ﷲ ތަޢާލާ ކީރިތި ޤްރްއާނުގައި ވަޙީ ކުރައްވަވާފައިވަނީ އެއއވެސް އިރެއްގައި މައިން ބަފައިންނަށް އަޅާނުލައި ދޫކޮށް ނުލުމަށެވެ. މުސްކުޅިވެއްޖެނަމަ އިތުރަށް ކަމޭ ހިތުމަށެވެ. އެއްވެސް މިންވަރަކަށް ހިތުގައި ނުޖެއްސުމަށެވެ. އެދެމީހުންގެ ކުރިމަތީގައު "އުއްފު"ވެސް ނުބުނުމަށެވެ. ވީމާ މިކަންކަމަށް ސަމާލުކަން ނުދީ މައިން ބަފައިންނަށް އިހާނެތިކޮށް ހިތާ އާއިލާއެއް އަބަދުވެސް ދާނީ ބަނގުރޫޓުވަމުންނެވެ.  
މަންމަ ނިކަމެތި ކުރާ ޢާއިލާއެއް ބާޖަވެރިވެގެނެއް ނުދާނެއެވެ. ދާނީ ބަނގުރޫޓުވަމުންނެވެ. މުސްލިމުންގެ ގޮތުގައިތިބެމެ އަހުރެމެންގެ ޢަމަލުތައް މިދަނީ ނުބައިން ނުބައަށް ބަދަލުވަމުންނެވެ. ކުރެވޭ ނުބައި ޢަމަލުތައް ގިނަވަމުންނެވެ. ނަތީޖާއެއްގެ ގޮތުން މައިންބަފައިންނާއިމެދު ފަރުވާކުޑަކުރެވުމާއި އަޅައިނުލުމުގެ މައްސަލަތައްވެސް ދަނީ އިތުރުވަމުންނެވެ.
ތިމާ އެންމެ ބޮޑަށް ކަމޭ ހިތަންޖެހޭނީ ކާކަށްތޯ ރަސޫލް (ﷺ) އަށް ދެންނެވުމުން ވިދިވިދިގެން 3 ފަހަރު އެންމެ ބޮޑަށް ހެޔޮކޮށް ހިތަން ޖެހޭނީ މަންމައަށް ކަމަށް ޙަދީޘް ކުރެއްވެވީ ސަބަބުތަކެއް ހުރުމުންނެވެ. 9 ވަސްދެން ބަނޑުގައި ބައްވައިގެން އުފުލިވޭނާއި ވިހެއުމުގައި އުފުލި ވޭނާއި އަދި ވިހެއުމަށްފަހު އުފުލި ވޭންތައް ފަދަ އެތައް ކަމެއްގެ ސަބަބުންނެވެ.  
ދުނިޔޭގެ ވެރިކަން ލިބުނު ނަމަވެސް މަންމަ ވާނީ މަންމައަށެވެ. މަންމައަށް ޙައްޤު މަޤާމް އަދާކުރަން ޖެހޭނެއެވެ. އެހެންކަމުން ބޮޑުވެ ތަޝައްރަފް ފުދުމުން ކުރާ ކަންކަމުގައިވެސް މަންމަގެ ޚިޔާލު ހޯދަންވާނެއެވެ! މަންމަގެ ހެޔޮ ދުޢާ ލިބިގަންނަންވާނެއެވެ! ކައިވެނި ކުރިނަމަވެސް މަންމައާއި މަޝްވަރާކޮށްލަން ވާނެއެވެ!  
ތިބާއަށް ދުނިޔެމަތީގައި ބައިވަރު އަނބިން ލިބިދާނެއެވެ. ނަމަވެސް ބައިވަރު މަންމައެއް ނުލިބޭނެއެވެ. ލިބޭނީ އެންމެ މަންމައެކެވެ. (ހަމަ އެފަދައިން ކިތަންމެ ގިނަ ފިރިން ވެސް ހޯދިދާނެއެވެ. ލިބޭނީ ހަމަ އެންމެ މަންމައެކެވެ.) ވީމާ ބާއްޖަވެރިކަން ލިބިގަތުމަށްޓަކައި މައިންނަށް ޙައްޤު މަޤާމް ދޭން ޖެހޭނެއެވެ.  
ބައަކު އޮޅުވައިލަން އޮޅުނު ނަމަވެސް އިސްލަމް ދީނުގައި އަންހެނުންނަށްވަނީ ވަރަށް މަތިވެރި މަޤާމެއް ދެވިފައެވެ. އަންހެނަކީ މައެކެވެ. އަންބެކެވެ. ދަރިއެކެވެ. މި 3 މަޤާމަކީވެސް އިސްލާމް ދީނުގައި ވަރަށް މަތިވެރި މަޤާމެއް ދެވިފައިވާ 3 މަޤާމެވެ. މި 3 މަޤާމަކީވެސް ފިރިހެނުންނަށްވުރެ މަތިވެރި މަޤާމެވެ.   
ﷲ ތަޢާލާގެ އެންގެވުންތަކަށްބަލާއިރު އަބަދުވެސް އައިސްފައި އޮންނާނީ ﷲ އަށް ކިޔަމަންތެރިވުމަށާއި ރަސޫލް (ﷺ)އަށް ތަބަޢަވުމަށެވެ. ނަމަވެސް ކީރިތި ޤްރްއާނުގެ 4 ތަނެއްގައި ބަޔާންވެގެންވާ 4 އާޔަތެއްގައި ވަނީ ﷲ ތަޢާލާއަށް އަޅުކަން ކުރުމަށާއި މައިން ބަފައިންނަށް ހެޔޮކޮށް ހިތުމަށެވެ. އެކަމުންވެސް އެނގެނީ މައިންބަފައިންނަށް ހެޔޮކޮށް ހިތުމުގެ މުހިންމުކަމެވެ.
 
- މަޢްލޫމާތު: ޝައިޚް އިލްޔާސް  ޙުސައިންގެ ދަރުސަކުން 
 
 
 
 
 
https://twitter.com/IMQuotes_Videos
OCT 21