ބޮލީވުޑް އެކްޓަރު ރިތިކް ރޯޝަންގެ ކެރިއަރުގެ އެންމެ މަގުބޫލު އެއް ފްރެންޗައިޒް ފިލްމު ކަމަށްވާ "ކްރިޝް 4"ގެ ބަތަލާއިންގެ ރޯލަށް ނޯރާ ފަތޭހީ އާއި ޕްރިތީ ޒިންތާ ގެންނަން ނިންމާފައިވާ ކަމަށް ރިޕޯޓުތައް ބުނެފިއެވެ. ރިތިކް ފުރަތަމަ ފަހަރަށް ޑައިރެކްޓަރެއްގެ ގޮތުގައި ފިލްމު ޑައިރެކްޝަނަށް ނުކުންނަ މި ފިލްމުގައި ނޯރާ ފަތޭހީއަށް ހުށަހަޅާފައިވާ ރޯލަކީ ކުރިން ބަތަލާ ޕްރިޔަންކާ ފެންނާނެ ކަމަށް ބުނަމުން އައި ރޯލެވެ. ނޯރާ އާއި ޕްރިތީގެ އިތުރުން ފިލްމު "ކްރިޝް 4"ގެ ކާސްޓުން ފެންނާނެ އިތުރު ތަރިންގެތެރޭ ވިވެކް އޮބޮރޯއި، ނަސީރުއްދީނު ޝާހު އަދި ރޭކާ ހިމެނޭ ކަމަށް ފިލްމީ ޚަބަރުތައް ބުނެއެވެ. ފިލްމު "ކްރިޝް 4" ޑައިރެކްޓް ކުރުމުގެ ޒިންމާ އެކްޓަރު ރިތިކް ރޯޝަންއާ ހަވާލު ކުރަމުން މި ފްރެންޗައިސް ކުރިން ޑައިރެކްޓްކުރި ރިތިކްގެ ބައްޕަ ރާކޭޝް ރޯޝަން ބުނެފައި ވަނީ، މީގެ 25 އަހަރު ކުރިން ރިތިކް އެކްޓަރެއްގެ ގޮތުގައި ފިލްމީ ދާއިރާއަށް ތައާރަފް ކުރުމަށްފަހު 25 އަހަރު ފަހުން ޑައިރެކްޓަރެއްގެ ގޮތުގައި ރިތިކް ތައާރަފް ކުރުމަކީ ލިބުނު ވަރަށް ބޮޑު އުފަލެއް ކަމަށެވެ. ޕްރިތީ ޒިންތާ ރިތިކް ރޯޝަންއާ އެކު ފިލްމު "ކޮއި މިލް ގަޔާ"ގެ މަންޒަރެއްގައި--ފޮޓޯ/ފިލްމުފެއަ ރާކޭޝް ފިލްމު ޑައިރެކްޝަނާ ދުރަށްދިޔަ ނަމަވެސް ދަރިފުޅު އަދި އެކްޓަރު ރިތިކް އޭނާގެ އެހީއަށް ބޭނުންޖެހިއްޖެ ކޮންމެ ހިނދެއްގައި ވެސް އެހީވުމަށް ތައްޔާރަށް ހުންނާނެ ކަމަށް ވަނީ ބުނެފައެވެ. ރިތިކް މި ފިލްމު ޑައިރެކްޓް ކުރާނެކަން އިއުލާނުކޮށްފައިވާއިރު ފިލްމުގެ ކާސްޓުންނާ ބެހޭ މައުލޫމާތު ރަސްމީކޮށް ހާމަކޮށްފައެއް ނުވެއެވެ. ފިލްމު "ކްރިޝް 4"ގެ މަސައްކަތަކީ މިހާރުވެސް ވަރަށް ބޮޑަށް ފެށުން ލަސްވެފައިވާ ފިލްމެކެވެ. ބެލެވޭ ގޮތުގައި މި ފިލްމުން ބަތަލާ ޕްރިޔަންކާ ވަކިވެފައި ވަނީ ބަތަލާގެ ފިލްމީ ޝެޑިއުލް ހުރިގޮތުން ފިލްމަށް ވަގުތު ދެވެން ނެތުމުންނެވެ. ނޯރާއާ އެކު ބަތަލާ ޕްރިތީ ޒިންތާ މި ފިލްމުން ފެންނާނެ ކަމަށް ރިޕޯޓުތަކުން ބުނެފައިވާއިރު "ކްރިޝް"ގެ ފުރަތަމަ ބައި ކަމަށްވާ "ކޮއި މިލްގަޔާ"ގެ ބަތަލާ އަކީ ވެސް ޕްރިތީއެވެ.