ކާރެއްގެ ތެރޭގައި ދިވެއްސަކު ރަހީނުކުރި މައްސަލައިގައި ހައްޔަރުކުރި މީހުންގެ ބަންދަށް 7 ދުވަސް ކޯޓުން ޖަހައިފިއެވެ.
މިމަހުގެ 11 ވަނަ ދުވަހުގެ ރޭ ކާރެއްގެ ތެރޭގައި ދިވެހި ފިރިހެނަކު ރަހީނުކުރުމުގެ މައްސަލައިގައި ދިވެހި ފުލުހުންގެ ޚިދުމަތުން ވަނީ ދިވެހި 5 ފިރިހެނަކު ހައްޔަރުކޮށްފައެވެ.
ހުޅުމާލޭ އޯކިޑްމާ ހިނގުމުގައި ކާރެއް ތެރޭގައި ދިވެހި ފިރިހެނަކު ރަހީނުކޮށް ހިފަހައްޓައި އަނިޔާކޮށް ބިރުދައްކާ އަދި އެމީހާގެ ޢާއިލާ މީހުންނަށް ގުޅައި ފައިސާއަށް ޑިމާންޑުކުރި މައްސަލައާ ގުޅިގެން ފުލުހުން ހައްޔަރުކޮށްފައިވަނީ މާލޭ / ދަފްތަރު ނަންބަރު އާރުއެސް 9022، ޠޮލާލް މޫސާއެވެ. އަދި އޭނާއާއެކު ހާދިސާ ހިނގިތަނުން އިތުރު 4 ފިރިހެނަކު ހައްޔަރުކޮށްފައިވެއެވެ.
އެމީހުންނަކީ ހދ. ކުމުންދޫ/ ރަތްބަގީޗާގެ، ހުސާމް އިބްރާހިމާއި މާލެ/ ގ.ކަޅަގާރިމާގެ، ޙުސައިން ހައިކަލް ނިޔާޒާއި ހދ. ކުމުންދޫ/ ރަތްބަގީޗާގެ، އާދަމް ޝަރީފާއި ހުޅުމާލެ/ ފްލެޓް ނަންބަރ 4-1-71، އަޙްމަދު ރިޝްފާނެވެ.
ދިވެހި ފުލުހުންގެ ޚިދުމަތުން ވިދާޅުވީ މި މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ހުޅުމާލޭ މެޖިސްޓްރޭޓް ކޯޓަށް ހާޒިރުކުރުމުން އެންމެންވެސް 7 ދުވަހަށް ބަންދުކުރުމަށް އަމުރުކޮށްފައިވާ ކަމަށެވެ. މި މައްސަލަ ފުލުހުން ދަނީ ތަޙުޤީޤުކުރަމުންނެވެ.
މީގެ އިތުރުން މިމަހުގެ 7 ވަނަ ދުވަހު ހިޔާ ޓަވަރުގެ އެޕާޓްމަންޓެއްގެ ތެރޭގައި ދިވެހި ފިރިހެނަކު ރަހީނުކުރި މައްސަލައެއްގައި 12 މީހަކުވަނީ ހައްޔަރުކޮށްފައެވެ.