ހޯމް މިނިސްޓަރު އުމަރު ނަސީރު ބަންދުގައި ބަހައްޓައިގެން ކްރިމިނަލް ކޯޓަށް ހާޒިރުކުރުމަށް ފުލުހުންގެ މައްޗަށް ނެރެފައިވާ އަމުރު އިސްތިއުނާފު ކުރުމަށް ހައި ކޯޓަށް ހުށަހަޅާފައިވާ މައްސަލަ ބަލައިގަނެވެން ނެތް ކަމަށް އެ ކޯޓުން މިއަދު ނިންމައިފި އެވެ. ހައި ކޯޓުގެ މީޑިއާ އޮފިޝަލް އަމީން ފައިސަލް ވިދާޅުވީ މައްސަލަ ބަލައި ނުގަންނަން ނިންމީ ޝަރީއަތް ހިންގުމުގެ ބޭނުމަށް ކޯޓަށް ހާޒިރުކުރުމުގެ އަމުރުތަކަކީ ގާނޫނުއަސާސީގެ 56 ވަނަ މާއްދާގައި ބުނާ ހުކުމެއް ނުވަތަ އަމުރެއް ކަމަށް ނުބެލެވޭނެ ކަމަށް ހައި ކޯޓުން ކުރިން ކަނޑައަޅާފައިވާތީ، އެފަދަ އަމުރެއް އިސްތިއުނާފް ނުކުރެވޭނެތީ ކަމަށެވެ. މިދިޔަ ބުރާސްފަތި ދުވަހު ނެރުނު އެ އަމުރުގެ އިސްތިއުނާފުކުރުމަށް އުމަރު ހުށަހެޅީ އިއްޔެ އެވެ. އުމަރު ބަންދުގައި ބަހައްޓައިގެން ކޯޓަށް ހާޒިރުކުރުމަށް އަމުރު ނެރުނީ ރަސްމީ ދަތުރުފުޅެއްގައި އޭނާ ނެދަލެންޑްސްގައި ހުންނަވަނިކޮށެވެ. އުމަރު ނެދަލެންޑްސް އަށް ވަޑައިގަތީ، ރާއްޖެ އަށް އެތެރެކުރާ މަސްތުވާތަކެތި ދެނެގަތުމަށް ބޭނުންވާ ކުއްތާ ހޯދުމުގެ އެންމެ ފަހުގެ ނިންމުންތައް ނިންމުމަށް ކަމަށް ހޯމް މިނިސްޓްރީން ވަނީ ބުނެފަ އެވެ. އެ ދަތުރުފުޅަށް ފަހު އޭނާ ރާއްޖެ ވަޑައިގަންނަވާނީ މިއަދު އެވެ. އުމަރުގެ މައްޗަށް ދައުލަތުން ދައުވާ ކުރަނީ ކުރީގެ ރައީސް މުހައްމަދު ނަޝީދުގެ ސަރުކާރުގެ ދުވަސްވަރު، އޭރުގެ އިދިކޮޅު ފަރާތްތަކުން ކުރި މުޒާހަރާއެއްގައި ދައުލަތުގެ އަމާންކަމަށް ގެއްލުން ލިބިދާނެ ފަދަ ވާހަކަ ދެއްކެވި ކަމަށް ބުނެ އެވެ. އެ ދައުވާއަށް އޭނާ އިންކާރު ކުރައްވަ އެވެ. މި މައްސަލާގައި މިދިޔަ އަންގާރަ ދުވަހާއި ބުރާސްފަތި ދުވަހު ބާއްވަން ހަމަޖެއްސި ޝަރީއަތް ވަނީ ކެންސަލްކޮށްފަ އެވެ. އަންގާރަ ދުވަހުގެ އަޑުއެހުން ކެންސަލްކުރީ އުމަރު ކޯޓަށް ވަޑައިނުގަތުމުންނެވެ. އޭރު އޭނާ ހުންނެވީ ނެދަލެންޑްސްގަ އެވެ. ބުރާސްފަތި ދުވަހުގެ ޝަރީއަތް ކެންސަލްކުރި ސަބަބު ސާފެއް ނުވެ އެވެ.