މި ސަރުކާރުގެ ދޯހަޅި ސިޔާސަތުގެ ސަބަބުން މިގެ ކުރިން ރައްޔިތުން ފަގީރު ނުވާ މިހާރަށް ފަގީރުވެއްޖެ ކަމަށް މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.
ސޯޝަލް މީޑިއާ ޕޯސްޓެއްގައި އޭނަ ވިދާޅުވީ މިއަދު ފެނިގެން ދަނީ ގައުމުގެ އިގްތިސޯދު ދަތިވެ، އިންފްލޭޝަން މައްޗަށް ގޮސް، ރާއްޖޭގެ ގިނަ ރައްޔިތުންގެ ދިރިއުޅުން ވަރަށް ދަތިވެފައިވާ މަންޒަރު ކަމަށެވެ.
"ރައްޔިތުން މިއަދު ތިބީ ޒަރޫރީ ޚިދުމަތްތަކަ ށްވެސް ފައިސާ ނެތިފައި ވަރަށް ބިކަ ހާލުގައި. އަދި ރާއްޖޭގެ ދަރަނި އެއް ދުވަހުން އަނެއް ދުވަހަށް އިތުރުވަމުން މިދަނީ،" އައްބާސް ވިދާޅުވި އެވެ. "މީގެ ސަބަބުން ދުވަހަކު ރައްޔިތުން ފަގީރު ނުވާ މިންވަރަށް ފަޤީރުކަން އިތުރުވެ ރައްޔިތުންގެ އަތްމަތި ދަތިވެ ޒަރޫރީ ބޭނުންތަށް ފުއްދުމަށް ނުކުޅެދިފައި ވަނީ."
އޭނަ ވިދާޅުވީ ޒަރޫރީ ހިދުމަތްތަކަށް ފައިސާ ނުލިބި، ގައުމުގެ ދަރަނި އިތުރު ވަމުންދާ މި ދަނޑިވަޅުގައި، ދުރު ރާސްތާ ސާފު ޕްލޭނެއް ނެތި ރައީސް ޑރ. މުހައްމަދު މުއިއްޒު ވަޑައިގަންނަވާ ކޮންމެ ރަށެއްގެ ރައްޔިތުން ކުރިފުޅުމަތީގައި އެތަކެއް ވައުދުތަކެއް ވަމުން ގެންދެވުމަކީ ދައުލަތަށް އިތުރު މާލީ ބުރައަކަށް ވެގެންދާނެ ކަމެއް ކަމަށެވެ.
"ޒަރޫރީ ބޭނުންތަކުގެ އަގު ދަށްނުކޮށް، ރައްޔިތުންގެ އަގާއި އަތާ ދިމާނުވާ ހާލަތުގައި ރައްޔިތުންގެ އޮރިޔާން ނިވާނުވާ ހާލަތުގައި ބައިތިއްބައިގެން ރައީސް ޑރ. މުއިއްޒު ވަޑައިގަންނަވާ ކޮންމެ ރަށެއްގައި ވައުދުތަކެއްވެފައި ދުނިޔޭގެ ޤައުމުތަކުގައި ސަލާންޖަހައިގެން ރައްޔިތުންގެ ނަމުގައި ބޮޑެތި ދަރަނި ނަގައިގެން އެއްވެސް އިމާރާތެއް އެޅުމުގެ ބޭނުމެއް ނެތް." އައްބާސް ވިދާޅުވި އެވެ.
އޭނަ މިހެން ވިދާޅުވި ނަމަވެސް ރައީސް ތަކުރާރުކޮށް ވިދާޅުވަމުން ގެންދަވަނ ވައުދުތައް ވެވަޑައިގަންނަވަނީ ވައުދުފައް ފުއްދެވޭނެތީ ކަމަށާއި ރައްޔިތުން ބިކަ ހާލުގައި ނުޖައްސަވާނެ ކަމަށެވެ.