ރާއްޖެއަށް މިހާރު ހުޅަނގު މޫސުން ފެށިފައިވާތީ، ބޯކޮށް ވާރޭވެހި ލިބިދާނެ ގެއްލުންތަކަށް ދުރާލާ ރައްކާތެރިކަމުގެ ފިޔަވަޅުތައް އެޅުމަށާއި މޫސުމަށް ސަމާލުވުމަށް ކަމާބެހޭ ފަރާތްތަކުން އިލްތިމާސްކޮށްފިއެވެ. މޫސުމާއި ބެހޭ ގައުމީ އިދާރާއިން ބުނީ، ކުރިއަށް އޮތް 24 ގަޑިއިރުވެސް ރާއްޖޭގެ ބޮޑުބަޔަކަށް ވިއްސާރަކުރާނެ ކަމަށާއި، އެންމެ ބޮޑަށް މޫސުން ގޯސްވާނީ އުތުރާއި މެދު ރާއްޖެ ތެރޭގެ އަތޮޅުތަކަށް ކަމަށެވެ.
މެޓް އޮފީހުން ބުނި ގޮތުގައި ވިއްސާރަވެ ވައިގަދަވާނެތީ ޅ. އަތޮޅުން ފެށިގެން މ. އަތޮޅަށް ވަނީ ވައިޓް އެލާޓް ނެރެފައެވެ. އެލާޓް ނެރެފައިވާ ސަރަހައްދުތަކަށް ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 40 މޭލާއި 45 މޭލާ ދެމެދުގެ ބާރުމިނަކަށް ވައިގަދަވާނެ ކަމަށް ލަފާކުރެވޭތީ ކަނޑުތައް ވެސް ވަރަށް ގަދަވާނެއެވެ.
އެހެންކަމުން، ބޯކޮށް ވާރޭވެހި ފެންބޮޑުވުން ފަދަ ހާދިސާތަކުން ލިބިދާނެ ގެއްލުންތަކުން ސަލާމަތްވުމަށް ދުރާލާ ފިޔަވަޅު އެޅުމަށް ވަނީ އިލްތިމާސްކޮށްފައެވެ. މީގެ އިތުރުން، ކަނޑު ދަތުރުތައް އިންތިޒާމުކުރާ ފަރާތްތަކުންނާއި ދަތުރުވެރިން ވެސް މޫސުމާ ބެހޭ އެންމެ ފަހުގެ މައުލޫމާތު ހޯދައިގެން ދަތުރުތައް ރޭވުމަށް ކަމާބެހޭ އިދާރާތަކުން ވަނީ ހަނދާންކޮށްދީފައެވެ.