ސަރުކާރުން މިހާރު އިއުލާންކޮށްފައިވާ 'ބޯހިޔާވަހިކަން އެންމެންނަށް' ސްކީމުގެ ޝަރުތުތައް ކަނޑައެޅުމާއި އެކަމާ ގުޅޭ އެހެނިހެން ކަންކަމުގައި މާލެ ސިޓީ ކައުންސިލްގެ ލަފާ ނުހޯދާތީ ހުށަހެޅި މައްސަލަ މިއަދުގެ ޖަލްސާގެ ކޯރަމް ހަމަނުވެގެން ކުރިއަށް ނުގެންދެވިގެން ޖަލްސާ ނިންމާލައިފި އެވެ. 
ވީ ކިހިނެއް؟ - މި މައްސަލައަށް މަޝްވަރާކޮށް ގޮތެއް ނިންމުމަށް ކައުންސިލްގެ ރަސްމީ ޖަލްސާއަކަށް އެޖެންޑާކޮށްދެއްވުން އެދި ހުށެހުޅުއްވީ، ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު އަދި ގަލޮޅު ހުޅަނގު ދާއިރާގެ ކައުންސިލަރު މަރިޔަމް ނާޒިމާ މުހައްމަދު ފާއިޒް އެވެ. މިދިޔަ އާދިއްތަ ދުވަހު ހުށަހެޅުއްވި މި މައްސަލަ މިއަދުގެ ޖަލްސާއަށް ވަނީ އެޖެންޑާކޮށްފަ އެވެ.
ތަފްސީލް - އެކަމަކު ޖަލްސާގެ ކޯރަމް ހަމަނުވެގެން މިއަދުގެ ޖަލްސާގައި މި މައްސަލަ ކުރިއަށް ގެންދެވޭ ގޮތް ވަނީ ނުވެފަ އެވެ. ޖަލްސާގެ ކޯރަމަކީ 10 އެވެ. މިއަދުގެ ޖަލްސާއަށް ހާޒިރުވީ އެންމެ 8 ކައުންސިލަރުންނެވެ. 
ހުށަހަޅާފައިވާ މައްސަލާގައި ބުނެފައިވަނީ ބޯހިޔާވަހިކަމަށް އެދި ކުރިމަތިލުމުގެ ފުރުސަތު މާލެ ސަރަހައްދުގައި ދިރިއުޅޭ މީހުންނަށް ހުޅުވާލާފައިވާއިރު، މި މަސައްކަތުގައި މާލޭ ސިޓީ ކައުންސިލުގެ ގާނޫނީ އަދި އަހުލާގީ ޒިންމާތަކެއް ހުރި ކަމަށް ގަބޫލުކުރާ ކަމަށެވެ.
ބޯހިޔާވަހިކަމަށް މާލެއިން ތަނެއް ދޫކުރާ ނަމަ އެކަމެއްގައި މާލޭ ސިޓީ ކައުންސިލުގެ ދައުރު ފުރިހަމައަށް އޮންނާނެ ކަމަށް މާލޭގެ މޭޔަރަކަށް މިހާރުގެ ރައީސް މުހައްމަދު މުއިއްޒު ހުންނެވިއިރު ވެސް ތަކުރާރުކޮށް ވިދާޅުވެ އެކަމަށް އަޑުހަރުކޮށް ގޮވާލައްވާފައިވާ ކަމަށް އެ މައްސަލައިގައިވެ އެވެ.
އެހެންކަމުން، މި މައްސަލާގައި ވަނީ:
އެ ސްކީމަށް ފޯމު ހުށަހެޅުމާއި ފޯމުތައް އިވެލުއޭޓުކުރުމާއި މުރާޖައާކޮށް ވަޒަންކުރުމާއި ޝަކުވާތަކަަށް ހައްލު ހޯދައިދީ ޖަވާބުދިނުމުގައި ކައުންސިލަށް އޮންނަންޖެހޭ ދައުރާ ގުޅޭ ގޮތުން މަޝްވަރާކޮށް މި މަސައްކަތުގައި ބައިވެރިކުރުމަށް ސަރުކާރަށް ގޮވާލަން
ބޯހިޔާވަހިކަމަށް ހުށަހަޅަން ބޭނުންވާ މީހުންނަށް ލިޔެކިޔުން ހަމަކޮށްދިނުމާއި ފޯމު ހުށަހެޅުން ފަދަ ކަންކަމުގައި އެހީތެރިކަމާއި ލަފާ ދިނުމަށް ކައުންސިލުގައި ވަކި ހާއްސަ އިންތިޒާމުތަކެއް ހަމަޖައްސަން؛ ކުރިން ހުޅުވާލި ސްކީމްތަކުގައި ވެސް އެގޮތަށް އަމަލުކޮށްފައިވޭ
މި ސަރުކާރުން ހުޅުވާލާފައިވާ ބޯހިޔާވަހިކަމުގެ ޝަރުތުތަކާ ގުޅޭ ގޮތުން ކައުންސިލާއި އެ ކައުންސިލުގެ ހައުސިން ކޮމިޓީ އާއި ސަރުކާރުގެ ބޯހިޔާވަހިކަމުގެ ސްކީމުތަކަށް ލަފާދިނުމަށް އެކުލާވާލާފައިވާ ކޮމިޓީއާ ވެސް މަޝްވަރާކޮށްފައި ނުވާތީ އެކަމަށް ލަފާދިނުމުގެ ފުރުސަތު ދިނުމަށް ގޮވާލަން
މި މައްސަލާގައި އިތުރަށް މަޝްވަރާކުރަން ހުށަހަޅާފައިވަނީ، އެ ސްކީމުގެ ޝަރުތުތަކާ ބެހޭ ގޮތުން އާންމުންގެ ކަންބޮޑުވުން ހުރި އަސާސީ މައްސަލަތައް ފާހަގަކުރެވިގެން ކަމަށް ބުނެ އެވެ. އެހެންކަމުން އެ ކަންކަމުގެ ކަންބޮޑުވުން ފާޅުކޮށް، ބަދަލު ގެންނަންވީ ގޮތުގެ ލަފާ ސަރުކާރަށް ދިނުމަށް އެ މައްސަލައިގައިވެ އެވެ.
ފާހަގަކޮށްލެވޭ ކަމެއް - ޕީއެންސީގެ މެޖޯރިޓީ އޮންނަ ކައުންސިލުގެ ޖަލްސާތަކުގައި ސަރުކާރާ ގުޅޭ އެއްވެސް މައްސަލައެއް ހިމަނާ ދުވަހެއްގައި ނަމަ ޖަލްސާތައް ޕީއެންސީގެ ކައުންސިލަރުން ދަނީ ބޮއިކޮޓް ކުރަމުންނެވެ. އެހެންވެ، މިފަހުން ކައުންސިލުގެ ޖަލްސާތައް ތަކުރާރުކޮށް ބޭއްވޭ ގޮތް ވަނީ ނުވެފަ އެވެ.