އިޒްރާއީލުން ޣައްޒާއަށް ހަމަލާ ދިނުން މިއަދު އިޒްރާއީލްގެ ގަޑިން ހެނދުނު 08:30 (މާލޭ ގަޑިން ހެނދުނު 11:30) އެއްބަސްވެފައި އޮތްނަމަވެސް އެއެއްބަސްވުމަށް އަމަލު ނުކޮށް ހަމަލާތައް ކުރިއަށް ގެންދަން އިޒްރާއީލްގެ ބޮޑުވަޒީރު ބެންޖަމިން ނަތަންޔާހޫ އަމުރުކޮށްފިއެވެ.
ހަމަލާތައް ކުރިއަށް ގެންދަން ނަތަންޔާހޫ ދައްކާ އުޒުރަކީ ހަމާސް ޖަމާއަތުން މިއަދު މިނިވަން ކުރާނެ ރަހީނުންގެ ނަންތައް ހިމެނޭ ލިސްޓް ސުލްހައިގެ ވާހަކަތަކުގައި މެދުވެރިންގެ ދައުރު އަދާކުރާ މިސްރާއި ޤަތަރު މެދުވެރިކޮށް އިޒްރާއީލަށް ފޯރުކޮށް ނުދިނުނެވެ. ހަމާސް ޖަމާއަތުން ބުނާ ގޮތުގައި މިނިވަން ކުރާނެ ރަހީނުންގެ ލިސްޓް ދިނުން ލަސްވަމުން ދަނީ ޓެކްނިކަލް މައްސަލައެއް ދިމާވެގެންނެވެ.
ނަތަންޔާހޫގެ އަމުރަށް ހަމަލާތައް އަދިވެސް ކުރިއަށް ގެންދާއިރު ހަމަލާތައް ހުއްޓާލަން އެއްބަސްވެފައި އޮތް ގަޑި ޖެހުނު ފަހުން އިޒްރާއީލުން ޣައްޒާއަށް ދިން ހަމަލާއެއްގައި މިހާރު ވެސް ވަނީ އަށް މީހަކު ޝަހީދުވެ އެތައް ބަޔަކު ޒަހަމްވެފައެވެ. ޒަހަމްވި މީހުންގެ އަދަދު 25 އަށްވުރެ ގިނަ ކަމަށް ރިޕޯޓްތައް ބުނެއެވެ.
ތަޖުރިބާކާރުން ބުނާ ގޮތުގައި މިނިވަން ކުރާ ރަހީނުންގެ ލިސްޓް ދިނުމަށް ހަމާސްއަށް ދަތިތައް ކުރިމަތިވެފައި ވަނީ ހަމާސްގެ ކޮމިއުނިކޭޝަން ނެޓްވޯކްތައް ބޭނުންކޮށް އިޒްރާއީލަށް ސިއްރުން މުއާމަލާތްތައް ކުރަން ޖެހިފައި ވާތީއެވެ. ތިން ފިޔަވައްސަކަށް ބަހާލައިގެން ރަހީނުން މިނިވަންކުރަން ނިންމާފައި ވާއިރު މިއަދު މައުލޫމާތު ހާމަކުރުމުގައި އަމަލު ކުރެވޭ ގޮތަކުން ބާކީ ތިބި ރަހީނުން ތިބި ސަރަހައްދުތައް އިޒްރާއީލަށް ހާމަވެ ހަމާސްގެ އަތުން ރަހީނުން މިނިވަން ކުރަން އިޒްރާއީލުން ހަމަލާތަކެއް ވެސް ދިނުން އެކށީގެންވާތީ އެފަދަ ކަންކަމަށް ހަމާސް އިން ވިސްނާނެ ކަމަށް ތަޖުރިބާކާރުން ބުނެއެވެ.
މިނިވަން ކުރާ ރަހީނުންގެ ލިސްޓް ދިނުމުގައި ލަސްތަކެއް ކުރިމަތިވެފައި ވީނަމަވެސް ލިސްޓް ދިނުމުގެ މަސައްކަތް ކުރަމުން ގެންދާ ކަމަށް ހަމާސް އިން ބުނެއެވެ.
އެއްބަސްވެފައި އޮތް ވަގުތައް ހަމަލާތައް ހުއްޓައި ނުލެވުމުން ހަމަލާތައް ހުއްޓާލުމުގެ އެއްބަސްވުން ފެއިލް ވެދާނެ ކަމުގެ ބިރު ވެސް މިހާރު ވަނީ ކުރިމަތިވެފައެވެ. މިމައްސަލައަށް ހައްލެއް ގެނައުމަށް ޤަތަރާއި މިސްރުގެ ޑިޕްލޮމެޓުން މަސައްކަތް ކުރަމުން ގެންދާ ކަމަށް މީޑިއާ ރިޕޯޓްތައް ބުނެއެވެ.