އެންސްޕާއިން ރައްޔިތުންގެ ފައިސާއިން ވައްކަންކޮށް މުއިއްޒު ޓީވީ އަށް 2 ބުރި ލިބޭނޭހެން ހެދި އެއްބަސްވުން، މުއިއްޒުގެ ޓީވީ ހިންގާ ކުންފުނިން އުވާލަން ބޭނުންވާ ކަމަށް އާސަންދައިން ހާމަ ކޮށްފިއެވެ.
އާސަންދައިން ނެރެފައިވާ ބަޔާނުގައި ކަންބޮޑުވެފައިވަނީ، މުއިއްޒުގެ ޓީވީއަށް މިކަމުގެ ސަބަބުން ލިބޭ ގެއްލުމަށެވެ. އަދި މި ބަދަލު ގެންނަން ނިންމާފައިވަނީ އެހެންވެ ކަމަށް އެ ނޫސް ބަޔާނުގައި ވެއެވެ.
މީގެ ކުރިން، މިކަން ފޮރުވުމަށް އެންސްޕާއިން ހާމަ ކޮށްފައިވަނީ އެތަނުން އެކަން ކޮށްފައިވަނީ ރަނގަޅަށް ކަމަށާއި، އަދި އޭސީސީއަށް މައްސަލަ ހުށައަޅާފައިވާ ކަމަށެވެ. ރައްޔިތުންގެ ފައިސާއިން ރައީސް މުއިއްޒުގެ ޓީވީ ހެދުމަށް އެމަނިކުފާނު ކުރެއްވި ވައްކަމެއް އެންސްޕާއިން މި މޭރުމުން ދިފާޢު ކުރިއިރު، އެންސްޕާއިން ދޭ ފަރުވާ ލޯނެއް ގޮތުގައި ދިނުމަށް ސަރުކާރުން ވަނީ ނިންމާފައެވެ. މީގެ އިތުރުން ދާދި ފަހުން ޕީއެންސީ އެކްޓިވިސްޓެގެ މައިދައިތަ ކެންސަރަށް ބޭނުންވާ ފަރުވާއަށް ބޭނުންވާ މިންވަރަށް ފައިސާ ނުދީ ވަނީ ހިފަހައްޓާފައެވެ. އަދި އެންސްޕާއިން ފަރުވާ ބޭނުންވާ އެތައް ފަރާތެއް އެކަމުން މަހުރޫމުކޮށް، 5 އަހަރު ދުވަހަށް މުއިއްޒުގެ ޓީވީ ސްޓޭޝަން އަށް 2 ބުރި ދިނުމަށް އެންސްޕާއިން ވަނީ 4 ބުރީގެ އަގުގައި މުއިއްޒު ޓީވީ އަތުން އެ އިމާރާތް ހިފާފައެވެ.
ރައްޔިތުންގެ ފައިސާއިން ރައީސް މުއިއްޒު ވައްކަން ކުރަމުންދަނީ އެއްވެސް ހައްދެއް ނެތިއެވެ. ސަރުކާރުގެ ހުރިހާ ކުންފުނިތަކަކުން ރައީސް މުއިއްޒު ދަނީ އިންތިހާއަށް ވައްކަން ކުރަމުންނެވެ. އަދި ފާއިތުވި އަހަރުގެ ދައުލަތުގެ ބަޖެޓުން ވައްކަން ކުރުމަށްފަހު، ބަޖެޓުން ހަރަދު ކޮށްފައިވާ ގޮތް، އަދިވެސް ހާމަ ކޮށްފައި ނުވެއެވެ.
މި އެއްބަސްވުން އުވާލާއިރު، މި އެއްބަސްވުން ދެމިއޮތް މުއްދަތުގައި ދައުލަތަށް ލިބިފައިވާ ގެއްލުމަށް ރައީސް މުއިއްޒު ޒިންމާ ނަގާފައި ނުވެއެވެ. އަދި އެކަމުގެ ސަބަބުން އުނިވެފައިވާ ބޭސް ފަރުވާގެ ސަބަބުން ފަރުވާގެ ނިޒާމަށްވެސް ވަނީ ބޮޑެތި ގެއްލުންތަކެއް ލިބިފައެވެ. މިއިން އެއްވެސް ކަމަކަށް ޒިންމާވާނެ ބަޔަކު މިއަދު ނެތެވެ. އަދި މި އެއްބަސްވުން އުވާލިނަމަވެސް، ސަރުކާރު ކުންފުނިތަކާއި، އެންސްޕާއާއި، މިނިސްޓްރީ ތަކުގެ މުއައްޒަފުން ދަނީ އެމީހުންގެ ރަސްމީ މަސައްކަތުގެ ވަގުތުގައި މުއިއްޒަށް ޓީވީ ހިންގާ ދެމުންނެވެ.