އިނގިރޭސީވިލާތް ހިމެނޭ ގޮތަށް ބޭރު ގައުމުތަކުގައި ތައުލީމް ހާސިލުކުުރަމުންދާ ދަރިވަރުންގެ ފައިސާ ޖަމާކުރުން ލަސްވުމުގެ މައްސަލަ އާއި ދެންވެސް އެ ކުދިންނަށް ހުރި ކަންބޮޑުވުންތަކަށް ހައްލު ހޯއްދަވައިދެއްވާނެ ކަމުގެ ޔަގީންކަން ރައީސް މުހައްމަދު މުއިއްޒު އިއްޔެ ދެއްވައިފި އެވެ.
ވީ ކިހިނެއް؟ - އިނގިރޭސީވިލާތް ހިމެނޭހެން ބައެއް ގައުމުތަކުގައި ތިބި ސަރުކާރުގެ ސްކޮލާޝިޕް އަދި ލޯނުގައި ކިޔަވާ ދަރިވަރުންގެ ފައިސާ ޖަމާވުން ލަސްވުމާ ގުޅޭ ގޮތުން އެ ދަރިވަރުން މިދިޔަ މަހެއްހާ ދުވަހު ދިޔައީ ކަންބޮޑުވުން ފާޅު ކުރަމުންނެވެ.
ރައީސް މުއިއްޒު އިނގިރޭސީވިލަތަށް ކުރެއްވި ދަތުރުފުޅުގައި އިއްޔެ އެ ގައުމުގައި ތިބި ދިވެހި ދަރިވަރުންނާ ބައްދަލުކުރައްވައި އެ ދަރިވަރުންގެ ހުރި މައްސަލަތަކާ ގުޅޭ ގޮތުން މަޝްވަރާ ކުރައްވާފައިވެ އެވެ. އެ ބައްދަލުވުމުގައި ރައީސް ދެއްކެވި ވާހަކަތައް ހިމެނޭ ވީޑިއޯ ރައީސް އޮފީހުން ރޭ ސޯޝަލް މީޑީއާގައި އާންމުކޮށްފައިވެ އެވެ.
ތަފްސިލު - އެ ބައްދަލުވުވުމުގައި ވާހަކަ ދައްކަވަމުން ރައީސް ވިދާޅުވީ، ސްކޮލާޝީޕް އަދި ލޯނުގައި ކިޔަވާ ދަރިވަރުންގެ ފައިސާ ޖަމާކުރުމާއި ދެންވެސް ހުރި މައްސަލަތަކަށް ހައްލު ހޯދުމަށް ސަރުކާރުން މިދިޔަ ދުވަސްތަކުގައި ގިނަ މަސައްކަތްތަކެއް ކޮށްފައިވާނެ ކަމަށެވެ. އަދިވެސް ބައެއްކަންކަން ހައްލު ކުރަން އެބަހުރިކަން އެމަނިކުފާނު ފާހަގަ ކުރެއްވި އެވެ.
"އިރާދަކުރެއްވިއްޔާ ކުރިއަށް އޮތް ތަނުގައި އެއި ސްޓައިޕެންޑް ކަމުގައިވިޔަސް، ޓިއުޝަން ފީ ކަމުގައިވިޔަސް [ދޫކުރަމުން ގެންދާނެ]. ސަރުކާރުގެ ނިޒާމުތެރޭގައި ހުންނަ އިންއެފިޝިއެންސީތައް [ހައްލުކޮށްދޭނަން]،" ރައީސް ވިދާޅުވި އެވެ.
ސްކޮލާޝިޕާއި ލޯނު އަދި އަމިއްލަ ހަރަދުގައި ވެސް ބޭރު ގައުމުތަކުގައި ކިޔަވާ ދަރިވަރުންގެ ހުރި މައްސަލަތައް އެހެންވެސް މައްސަލަތަް ހައްލު ކޮށްދެއްވޭނެ ކަމުގެ ޔަގީންކަން އެމަނިކުފާނު ދެއްވި އެވެ.
"މިކޮޅުގައި ކިޔަވަން ތިބޭއިރު ދިމާވާ އެކި ކަހަލަ ދަތިތަކުގައި ސަރުކާރުން ކޮށްދޭން ޖެހޭ ހުރިހާ ކަމެއް އިސްކަން ދީގެން ކޮށްދޭނަން. ކޮންމެ ގައުމެއްގައި ކިޔެވިޔަސް އެ ގައުމެއްގައި ދިވެހި ކިޔަވާ ކުއްޖަކަށް ސަމާލުކަން ދޭން ޖެހޭނެ، އިސްކަން ދޭން ޖެހޭނެ،" އިނގިރޭސީވިލާތުގައި ޕީއެޗްޑީއާ ހަމައަށް ތައުލީމް ހާސިލުކުރެއްވި ރައީސް މުއިއްޒު ވިދާޅުވި އެވެ.
"ސްކޮލާޝިޕްގައި އައިސް ތިބި ކުދިން އަދި ލޯނުގައި އައިސް ތިބި ކުދިން އަދި އަމިއްލަ ހަރަދުގައި އައިސް ތިއްބަސް އެއްވެސް ކަމެއްގައި ސަރުކާރުގެ ތެރެއިން ކަމެއް ކޮށްދިނުުމުގައި އެހީތެރިކެމެއް ބޭނުންވަންޏާ އަދި ނުވެ އޮތް ކަމެއްވިއްޔަސް އެކަމެއް އިރާދަކުރެއްވިއްޔާ އަޅުގަނޑު ކޮށްދޭނަން ސަރުކާރު ނިޒާމުގެ ތެރެއިން އަވަސް ކޮށްދިނުމާއި ފަހިކޮށްދިނުމުގައި."
ދަރިވަރުންގެ އެއް ކަންބޮޑުވުުމަކީ، ހަޔާ އެޑިއުކޭޝަން މިނިސްޓްރީއަށް އީމެއިލްއެއް ފޮނުވިޔަސް އެ އީމެއިލްއަށް ޖަވާބު ދިނުން ލަސްވުމުގެ ކަންބޮޑުވުމެވެ. ރައީސް ވިދާޅުވީ، އެކަން ވެސް ހައްލު ކުރުމަށް މަސައްކަތް ކުރައްވާނެ ކަމަށެވެ.
"އަޅުގަނޑަށް އެންމެ ގިނައިން އައިސް ހުރި ވަރަށް ޖެނުއިން ކޮންސާނެއް އައިސް ހުރި ކަމެއް ސަރުކާރުގެ ކަމާ ބެހޭ އިދާރާއެއްގެ ރެސްޕޮންސް ދަށްވުމާ މިކަހަލަ ކަންކަން، އީމެއިލްއަށް ޖަވާބުދިނުން ލަސްވުން ކަހަލަ ކަންކަމަށް އަޅުގަނޑުމެން އެޑްރެސް ކުރާނަން،" ރައީސް ވިދާޅުވި އެވެ.
ނިޒާމުގެ ތެރޭގައި ހުރި މައްސަލަތައް އިރާދަކުރެއްވިއްޔާ ރަނގަޅުކޮށް އެފިޝަންޓުކޮށްދީ އިރާދަކުރެއްވިއްޔާ ފަސޭހަކަން ގެނެސްދޭނަނަން. އަވަސްކޮށް ޖަވާބުދިނުމާއި އޮންޓައިމް އެ ލިބެންޖެހޭ ފައިސާ ޖަމާކޮށްދިނުމުގެ ކަންކަން، މިކަންކަން ރަނގަޅުކޮށްދިނުމުގެ ކަންކަން ކޮށްދޭނަން."
މި ބައްދަލުވުމުގައި ރައީސް ވަނީ އިނގިރޭސީވިލާތުގައި ދިރިއުޅޭ ދަރިވަރުން ބޭނުން ކުރުމަށް ދިޔަ އިމާރާތް ރޯޒްމޮންޓް އެވެނިއު އަލުން މޯލްޑިވްސް ސްޓޫޑެންޓްސް އެސޯސިއޭޝަން - ޔޫކޭ (އެމްއެސްއޭ) އާ ހަވާލުކުރިކަންވެސް އިއުލާނުކުރައްވައިފަ އެވެ. އަދި އެތަނުގައި ތަޅުދަނޑި އެމަނިކުފާނު ދަރިވަރުންނާ ހަވާލުކޮށްދެއްވި އެވެ.