މާލޭގެ އިމާރާތެއްގެ ފަސްވަނަ ފްލޯއިން ކުޑަކުއްޖަކު ކިރިޔާ ނުވެއްޓި ސަލާމަތްވާ މަންޒަރު ފެންނަ ވީޑިއޯއެއް އާންމުވެއްޖެއެވެ. ސޯޝަލް މީޑިއާގައި ދައުރުވަމުން އަންނަ ވީޑިއޯއިން ފެންނަނީ ވަރަށް ބޮޑަށް ހުޅުވިފައިވާ ކުޑަދޮރެއްގެ ފާރުކޮޅު މަތީ ކަކޫ ޖަހައިގެން އޮންނަ ތަނެވެ. އަދި މަޑުމަޑުން ވާތު ފައި މަގަށްވާ ގޮތަށް ބޭރަށް ނެރި މަޑުމަޑުން ހުންނަ ތަން ވެސް ފެނެއެވެ. އެ ވަގުތު މަގުމަތީ ތިބި މީހުން ހަޅޭއްލަވާ އަޑު ވެސް އިވެއެވެ. އަދި އެ ކުއްޖާ ގާތު އެތެރެއަށް ވަންނަން ގޮވައި އަޑު ވެސް އިވެއެވެ. ގާތްގަނޑަކަށް 16 ވަރަކަށް ސިކުންތު ފަހުން ދެ ފައި ވެސް އެ ކުއްޖާ މަގާ ދިމާލަށް ކުޑަދޮރުން ބޭރަށް ބާލައެެވެ. އޭރު ދެ އަތާއި، ހަށިގަނޑުގެ މަތީބައި އޮތީ ފާރުކޮޅު މައްޗަށެވެ. އޭގެ ފަހުން އަނެއްކާ ވެސް ފާރުކޮޅު މައްޗަށް އެ ކުއްޖާ މަޑުމަޑުން އަރައި އިށީނދެއެވެ. އަދި އިށީނދެގެން ހުއްޓާ، އެޕާޓްމަންޓު ތެރެއަށް ކުއްޖާ ދަމައިގަންނަ މަންޒަރު ފެނެއެވެ. މައުލޫމާތު ލިބޭ ގޮތުގައި މި ހާދިސާ ހިނގައިފައިވަނީ މާލޭ، ހެންވޭރު ބުރެވިމަގުގައި ހުރި ގެއެއްގެ ފަސްވަނަ ފަންގިފިލާގައެވެ. މި ހާދިސާއާ ގުޅިގެން ފުލުހުންގެ ބަހެއް އަދި ލިބިފައެއް ނުވެއެވެ. އަދި ހާދިސާގައި ހިމެނޭ ކުއްޖާއަށް އެއްވެސް އަނިޔާއެއްވީ ކަމުގެ މައުލޫމާތެއް ވެސް ނުލިބެއެވެ. ކުޑަކުދިން އިމަރާތްތައް މަތިންް ވެއްޓުމުގެ ހާދިސާތައް މިދިޔަ އަހަރު ތެރޭ މަދުން ނަމަވެސް ހިނގިއިރު، އެ ކަން އެންމެ އާންމީ ހިޔާ ފްލެޓް ސަރަހައްދުގައެވެ. އެހެންކަމުން އުސް އިމާރާތްތަކުގައި، ކުޑަކުދިން ދިރިއުޅޭނަމަ ކުޑަދޮރުތައް ރަނގަޅަށް ތަޅުލުމާއި، އެ ކުދިންނަށް ނުރައްކާވާނެ އެންމެހާ ކަންކަން ބަލައި ދެނެގަތުން ވަރަށް މުހިންމެވެ. އަދި ބޮޑު މީހެއް އަބަދުވެސް އެ ކުދިންގެ ހަރަކާތްތައް ބެލުން މުހިންމެވެ.