ފަހު ދިހައަކާއި ފިޠުރު ޢީދުގެ މުނާސަބަތުގައި ގިނަ ދުވަސްތަކަކަށް ސަރުކާރު ބަންދުކުރުމަށްފަހު، އަންނަ ހޯމަ ދުވަހު ސަރުކާރުގެ އޮފީސްތައް އަލުން ހުޅުވުމަށް ނިންމައިފިއެވެ. ރައީސުލްޖުމްހޫރިއްޔާގެ އޮފީހުން މަޢުލޫމާތު ދީފައިވާ ގޮތުގައި، އޮފީސްތައް ހުޅުވި ނަމަވެސް ކުރިއަށް އޮތް ހަފުތާގެ ވެސް ރަސްމީ ގަޑިއަކީ ރޯދަ މަހުގެ މަސައްކަތު ވަގުތެވެ. އެއީ ހަ ރޯދަ ހިފުމަށް ލުއި ދިނުމުގެ ގޮތުންނެވެ. އެގޮތުން، ޝައްވާލް މަހުގެ ފުރަތަމަ ހަތް ދުވަހުގެ ރަސްމީ މަސައްކަތު ގަޑިއަކީ ހެނދުނު 9:00 އިން މެންދުރު 1:00 އަށް ކަމުގައި ވަނީ ކަނޑައަޅާފައެވެ. އެހެންކަމުން، މި ފެށޭ ހަފުތާގައި ސަރުކާރުގެ ހުރިހާ އިދާރާތަކަކުންވެސް ޚިދުމަތް ދިނުމަށް ހަމަޖެހިފައިވަނީ މި ހަތަރު ގަޑިއިރުގެ ތެރޭގައެވެ. މި ހަތް ދުވަހުގެ މުއްދަތު ހަމަވުމަށްފަހު، ސަރުކާރުގެ ރަސްމީ މަސައްކަތު ގަޑިތައް އާންމު އުސޫލުން ހެނދުނު 8:00 އިން މެންދުރުފަހު 2:00 އަށް ބަދަލުވެގެންދާނެއެވެ.