ކުރިޔަށް އޮތް 2026 ވަނަ އަހަރުގެ ކައުންސިލް އިންތިޚާބަށް އަހަރެއްހާ ދުވަހަށް ވުމާއެކު, ރައްޔިތުން ގުބާ ހެއްދުމަށްފަހު އަނެއްކާވެސް އިންތިޚާބެއް ކާމިޔާބު ކުރުމަށް މުއިއްޒު ރަށްރަށަށް ދަތުރު ކުރައްވަން ފައްޓަވައިވިއެވެ.
އެގޮތުން މުއިއްޒު މިހާރު ގެންދަވަނީ ހުވަދު އަތޮޅުގެ 4 ރަށަކަށް ދަތުރު ކުރައްވަމުންނެވެ. އަދި މިއަހަރު ފެށުމާއެކު, މުއިއްޒު ރަށްތަކަށް ކުރައްވަމުން ގެންދަވާ ދަތުރުތައް ފައްޓަވާފައިވަނީ މިހަފްތާގައެވެ. އެގޮތުން މުއިއްޒުވަނީ މީގެ އެއްދުވަސްކުރިން ވަނީ މާލެ ކައިރީގައި އޮތް ގުޅިއަށް ވަޑައިގެން އެރަށުގެ ކައުންސިލާ އަދި އަންހެނުންގެ ތަރައްޤީއަށް މަސައްކަތްކުރާ (އ.ތ.މ.) ކޮމިޓީއާ ބައްދަލުކުރައްވާފައެވެ.
މި ބައްދަލުވުންތަކުގައިވެސް މުއިއްޒު ވަނީ އެރަށުގެ ތަރައްގީއަށް ރައްޔިތުން އެދުނު ހުރިހާ ކަމެއްވެސް ކޮށްދެއްވާނެކަމަށް ވައުދުވެވަޑައިގެންފައެވެ. އޭގެ ތެރޭގައި އެރަށުގެ ބިމުގެ ދަތިކަން ހައްލުކޮށްދީ, ބަނދަރުގެ ޖާގައިގެ ދަތިކަން ހައްލުކޮށްދީ, ރަށުގެ ޞިއްޙީ މަރުކަޒުގެ މުވައްޒަފުންގެ ދަތިކަން ހައްލުކޮށްދީ, ލެބޯޓަރީގެ ޚިދުމަތްތައް އިތުރަށް ފުޅާކުރުމަށް ވައުދުވެވަޑައިގަތެވެ. އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިމާރާތުގެ ޖާގައިގެ ދަތިކަމާއި ބަޖެޓުގެ ދަތިކަން ހައްލުކުރުމަށްވެސް ވައުދުވެވަޑައިގެންފައެވެ.
މުއިއްޒު އާ އަހަރު ފެށުމާއެކު ރަށްތަކަށް ދަތުރުތައް ކުރައްވާން ފެއްޓެވީ އަންނަ އަހަރު އޮންނަ ކައުންސިލް އިންތިޚާބު ކާމިޔާބު ކުރުމަށް, މިއަދު ރައްޔިތުންނަށް ވީހާ ގިނަ ދޮގު ވައުދުތައް ވެވަޑައިގެންނެވުމަށްކަމަށް ގިނަ ބަޔަކު ގަބޫލުކުރެއްވެ.
ހަމަ އެބީދައިން މުއިއްޒުވަނީ ފާއިތުވީ މަޖިލިސް އިންތިޚާބުގެ ކުރިންވެސް ރަށްރަށަށް ވަޑައިގެން މިއުސޫލުން ވައުދުތައް ވެވަޑައިގެންފައެވެ. އެހެންނަަމަވެސް އެދަތުރުފުޅުތަކުގައިވެސް މުއިއްޒު ރަށްރަށަށް ކޮށްދެއްވާނެކަމަށް ވައުދުވެވަޑައިގެންނެވި އެއްވެސް ވައުދެއް މިއަދާއިހަމައަށް މުއިއްޒު ފުއްދަވާފައި ނުވާކަން ފާހަގަ ކޮށްލެވެއެވެ.
ގަބޫލުކުރެވޭ ގޮތުގައި މުއިއްޒުއަށް ގަބޫލު ކުރެއްވެނީ, ދޮގު ވައުދުވެ, ރައްޔިތުން ގުބޯ ހެއްދުމަށްފަހު މަޖިލިސް އިންތިޚާބު ކާމިޔާބު ކުރިގޮތަށް, ރައްޔިތުންނަށް ނަނާ ހުވަފެން ދައްކައިގެން ކުރިޔަށް އޮތް ކައުންސިލް އިންތިޚާބުވެސް ކާމިޔާބު ކުރެއްވިދާނެކަމަށެވެ.
މުއިއްޒު ފާހަގަ ކުރެވިފައިވަނީ, ރައީސް ޔާމިންގެ ނަންޖެހި ހުސްގޮނޑި ރައްޔިތުންނަށް ދައްކަވައިގެން, މަކަރާއި ހީލަތުން ވެރިކަމަށް ވަޑައިގެންނެވި ބޭފުޅެއްގެ ގޮތުގައެވެ. އަދި ވެރިކަމަށް ވަޑައިގެންނެވުމަށް މުއިއްޒު ވެވަޑައިގެން ގިނަ ވައުދުތަކެއް ފުއްދަވާފައި ނުވާއިރު, މުއިއްޒުގެ ސަރުކާރު ފާހަގަ ވެގެން ގޮސްފައިވަނީ ވެރިކަމުގެ ފުރަތަމަ އަހަރު ތަރައްގީގެ އެއްވެސް މަޝްރޫއެއް ހިންގިފައިނުވާ ހަމައެކަނި ސަރުކާރު ކަމުގައެވެ.