ފުލުހުންގެ ތާރީޚާއި ބެހޭ މައުލޫމާތު ހޯދުމަށް އަމީނިއްޔާ ސްކޫލާއި ވިލާ އިންޓަނޭޝަނަލް ހައި ސްކޫލުގެ ދަރިވަރުން ޕޮލިސް މިއުޒިއަމަށް ޒިޔާރަތްކޮށްފި އެވެ.
ފުލުހުން ބުނީ މި މަހުގެ 18 އިން 24 އަށް އެކި ދުވަސް މަތިން އަމީނިއްޔާ ސްކޫލުގެ ގްރޭޑް 8 ގައި ތައުލީމު ހާސިލްކުރަމުންދާ 164 ދަރިވަރަކު ޒިޔާރަތްކޮށްފައިވާއިރު މި މަހުގެ 21 ވަނަ ދުވަހު ވިލާ އިންޓަނޭޝަނަލް ހައި ސްކޫލުގެ ގްރޭޑް 12 ގައި ތައުލީމު ހާސިލްކުރަމުންދާ 28 ދަރިވަރަކު ޒިޔާރަތްކޮށްފައިވާ ކަމަށެވެ.
ފުލުހުން ބުނީ މި ދަރިވަރުން ޕޮލިސް މިއުޒިއަމަށް ކުރި ޒިޔާރަތުގައި ވަނީ އެކި ދުވަސްވަރު ފުލުހުން ބޭނުންކޮށްފައިވާ ޔުނީފޯމާއި ބޭނުންކުރި ވަސީލަތްތަކާއި ބެހޭގޮތުން ފުލުހުންނާ ގުޅޭ ތާރީހީ ގިނަ މައުލޫމާތުތަކެއް ދީފައިވާ ކަމަށެވެ. މީގެއިތުރުން ކުށްމަދުކުރުމަށް ތަފާތު މައުލޫމާތުތައް ހިިމެނޭ ލީފްލެޓްތައް ދީފައިވާއިރު މި ޒިޔާރަތުގައި ބައިވެރިވި ދަރިވަރުންނަށް ވަނީ ހަނގާކުރުން ފަދަ ނޭދެވޭ އަމަލުތައް ހުއްޓުވުމަށް ބާރުއެޅުމުގެ ގޮތުން ހަނގާކުރުމުގެ ހާދިސާއަކާއި ގުޅޭ ވީޑިއޯ ޕްރެޒެންޓޭޝަނެއް ދައްކާލާފަ އެވެ. އަދި މިފަދަ އަމަލުތަކުން ދުރުވެ ތިބުމަށް ކުރެވިދާނެ ކަންކަމާއި ގުޅޭގޮތުންނާއި މިފަދަ އަމަލުތައް ހުއްޓުވުމަށް ކުރެވިދާނެ ކަންކަމާއި ގުޅޭގޮތުންވެސް މައުލޫމާތު ދީފައިވާ ކަމަށް ފުލުހުން ބުނެ އެވެ.
ފުލުހުންގެ ތާރީހާއި ބެހޭ މައުލޫމާތު ހޯދުމަށް އެކި ސްކޫލުތަކުންނާއި އާއްމު ރައްޔިތުންގެ އިތުރުން ފަތުރުވެރިންނާއި ބޭރުގެ އިއްޒަތްތެރިން ޒިޔާރަތްކުރާއިރު ޕޮލިސް މިއުޒިއަމަކީ ފުލުހުންގެ ތާރީހާއި ސަގާފަތް އަންނަން އޮތްޖީލުތަކަށް ވާސިލްކޮށްދިނުމުގެ ގޮތުން 29 މާޗް 2013 ވަނަ ދުވަހު ހުޅުވި ސެންޓަރެކެވެ. ޕޮލިސް މިއުޒިއަމް ހުޅުވިފައި ހުންނަނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 10:00 އިން ފެށިގެން ހަވީރު 16:00 އަށެވެ. ޕޮލިސް މިއުޒިއަމް ގާއިމްކުރެވިފައިވާ ގައުމީ ދާރުލްއާސާރުގަ އެވެ.