ކ.ހުވަފެންފުށި ރިސޯޓު ކައިރީ އޮންނަ ފިނޮޅަކަށް ހުކުރު ދުވަހު ދަތުރު ގޮސް އުޅެނިކޮށް ގެއްލިގެން ހޯދަމުން އަންނަ ތަސްލީމު މުހައްމަދު އަދިވެސް ނުފެންނަ ކަމަށް އެމްއެންޑިއެފުން ބުނެފިއެވެ.
އެމްއެންޑީއެފް އިން މީޑިއާތަކަށް ބުނީ މ. އަސަރީ ހަނދާން، ތަސްލީމު، 43، ހޯދަންމިހާތަނަށް ބޮޑު ސަރަހައްދެއް ބަލާފައިވާ ކަމަށެވެ.
ނަމަވެސް އޭނާ ގެއްލުނީ މޫދަށްކަން ވެސް ކަށަވަރު ނުވާ ކަމަށެވެ.
އެމްއެންޑީއެފުން ބުނި ގޮތުގައި ތަސްލީމު ހޯދުމުގެ މަސައްކަތުން މިހާތަނަށް އޭނާ ދަތުރު ދިޔަ ފިނޮޅު ވަށައިގެން 5،000 އަކަފޫޓުގެ ސަރަހައްދެއް ސްނޯކަލްކޮށްގެން ބަލާފައިވާ ކަމަށެވެ.
އަދި 3،000 އަކަފޫޓު ކަނޑުއަޑިން ޑައިވްކޮށްގެން ބަލާފައިވާ ކަމަށް ވެސް މައުލޫމާތު ދިނެވެ.
ފުލުހުން ބުނެފައިވާ ގޮތުގައި ތަސްލީމު އެންމެ ފަހުން ފެނިފައި ވަނީ ހުކުރު ދުވަހު ހެނދުނު 10:00-11:00 ހާއިރު ކަމަށް އޭނާއާ އެކު ދަތުރު ދިޔަ މީހުން މައުލޫމާތު ދީފައިވާ ކަމަށެވެ. އޭނާ ހޯދުމުގެ މަސައްކަތުގައި މިހާރު އެންމެ އިސްކޮށް ހަރަކާތްތެރި ވަނީ ފުލުހުންނެވެ.