އެކި ކުންފުނިތަކުން ޢުމްރާއަށް ދިއުމަށް އުޅުނު ފަރާތްތަކަށް ނުފުރިފައިވުމާއި، ޓްރާންސިޓްކޮޮށް ފުރަން އުޅުނު ބައެއް މީހުންގެ ފުލައިޓު ކެންސަލްވުމުގެ ސަބަބުން، ނުފުރި ތިބި މީހުންގެ ތެރެއިން އުމްރާއަށް ފުރަން ބޭނުންވެފައި 150 މީހަކު އެބަހުރި ކަމަށް، އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު މިރޭ ވިދާޅުވެއްޖެއެވެ. ޝަހީމް ވިދާޅުވީ، އެކި ސަބަބުތަކާ ހުރެ ޢުމްރާއަށް ނުފުރިފައި ތިބި ފަރާތްތަކަށް ފުރޭނެ ގޮތް ހޯދުމުގެ މަސައްކަތް، ގައުމީ އެއާލައިން މޯލްޑިވިއަނާއި، އިސްލާމިކް މިނިސްޓްރީއާއި، ޙައްޖު ކޯޕަރޭޝަން ގުޅިގެން ފަށާފައިވާ ކަމަށެވެ. "މި ވަގުތާ ހަމައަށް 150 މީހުން ފުރަން ބޭނުންވެފަ ތިބިކަން ވަނީ ފާހަގަކުރެވިފަ. ފްލައިޓް ޗާޓަރު ކުރެވޭނެ ގޮތް ވެއްޖެނަމަ މީގެ އިތުރުންވެސް ޖާގައެއް ހޯދަން ބޭނުންވާ ފަރާތްތަކަށް ޖާގަ ހުރި މިންވަރަކުން ދެވޭނެ ވާހަކަ ދަންނަވަން،" މީޑިއާ އާ ހިއްސާކުރެއްވި މެސެޖެއްގައި ޝަހީމް ވިދާޅުވިއެވެ. އޭނާ ވިދާޅުވީ، ޢުމްރާވެރިންނަށް ދިމާވެފައިވާ މިފަދަ ދަތިތައް ހައްލުކުރުމަށް މަސައްކަތްކުރަމުން އަންނަ ކަމަށެވެ. ފާހަގަކުރެވޭ ގޮތުގައި 'އަލް އަބްރާރު ޕްރައިވެޓް ލިމިޓެޑް' ގްރޫޕުން 110 މީހަކު ޢުމްރާއަށް ގެންދަން އިންތިޒާމުކުރި ދަތުރު، ފަހު ވަގުތު ކެންސަލްކުރި މައްސަލައިގައި އޭގެ ތެރެއިން 28 މީހަކަށް ސަޢޫދީ ޢަރަބިއްޔާއަށް ދެވޭނެ އިންތިޒާމު ޙައްޖު ކޯޕަރޭޝަނުންވަނީ އިއްޔެ ހަމަޖައްސައިދީފައެވެ. އެ މައްސަލައާ ގުޅޭ ގޮތުން 'ސަން'އާ ވާހަކަދެއްކި މީހަކު ބުނި ގޮތުގައި އެ ގްރޫޕާ އެކު 110 މީހުން އުމްރާއަށް ފުރަން ހަމަޖެހިފައި އޮތީ އަންގާރަ ދުވަހުގެރޭގައެވެ. އެ ދަތުރަށް ކޮންމެ މީހަކު ގާތްގަނޑަކަށް 45،000 ރުފިޔާ ދައްކައިފައިވަނިކޮށް، ފުރުން ކުއްލިއަކަށް ކެންސަލްކުރީ ކަމަށް އޭނާ ބުންޏެވެ. ފުލުހުންނާއި އިސްލާމިކް މިނިސްޓްރީން އަންނަނީ އެ މައްސަލަ ބަލަމުންނެވެ. 'އަލް އަބްރާރު ޕްރައިވެޓް ލިމިޓެޑް' ގްރޫޕުން ދަތުރު އިންތިޒާމުކުރި ގޮތާ ގުޅޭ ގޮތުން މި ނޫހަށް މައުލޫމާތު ދިން މީހާ ބުނި ގޮތުގައި، އޭނާގެ އާއިލާގެ މީހުން އުމްރާއަށް ފުރާތީ އެ ކަންތައްތައް ހަމަޖައްސަން އޭނާ އިސްކޮށް އުޅުނެވެ. އެގޮތުން، އަންގާރަ ދުވަހުގެ ހެނދުނު 10:00 އާއި 11:00 އާ ދޭތެރޭ އެއާޕޯޓަށް ފޮށިތައް ގެންދިޔުމަށް އެދުނު ކަމަށާއި ފުރަންދާން ތިބި އެންމެން ހޯމަ ދުވަހުގެ ރޭ ފޮށިތަންމަތި ބަރުކޮށް ނިންމި ކަމަށް އެ މީހާ ކިޔައިދިނެވެ. ކަން އެހެން އޮއްވައި ކުއްލިއަކަށް ގުޅައި، އަންގާރަ ދުވަހުގެރޭ ފުރަން ދާއިރު ފޮށިތައް ގެންދަން އެދުނު ކަމަށް އޭނާ ބުންޏެވެ. އެ ފަހުން ހަމަ އެ ދުވަހުގެ މެންދުރު ދޭއް ޖަހަނިކޮށް ގުޅައި، މީޓިންއެއް އޮތްކަން އަންގައި، ޢުމްރާއަށްދާ އެންމެން އެ މީޓިންއަށް ހާޒިރުވާން އެންގި ކަމަށް އޭނާ ބުންޏެވެ. ފުރުން ކެންސަލްކުރިކަން އެނގުނީ ވެސް އެ މީޓިންއަށް ދިޔުމުން ކަމަށް އެ މީހާ ބުންޏެވެ.