މި ސަރުކާރުން ހުޅުމާލޭގައި އަޅަން ނިންމާފައިވާ ފުޓްސަލް އިންޑޯ ކޮމްޕްލެކްސްގެ މަސައްކަތް މިމަހު ފަށާނެކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. ކުޅިވަރު ވުޒާރާގެ މަސައްކަތްތަކާއި، ކުޅިވަރާ ގުޅުންހުރި ވާހަކަތައް ހިއްސާކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ އަމަލީ މަސައްކަތް ފެށުމުގެ ކުރިން ކުރަންޖެހޭ ހުރިހާ ކަމެއް ނިމިފައިވާ ކަމަށެވެ. އެގޮތުން ހުޅުމާލޭގެ ފޭސް ދޭއްގައި އަޅާ މި ކޮމްޕްލެކްސް އަޅަން ބޭނުންވާ ބަޖެޓާއި އެ މަސައްކަތްކުރާނެ ބަޔަކު ހަމަޖެހިފައިވާ ކަމަށް ވަޒީރު ވިދާޅުވިއެވެ. ސަރުކާރުގެ ދެ މިނިސްޓްރީ އާއި އެޗްޑީސީން، 24 ފެބްރުއަރީ 2025 ގައި، ނެޓްބޯލް އާއި ފުޓްސަލް ކޮމްޕްލެކްސްގެ ބިން ހަވާލުކުރުމުގެ އެއްބަސްވުމުގައި ސޮއިކުރިއިރު، މަސައްކަތުގެ އަމަލީ މަސައްކަތް މި ފަށަނީ ގާތްގަނޑަކަށް އަހަރެއްހާ ދުވަސް ފަހުންނެވެ. މީގެއިތުރުން ފޭސް އެކެއްގައި އަޅަން ނިންމާފައިވާ ނެޓްބޯލް ކޮމްޕްލެކްސްގެ މަސައްކަތުގެ އަމަލީ މަސައްކަތް ފެށުމުގެ މަރުހަލާވެސް ބާރަށް ކުރިއަށްދާނެކަމަށް ވަޒީރު ވިދާޅުވިއެވެ. ރާއްޖޭގައި އިންޑޯ ފުޓްސަލް ޕިޗެއް ނެތުމުގެ ކަންބޮޑުވުމަކީ ގިނަ އަހަރުތަކެއް ވެފައިވާ ބޮޑު މައްސަލައެކެވެ. ރާއްޖޭގައި ގާއިމުކުރާ ފުޓްސަލް ކޮމްޕްލެކްސްގެ ސަބަބުން ގައުމީ ފުޓްސަލް ޓީމުގެ ފެންވަރު މަތިކުރުމާއި ބައިނަލްއަގްވާމީ ފެންވަރުގެ މުބާރާތްތައް ރާއްޖެއަށް ގެނައުމަށް މަގުފަހިވެގެންދާނެއެވެ. އަދި ކުޅުންތެރިން އުފެއްދުމަށް ބާރަކަށްވާނެއެވެ. ރާއްޖެއިން ވަނީ ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގެ ތަށި އުފުލާލާފައެވެ. މި ކާާމިޔާބީއާއެކު ރާއްޖެއަަށް އިންޑޯ ފުޓްސަލް ޕިޗެއްގެ ބޭނުން ވަރަށް ބޮޑުކަމަށް ގައުމީ ޓީމުގެ ކުޅުންތެރިން ވަނީ ފާހަގަކޮށްފައެވެ. އިންޑޯ ފުޓްސަލް ކޮމްޕްލެކްސްގައި ހަތަރު ޓްރެއިނިން ޕިޗު ހިމެނޭނެއެވެ. އަދި މި ކޮމްޕްލެކްސް ވެގެންދާނީ ބައިނަލްއަޤްވާމީ ފެންވަރުގެ މުބާރާތްތައް ބޭއްވޭ ފެންވަރުގެ ތަނަކަށެވެ. މިއީ ސަރުކާރުގެ ހަފްތާ 14 އެޖެންޑާގައި ރައީސް އިއުލާނު ކުރައްވާފައިވާ މަޝްރޫއެކެވެ.