ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ރިޔާސީ ކެންޑިޑޭޓަށް ހޮއްވަވައިފިނަމަ ކުރީގެ ރައީސް މުހައްމަދު ނަޝީދު ސިއްސައިގެންދާވަރުގެ ކޯލިޝަނެއް ހަދާ މިގައުމުގެ ވެރިކަމަށް އަންނާނެ ކަމަށް ޕީޕީއެމްގެ އިންތިގާލީ ނައިބު ރައީސްކަން ކުރެއްވި އުމަރު ނަސީރު ރޭ ވިދާޅުވެއްޖެ އެވެ.
ޓީމް އުމަރުގެ ފަރާތުން އާޓިފިޝަލް ބީޗުގައި ރޭ ބޭއްވި ޖަލްސާގައި ވާހަކަދައްކަވަމުން އުމަރު ނަސީރު ވިދާޅުވީ އަންނަ ރިޔާސީ އިންތިހާބުގައި އެމްޑީޕީ ބަލިކުރުމަށްޓަކައި އެހެން ޕާޓީތަކުގެ އެހީތެރިކަން ޕީޕީއެމްއަށް ބޭނުންވާ ކަމަށާއި އެމްޑީޕީ ބަލިކުރަން އެދޭނަމަ ފުޅާ ކޯލިޝަނެއް ބޭނުންވާނެ ކަމަށެވެ.
"އަޅުގަނޑުމެންނަށް ބޭނުންވޭ ގާސިމް އިބްރާހިމް، އަޅުގަނޑުމެންނަށް ބޭނުންވޭ އަދާލަތު ޕާޓީ، އަޅުގަނޑުމެންނަށް ބޭނުންވޭ ގައުމީ ޕާޓީ، އަޅުގަނޑުމެންނަށް ބޭނުންވޭ ޑރ.ވަހީދު، އަޅުގަނޑަށް ބޭނުންވޭ އެހެން ޕާޓީތައް ވެސް، އެއްވެސް ޝައްކެތް ނެތް ޕީޕީއެމްއަކީ ބޮޑު ޕާޓީއެއް، އެހެންނަމަވެސް އެމްޑީޕީ ބަލިކުރަން އެދޭނަމަ ފުޅާ ކޯލިޝަނެއް އަޅުގަނޑުމެން ބޭނުންވޭ." އުމަރު ނަސީރު ވިދާޅުވި އެވެ.
ޕީޕީއެމް ބޮޑުވުމަކީ އެކަމާއި މެދު ބޮޑާވާންޖެހޭ ސަބަބެއް ނޫން ކަމަށާއި ނަމަވެސް އެއީ ޕީޕީއެމްގެ ޒިންމާ ބޮޑުވާ ކަމެއް ކަމަށެވެ. އަދި އެހެނިހެން ޕާޓީތަކާއި ދިމާލަށް އަތް ދިއްކޮށް އެކުވެރިކަމުގެ ރޫހު އާލާކުރުމުގެ ހިތްވަރު ހުންނަން ޖެހޭނެ ކަމަށް ވެސް އުމަރު ނަސީރު ރޭ ވިދާޅުވި އެވެ.
"އެހެން ޕާޓީތަކާއި އެކުވެރިކަން ގާއިމުކުރުމަށް އަޅުގަނޑުމެން ނިކުންނަންޖެހޭ ސަބަބަކީ އަޅުގަނޑުމެން ބޮޑުވީމަ، އަޅުގަނޑުމެންގެ ޒިންމާ ބޮޑުވީމަ، މުޅި ގައުމުގެ މަސްލަހަތު އަޅުގަނޑުމެން ކޮނޑުގައި އެޅޭތީ، އަޅުގަނޑުމެންނަށް ޖެހެނީ އެހެން ޕާޓީތަކާއިއެކު ކޯލިޝަން ހެދުމަށްޓަކައި އެމީހުންނާއި ދިމާލަށް އަތް ދިއްކުރުން. އަޅުގަނޑޫމެން އެހެން ޕާޓީތަކާއި ދިމާލަށް އަތް ދިއްކުރުން އެއީ އަޅުގަނޑުމެން ކުޑަވުމެއް ނޫން، ނިކަމެތިވުމެއް ނޫން،" އުމަރު ވިދާޅުވި އެވެ.
އޭނާ ވިދާޅުވީ އެހެން ޕާޓީތަކަށް ނިކަމެތި ބަސް ބުނުމާއި އެހެން ޕާޓީތަކުގެ ހައިބަތު ކުޑަކުރުމަށް މަސައްކަތްކުރުމަށްވުރެން ފައިދާ ބޮޑީ އެންމެން އެކުގައި ދަތުރުކުރަން ބާރު އެޅުން ކަމަށާއި 2008 ވަނަ އަހަރުގެ ރިޔާސީ އިންތިހާބުގެ ދެވަނަ ބުރުން ޑީއާރުޕީ ހޯދި ތަޖުރިބާ ހަދާން ކޮށްލަން ޖެހޭ ކަމަށެވެ.
2008 ވަނަ އަހަރު ޑީއާރްޕީން ހެދި މިސްޓޭކް އޭނާގެ ލީޑާޝިޕްގައި ނުހަދާނެ ކަމަށާއި އެމްޑީޕީ އާއި ނަޝީދު ބަލި ކުރަން އެކަނިމާއެކަނި ގޮސް ވެއްޓި ވެލި ކާން ދޫނުކުރާނެ ކަމަށް ވެސް އުމަރު ވިދާޅުވި އެވެ.