މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)ން ހއ. އުލިގަމުގައި ހަދާ ސިޓީ ހޮޓަލުގައި ބަނގުރާ ވިއްކޭ ގޮތަށް އިންވެސްޓްކުރާނެ ފަރާތެއް ލިބިފައިވާ ކަމަށް އެ ރަށު ކައުންސިލުން މިއަދު ބުނެފި އެވެ. ކައުންސިލްގެ ރައީސް އިމާދު އަބްދުﷲ ވިދާޅުވީ އުލިގަމުގައި ހަދާ ސިޓީ ހޮޓަލާ ބެހޭ ގޮތުން އިންވެސްޓަރާއި އެމްޓީޑީސީއާ އެކު އިއްޔެ ފޯން ކޮންފަރެންސެއް ބާއްވާފައިވާ ކަމަށާއި ޓޫރިސްޓުންނަށް ބަނގުރާ ވިއްކޭ ނަމަ، ކުރިއަށް އޮތް ހަފުތާއެއްހާ ދުވަހުގެ ތެރޭގައި އަމަލީ މަސައްކަތް ފަށަން ވެސް އިންވެސްޓަރުން ތައްޔާރަށް ތިބިކަން އަންގާފައިވާ ކަމަށެވެ. ނަމަވެސް އެއީ ކޮން ފަރާތެއް ކަމެއް އޭނާ ވިދާޅެއްނުވެ އެވެ. "ކޮންފަރެންސްގައި އަޅުގަނޑުމެންގެ ކިބައިން އެދިފައިވަނީ ބަނގުރާ ވިއްކުމުގައި އެއްވެސް އިއުތިރާޒެއް އޮތްތޯ އާއި އެކަމަށް ސަރުކާރުގެ އިދާރާތަކުން ކުރަން ޖެހޭ މަސައްކަތްތައް ކޮށްދިނުމުގައި އެހީތެރަކަން ފޯރުކޮށްދިނުމަށް،" އިމާދު ވިދާޅުވި އެވެ. އެމްޓީޑީސީގެ މެނޭޖިން ޑިރެކްޓަރު މުހައްމަދު މަތީނު ވިދާޅުވީ ކުރިއަށް ދެވޭނެ ގޮތްތަކާ ބެހޭ ގޮތުން އުލިގަމު ކައުންސިލާ އެކު މަޝްވަރާތަކެއް ބާއްވާފައިވާ ކަމަށާއި ނަމަވެސް އެކަމާ ބެހޭ ތަފުސީލު ދެވެން ނެތް ކަމަށެވެ. އޭނާ ވިދާޅުވި ގޮތުގައި އިންވެސްޓްކުރާނެ ގިނަ ފަރާތްތަކެއް ލިބުނު ނަމަވެސް އެކަމައިގެން ކުރިއަށް ނުދެވި އޮތީހުރަސްތަކެއް ހުރުމުންނެވެ. ނަމަވެސް އެއީ ކޮން ހުރަސްތަކެއް ކަމެއް އޭނާ ވިދާޅެއްނުވެ އެވެ. އިމާދު ވިދާޅުވީ ބަނގުރާ ވިއްކޭ ގޮތަށް ސިޓީ ހޮޓާ ހިންގަން ތަފާތު ގިނަ ހިޔާލުތަކެއް ހުށަހެޅި ކަމަށެވެ. އެ ގޮތުން ފަޅުގައި ބާއެއް ހަދައި އެ ތަނަށް ފާލަމެއް އަޅައިގެން ދެވޭ ގޮތަށް ހެދުމާއި ފަޅުގައި ސަފާރީއެއް ބާއްވައިގެން ޓޫރިސްޓުންނަށް ރާ ވިއްކުން ފަދަ ހިޔާލުތައް ވެސް ހުށަހެޅި ކަމަށް އޭނާ ވިދާޅުވި އެވެ. އެކަމަކު މީހުން އުޅޭ ރަށްރަށުގައި ބަނގުރާ ވިއްކާކަށް ރާއްޖޭގެ ގާނޫނުތަކުން ހުއްދައެއް ނުކުރެ އެވެ. އެކަން ހުއްދަކުރަން އުޅުމުން ކުރީ ސަރުކާރާ ދެކޮޅަށް ވަރަށް ބޮޑު މުޒާހަރާއެއް ވެސް ބޭއްވި އެވެ. އުލިގަމުގައި ސިޓީ ހޮޓަލެއް އެޅުމުގެ މަސައްކަތް އެމްޓީޑީސީން ފެށީ 2007 ވަނަ އަހަރު އެވެ. ނަމަވެސް 96 މިލިއަނެއްހާ ރުފިޔާ ހޭދަކޮށްފައިވަނިކޮށް ތަފާތު އެތައް މައްސަލަތަކަކާ ހުރެ މަސައްކަތް ވަނީ ހުއްޓިފަ އެވެ.