"ހިޔާވަހި ފައިނޭންސް" ސްކީމަކީ މެދުނުކެނޑި ބަޖެޓުގައި ހިމަނައިގެން ކޮންމެ އަހަރަކުވެސް ހުޅުވާލާނެ ފުރުޞަތެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ "ހިޔާވަހި ފައިނޭންސް ސްކީމް" އިފްތިތާޙުކޮށްދެއްވާ ދެއްކެވި ވާހަކަފުޅުގައެވެ.
ހިޔާވަހި ފައިނޭނެސް ސްކީމްގައި މާލެ ސަރަޙަދު، އަރބަން ސެންޓަރުތައް އަދި ވަކިވަކި ރަށްތަކަށް ދޫކުރާ ލޯނު ހިމެނެއެވެ. އެއީ އަތޮޅުތަކުގެ ރަށްތަކަށް 1 މިލިޔަން ރުފިޔާގެ ކެޕްގެ ލޯނު، އަރބަން ސެންޓަރުތަކަށް ޚާއްސަކޮށް 3 މިލިޔަން ރުފިޔާގެ ކެޕްގެ ލޯނު އަދި މާލެ ސަރަޙައްދުން 6 މިލިޔަން ރުފިޔާއާއި ހަމައަށް ލޯނު ދޫކުރާނެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އެމަނިކުފާނު އަބަދުވެސް ވިދާޅުވާގޮތަށް، މިނިވަންކަމާ ގުޅޭ ސިޔާސަތުތައް ފިޔަވާ ދެން އަބަދުވެސް އެންމެ އިސްކަން ދެއްވާނެ ދާއިރާއަކީ ރައްޔިތުން ގެދޮރުވެރިކުރުމާއި ބޯހިޔާވަހިކަމުގެ ދާއިރާކަމަށެވެ. އެގޮތުން އަންނަ އަހަރުގެ ބަޖެޓު އެކުލަވާލުމަށް ހުށައަޅާފައިވަނީވެސް، ބޯހިޔާވަހިކަމުގެ މައްސަލައަށް ޙައްލު ގެންނާނެ ބަޖެޓެއްގެ ގޮތުގައިކަން އެމަނިކުފާނު ފާހަގަކުރެއްވިއެވެ.
އަންނަ އަހަރަށް ހުށައެޅި ބަޖެޓުގައި ހިޔާވަހި ލޯނު ސްކީމަށް 1 ބިލިޔަން ރުފިޔާ އަދި ސަރުކާރުން ހިންގާ އިޖުތިމާޢީ ބޯހިޔާވަހިކަމުގެ މަޝްރޫޢުތަކަށް 1.5 ބިލިޔަން ރުފިޔާ ވަނީ ހިމަނާފައެވެ. 1 ބިލިޔަން ރުފިޔާ ސަރުކާރުން ބޭންކުތަކަށް މި ސްކީމަށް އިންވެސްޓްކުރިނަމަވެސް، ބޭންކުތަކުން ލޯނު ދޫކުރާއިރު ޖުމްލަ 2 ބިލިޔަނާ ހަމައަށް ލޯނު ދޭނެކަމަށް ރައީސް ވިދާޅުވިއެވެ.
ރައީސް ޑރ. މުޢިއްޒު ވިދާޅުވީ، ރާއްޖޭގެ ހުރިހާ ހިސާބުތަކަށް އަމާޒުކޮށް ތަޢާރަފުކުރި "ހިޔާވަހި ފައިނޭންސް" ސްކީމް ވެގެންދާނީ ދާއިމީކޮށް ކޮންމެ އަހަރަކުވެސް ހުޅުވާލާ ފުރުޞަތަކަށްކަމަށެވެ. އަދި އެކަމަށް ބޭނުންވާ ފައިސާ ކޮންމެ އަހަރެއްގެ ބަޖެޓުގައި ހިމަނުއްވާނެކަމަށެވެ. މި ހަފްތާގައި ލޯނަށް ހުޅުވާލުމަށް ހަމަޖެހިފައިވާއިރު، އަންނަ އަހަރުން ފެށިގެން ލޯނު ދޫކުރަން ފަށާނެވެ.
"މިއީ އަމިއްލަ ގެދޮރު ބިނާކުރުމަށް ދޭ އެހީއެއް. މިއީ މިއަދު ފަށާ، އަންނަ އަހަރު ހުއްޓާލާނެ ކަމެއް ނުން. ދާއިމީކޮށް ކޮންމެ އަހަރަކު މި މަސައްކަތް ގެންދާނަން. ކޮންމެ އަހަރަކު 1 ބިލިޔަން ރުފިޔާ ހިމަނާނަން." ރައީސް ވިދާޅުވިއެވެ.
ރައީސް ވިދާޅުވީ މި ސްކީމްގައި އެހީ ދޭނީ ބިން އޮވެ ގެދޮރު ނޭޅިވާ މީހުންނަށާއި، މުޅިން އަލަށް ގެދޮރު އިމާރާތްކުރުމާއި، އަޅަން ފަށާ ނުނިމި ހުރި އިމާރާތްތައް ނިންމުމަށް އެހީ ދިނުމަށްކަމަށެވެ. އަދި މިހާރު އިމާރާތް އަޅާ މަރާމާތަށް ބޭނުންވެފައި ފަރާތްތަކަށްވެސް ލޯނު ދޫކުރާނެކަމަށް އެމަނިކުފާނު ވިދާޅުވިއެވެ.
މާލެ ސަރަޙައްދަށް ހުލުވާލާ ފުރުޞަތުގައި، ގޭގެ ބެހެނިވެރިންނާއެކު އެކުވެގެން 6-10 މިލިއަން ރުފިޔާގެ ލޯނަށް އެދެވޭނެކަމަށެވެ. ހުރިހާ ލޯނެއްވެސް ދޫކުރަނީ %5 އިންޓްރެސްޓް ރޭޓުގައި 25 އަހަރުން އަނބުރާ ދައްކާގޮތަށެވެ.
ރައީސުލްޖުމްހޫރިއްޔާ ވިދާޅުވީ، މި ސަރުކާރުން އަބަދުވެސް އެންމެ ބޮޑު އިސްކަމެއް ދޭނީ ރައްޔިތުނަށް އޮތް އެންމެ ބޮޑެތި މައްސަލަތަކަށް ރިއާރަތްކުރުމަށްކަމަށެވެ. އެގޮތުން ސަރުކާރުގެ ފުރަތަމަ ދުވަހުން ފެށިގެންވެސް ބޯހިޔާވަހިކަމަށް މަސައްކަތް ފަށާފައިވާކަމަށް ރައީސް ވިދާޅުވިއެވެ.
އެގޮތުން ސަރުކާރުގެ މެނިފެސްޓޯއާއި އެއްގޮތަށް، 2028 ވަނަ އަހަރު ނިމޭއިރު، ބޯހިޔާވަހިކަމުގެ މަޝްރޫޢުއަކުން ފުރުޞަތު ނުލިބޭނެ އެއްވެސް ރައްޔިތަކު ނުހުންނާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދެއްވާފައެވެ.