މިފެށޭ 2025 ވަނަ އަހަރު އިސްލާމީ ވުޒާރާގެ ދީނީ ހޭލުންތެރިކަން އިތުރުކުރުމުގެ ޕްލޭންގައި އެންމެ ބޮޑު އިސްކަމެއް ދެއްވާނީ ހުރިހާ ސަރަހައްދެއްގައިވެސް ހުރިހާ އުމުރުފުރައަށް އަމާޒުކޮށް ނަމާދު ކުރަން އަހުލުވެރިކުރުވުމަށާއި ނަމާދަށް ލޯބި ޖެއްސުމަށް ކަމަށް އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 
މިއީ ވަރަށް ބޮޑަށް އުފާކުރަންޖެހޭ ކަމެކެވެ. ސަބަބަކީ ބޮޑެތި މިސްކިތްތަކާއި އިސްލާމީ މަރުކަޒުތައް އެޅުނު ކަމުގައިވީނަމަވެސް އެކަމުގެ ފައިދާކުރާނީ ނަމާދުކުރާނެ ބައަކު ތިބެގެންކަމަށްވާތީއެވެ. މިހާރުގެ ޙާލަތަށް ބަލާއިރު ބައެއް އިސްލާމީ މަރުކަޒުތަކުގައި ފަތިސްނަމާދަށް 1 ސަފު ނުލިބޭކަން ނަމާދަށް އަރާ މީހުން ހިތާމައާއިއެކު ފާހަގަކުރެއެވެ. 
ނަމާދުކުރުމަށް ރައްޔިތުން ހޭލުންތެރިކުރުވަން އެކަށީގެންވާ ފެންވަރެއްގައި ރާއްޖޭގައި މަސައްކަތް ނުކުރެވޭތާ އަހަރުތަކެއް ފާއިތުވެގެންދިއައީއެވެ. ފެންނަމުން މިދަނީ އެކަމުގެ ނަތީޖާއެވެ. އެކަމަށް މަސައްކަތްކުރައްވަން ޑރ. ޝަހީމް ކުރިންވެސް މަސައްކަތް ކުރެއްވިކަން ފާހަގަކުރެވުނެވެ. ނަމަވެސް ދައުރު މެދުތެރެއިން އިސްތިޢުފާ ދެއްވަން ޖެހިވަޑައިގަތުމުން ކުރިއަށް ނުގެންދެވުނީއެވެ. ވީމާ މިދައުރުގައި މަސައްކަތް ކުރެއްވި ނަތީޖާ ނެރުއްވޭނެ ކަމުގެ އުންމީދު ބޮޑުކަން ފާހަގަކުރެވެއެވެ. 
އެންމެ ބޮޑު ސަބަބަކީ މިއަދުގެ ރައީސުލްޖުމްހޫރިއްޔާއަކީ ކުރިންސުރެ ނަމާދުކުރައްވާ ބޭފުޅަކަށް ވެވަޑައިގަތުމުގެ އިތުރުން އެމަނިކުފާނަކީ ކުރީގެ އެއްވެސް ރައީސަކު (މުޙައްމަދު އަމީންގެ ފަހުން) ބާރުއަޅުއްވަވާފައިނުވާވަރަށް ނަމާދުކުރުމަށް މިހާރުވެސް ބާރުއަޅުއްވަމުން ގެންދަވާ ބޭފުޅަކުކަން އެމަނިކުފާނުގެ ވާހަކަފުޅުތަކުން އެނގޭތީއެވެ. 
ﷲ ތަޢާލާގެ ދީނަށް ނަޞްރު ދިނުމަށް ކުރެވޭ މަސައްކަތްތަކުގައި ބަރަކާތް ލައްވަވާށި! އާމީން