ޢުމްރާއަށް މީހުން ގެންދިޔުމުގައި އުޞޫލާ ޚިލާފުވާ ކުންފުނިތަކާ މެދު ޤަވާޢިދުގައިވާގޮތުގެ މަތިން ފިޔަވަޅު އަޅަމުންގެންދާނެ ކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވަޒީރު ވިދާޅުވެފައިވަނީ މިފަހަރު އުޞޫލުގެ 19 ވަނަ މާއްދާއަށް ޢަމަލުކޮށްފައި ނުވާ ކުންފުނިތަކާ މެދު ފިޔަވަޅު އަޅާނެ ކަމަށާއި، އޭގެތެރޭގައި ހުއްދަ ބާޠިލުކުރުން ހިމެނިދާނެ ކަމަށެވެ. އަދި އުމްރާވެރިންގެ ޙައްޤުތައް ހިމާޔަތްކުރަން ޖެހޭ ކަންކަން އެ ވުޒާރާއިން ކުރައްވާނެކަމަށްވެސް ވަޒީރު ވިދާޅުވެފައިވެއެވެ.މިވަގުތު ޢުމްރާއަށް މީހުން ގެންދިއުމަށް 50 އަށްވުރެ ގިނަ ކުންފުންޏަކަށް އިސްލާމީ ކަންތައްތަކާބެހޭ ވުޒާރާއިން ވަނީ ހުއްދަ ދޫކޮށްފައެވެ. ނަމަވެސް، މީގެކުރިން އުމްރާއަށް މީހުން ގެންދިޔުމުގައި އެކި ފަރާތްތަކުން މަކަރާއި ޙީލަތްހަދާ މައްސަލަތައް ފެންމަތިވެފައިވާކަން ފާހަގަކުރެވެއެވެ. މީގެ ތެރޭގައި އިތުރަށް ފައިސާ ނެގުމުގެ މައްސަލަތަކާއި ޢުމްރާގެ އަޅުކަން އަދާކުރުމަށްގޮސް އެނބުރި ރާއްޖެ އައުމަށް ދަތިތަކާ ކުރިމަތިލާންޖެހުން ހިމެނެއެވެ.މި އައު ފިޔަވަޅުތަކުގެ ސަބަބުން ޢުމްރާއަށް މީހުން ގެންދިޔުމުގެ ޚިދުމަތް އިތުރަށް ހަރުދަނާވެ، އުމްރާވެރިންނަށް ކުރިމަތިވަމުންދާ ދަތިތައް މަދުވެގެންދާނެކަމަށް އުންމީދު ކުރެވެއެވެ.