އިންޑިއާ ކަނޑުގައި އެމެރިކާގެ ސަބްމެރީނަކުން ހަމަލާދީ ފައްތާލި އީރާނުގެ މަނަވަރުން ސަލާމަތްވި ފަޅުވެރިން އަނބުރާ އީރާނަށް ނުފޮނުވުމަށް އެމެރިކާއިން ސްރީ ލަންކާއަށް ބާރުއަޅަމުންދާކަން ހާމަވެއްޖެ އެވެ.
މިކަން ހާމަވެފައިވަނީ އެމެރިކާގެ ސްޓޭޓް ޑިޕާޓްމަންޓުގެ އެތެރޭގެ ލިޔެކިޔުންތަކަކާ ހަވާލާދީ ރޮއިޓާސް ނޫހުން ޝާއިއުކުރި ރިޕޯޓަކުންނެވެ.
މިދިޔަ ބުދަ ދުވަހު ލަންކާގެ ގޯލްއާ 19 ނޯޓިކަލް މޭލު ބޭރުން އައިއާރުއައިއެސް ދޭނާ ނަމަކަށް ކިޔާ މަނަވަރަށް ދިން މި ހަމަލާގައި ގިނަ އަދަދެއްގެ ފަޅުވެރިން ވަނީ މަރުވެފަ އެވެ. އޭގެ ތެރެއިން 32 މީހަކު ވަނީ ސަލާމަތްކުރެވިފަ އެވެ.
އެމެރިކާގެ ޑިފެންސް ސެކްރެޓަރީ ޕީޓް ހެގްސެތު މި ހަމަލާ ސިފަކުރައްވާފައިވަނީ "ހިމޭން މަރެއް"ގެ ގޮތުގަ އެވެ. މިއީ ދެވަނަ ބޮޑު ހަނގުރާމައަށް ފަހު އެމެރިކާއިން މިފަދަ ހަމަލާއެއް ދިން ފުރަތަމަ ފަހަރެވެ.
އެއާ އެކު، ލަންކާގެ ހާއްސަ އިގްތިސާދީ ސަރަހައްދަށް ވަދެ، ހާލުގައި ޖެހިފައި އޮތް އީރާނުގެ މަނަވަރެއް ކަމަށްވާ އައިއާރުއައިއެސް ބޫޝެހްރުގައި ތިބި 208 ފަޅުވެރިން ވަނީ ލަންކާއަށް ބާލާފަ އެވެ. ލަންކާގެ ރައީސް އަނޫރާ ކުމާރާ ދިސާނަޔަކަ ވިދާޅުވީ، އެ ފަޅުވެރިންނަށް އެހީތެރިކަން ފޯރުކޮށްދިނުމަކީ އިންސާނީ ގޮތުން އެ ގައުމުގެ މައްޗަށް އޮތް ޒިންމާއެއް ކަމަށެވެ.
އިއްޔެގެ ޑިޕްލޮމެޓިކް ލިޔެކިޔުންތަކުން އެނގޭ ގޮތުގައި، ކޮލަމްބޯގައި ހުންނަ އެމެރިކާ އެމްބަސީގެ ޗާޖް ޑި އެފެއާޒް ޖޭން ހޮވެލް ވަނީ ބޫޝެހްރުގެ ފަޅުވެރިންނާއި ދޭނާ އިން ސަލާމަތްވި މީހުން އަނބުރާ އީރާނަށް ނުފޮނުވުމަށް ލަންކާގެ ކަމާބެހޭ ފަރާތްތަކަށް އަންގާފަ އެވެ. އަދި މި މީހުން ބޭނުންކޮށްގެން އީރާނުން ޕްރޮޕެގަންޑާ ފެތުރުމަށް ކުރާ މަސައްކަތްތައް ހުއްޓުވުމަށް ވެސް އެމެރިކާއިން ވަނީ ބާރުއަޅާފަ އެވެ.
މީގެ އިތުރުން، ހަނގުރާމަ ނިމެންދެން ބޫޝެހްރު މަނަވަރު ބާއްވާނީ ލަންކާގެ ބެލުމުގެ ދަށުގައި ކަމަށް އެ ލިޔުމުގައިވެ އެވެ. ލަންކާގެ ކަމާ ބެހޭ ފަރާތްތަކުން ބުނި ގޮތުގައި، އެ މަނަވަރު މިހާރު އިރުމަތީ އައްސޭރީގެ ބަނދަރަކަށް ގެންދިއުމުގެ މަސައްކަތް ދަނީ ކުރަމުންނެވެ. އަދި ގިނަ ފަޅުވެރިން ބައިތިއްބާނީ ކޮލަމްބޯ ކައިރީގައި ހުންނަ ނޭވީ ކޭމްޕެއްގަ އެވެ.
ލަންކާގެ ހެލްތު އެންޑް މާސް މީޑިއާގެ ޑެޕިއުޓީ މިނިސްޓަރު ހަންސަކަ ވިޖޭމުނީ ވިދާޅުވީ، ދޭނާ މަނަވަރުން މަރުވި މީހުންގެ ހަށިތައް އަނބުރާ ގެންދިއުމަށް ތެހެރާނުން އެދިފައިވާ ކަމަށެވެ. ނަމަވެސް އެކަމަށް އަދި ވަކި ތާރީހެއް ކަނޑައެޅިފައެއް ނުވެ އެވެ.
އެމެރިކާގެ އޮފިޝަލަކު ރޮއިޓާސްއަށް ވިދާޅުވި ގޮތުގައި، ދޭނާ މަނަވަރަށް ހަމަލާދިންއިރު އެއީ ހަތިޔާރު އެޅި މަނަވަރެކެވެ. އަދި ޓޯޕީޑޯ ހަމަލާ ދިނުމުގެ ކުރިން އެއްވެސް އިންޒާރެއް ދީފައެއް ނުވެ އެވެ.
މި މަނަވަރަކީ މިދިޔަ މަހު އިންޑިއާއިން ބޭ އޮފް ބެންގޯލްގައި ބޭއްވި އަސްކަރީ ތަމްރީނުތަކުގައި ބައިވެރިވުމަށް ފަހު އަނބުރާ އީރާނަށް ދަތުރުކުރި މަނަވަރެކެވެ.