މިހާރު މުޅި ރާއްޖެއަށް ކުރަމުންދާ ވިއްސާރައާ ގުޅިގެން، އާންމު ރައްޔިތުންނަށް ލިބޭ ގެއްލުންތައް ކުޑަކުރުމަށް ޓަކައި ރައީސުލްޖުމްހޫރިއްޔާ އުފެއްދެވި ޚާއްޞަ ޓާސްކްފޯހުގެ އިރުޝާދުގެ ދަށުން މާލޭގެ ގޭގެއަށް ވެލި ބަސްތާ ދޫކުރުމަށް، ޑިޒާސްޓަރ މެނޭޖުމެންޓް އޮތޯރިޓީގެ ލަފާގެ މަތިން، ވެލި ބަސްތާ ތައްޔާރުކޮށް ދޫކުރުމުގެ މަސައްކަތް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާގެ ޕަބްލިކް ވާރކްސް ޑިޕާރޓްމެންޓުން ކޮށްފިއެވެ.
އެ ގޮތުން މާލޭގެ ގޭގެއަށް ދޫކުރުމަށް ގާތްގަނޑަކަށް 1000 ބަސްތާ ވެލި ތައްޔާރު ކުރެވިފައި ވެއެވެ. ހައުސިންގ މިނިސްޓްރީ ކުރިން ހުރި ގޯތިތެރޭގައި ކުރެވުނު މި މަސައްތައް ބައްލަވައިލެއްވުމަށް ވަޒީރު އާދަމް ޝަރީފު ޢުމަރު ވަޑައިގެން މަސައްކަތްކުރެއްވި މުވައްޒަފުންނަށް ހިތްވަރު ދެއްވާފައި ވެއެވެ.
މީގެ އިތުރުން މާލޭގައި، އެންމެ ގިނައިން ފެން ޖަމާވާ ދިމާތަކުން، އެމް.އެން.ޑީ.އެފްގެ އިރުޝާދުގެ މަތިން މޫދަށް ފެން ބޭރުކުރެވޭނެ ގޮތް ވެސް މި މިނިސްޓްރީގެ މުވައްޒަފުން ވަނީ ކުރައްވާފައެވެ. އެ ގޮތުން ޕޯސްޓް އޮފީހާ ދިމާއިންނާއި، މާލޭ ޖަލާ ދިމާއިން މޫދަށް ފެން ބޭރުކުރެވޭނެ ގޮތް ވަނީ ހަދައިފައެވެ.
ވިއްސާރައާ ގުޅިގެން އަތޮޅުތެރޭގެ ޙާލަތު ކުލަސްޓަރ ނިޒާމުގެ ތެރޭން ދެނެގަނެ، އެ ސަރަޙައްދެއްގެ ޕޮލިހުންނާއި، ސިފައިން މެދުވެރިކޮށް އަވަސް ޙައްލެއް އެ ރައްޔިތުންނަށް ހޯއްދަވައި ދެއްވުމަށް ވެސް މި މިނިސްޓްރީ އޮތީ، ތައްޔާރީ ޙާލަތުގައެވެ. އަދި ޕަބްލިކް ވާރކްސް ރީޖަނަލް ޑިޕާރޓްމެންޓްތައް ހުރި ރަށްރަށުން ވެސް ދުރާލާ މި ކަމަށް ވާންޖެހޭ ތައްޔާރީތައް ވަނީ ވެފައެވެ.
 
ހަބަރު: ސަރުކާރު