އޭގެ އިތުރުން ސީރީސްގައި ޖޭމީ މިލާގެ ބައި ކުޅެފައިވާ އޮވެން ކޫޕާ އޭނާގެ އެކްޓިން ދައްކާފައިވާ ގޮތް ފުރިހަމަ އެވެ.