ރައްޔިތުން މަޖިލީހުގެ ޕީޕީއެމްއަށް ނިސްބަތްވާ ގުރައިދޫ ދާއިރާގެ މެމްބަރު އިބްރާހިމް ރިޒާގެ ލޯފާމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން 2.9 މިލިއަން ރުފިޔާ ދެއްކި ކަމަށް ބުނާ ލިޔެ ކިޔުންތަކެއް ލީކް ކޮށްލި ކަމުގެ ތުހުމަތުގައި އެމްޕީއެލްގެ އެންމެ އިސް ގާނޫނީ ވަކީލު ހާމިދު އަހްމަދު ގެއަށް ފޮނުވާލައިފި އެވެ.
ހާމިދު ގެއަށް ފޮނުވާލި މައްސަލާގައި ވީނިއުސްއިން ދެންނެވި ސުވާލަކަށް ޖަވާބު ދެއްވަމުން އެމްޕީއެލްގެ ސީއީއޯ މުހައްމަދު ޖުނައިދު ވިދާޅުވީ ތަނުގައި ހެދިފައިވާ ގަވާއިދު ތަކާއި އުސޫލުތަކާއި އެއްގޮތަށް އަމަލުނުކުރާ މުވައްޒަފުން ގެއަށް ފޮނުވާލަން ޖެހޭނަމަ އެ މުވައްޒަފެއް ގެއަށް ފޮނުވާލާނެ ކަމަށެވެ. ނަމަވެސް އެމްޕީއެލްގެ ވަކީލް ހާމިދު ސަސްޕެންޑް ކޮށްފައިވާ ކަމަށް ދެކެވޭ ވާހަކަތައް ޖުނައިދު ދޮގުކުރެ އެވެ.
މައުލޫމާތު ލިބިފައިވާ ގޮތުގައި އޭނާ ފޮނުވާލާފައިވަނީ ވަކި އެއްޗެއް އަންގަންދެން ގޭގައި މަޑު ކޮށްލުމަށް ބުނެ މިދިޔަ ހަފްތާގެ ތެރޭގަ އެވެ.
ޓަގް ބޯޓެއް ބަނުމަށް އެމްޕީއެލް އިން ސެންޓަ އެންޓަ ޕްރައިޒަސްއާ ހަވާލުކުރި މަޝްރޫއާއި ގުޅިގެން އުފެދުނު މައްސަލަތަކުގައި ސިވިލް ކޯޓަށް ހުށަހެޅި މައްސަލާގައި ވަކާލާތު ކުރި ކަމުގެ ފީގެ ގޮތުގައި މެމްބަރު ރިޒާގެ ލޯފާމަށް ފައިސާ ދީފައިވަނީ ގަވާއިދާ އެއްގޮތަށް ކަމަށް ޖުނައިދު ވަނީ މީގެ ކުރިން ވިދާޅުވެފަ އެވެ.
މިމައްސަލާގައި ގާނޫނީ ފީއަށް އެމްޕީއެލް އިން ވަނީ 2.9 މިލިއަން ރުފިޔާ މެމްބަރު ރިޒާގެ ލޯފާމަށް ދީފަ އެވެ.