ރަސޫލް ޞައްލަﷲ ޢަލައިހި ވަސައްލަމަ އެންމެ ބޮޑަށް ސަމާލުކަންދެއްވެވި ސުންނަތް ނަމާދަކީ ފަތިސްނަމާދުގެ ކުރިން ކުރާ ސުންނަތް 2 ރަކްޢަތެވެ. ފަތިސްނަމާދުގެ ސުންނަތް 2 ރަކްޢަތެވެ. އެކަން ޢައިޝަތުގެފާނުގެ ބަސްފުޅުން ޘާބިތުވެއެވެ.  
މިހެން ބުނުމުން ކޮސްފާނެ ސުވާލަކީ ދަމުނަމާދަށްވުރެވެސް މުހިންމީ ހެއްޔެވެ؟ ޖަވާބަކީ ދަމުނަމާދަކީ އަހުރެމެންގެ މައްޗަށް އޮތް ސުންނަތް ނަމާދެއްނަމަވެސް ރަސޫލް ޞައްލަﷲ ޢަލައިހި ވަސައްލަމަ އަށް ދަމުނަމާދަކީ ފަރުޟު ނަމާދެއް ކަމެވެ. ވީމާ މައްސަލަ ތަފާތުވަނީއެވެ.  
ދެން އޮތީ ފަތިސްނަމާދުގެ އިހުސުންނަތާއިމެދު ﷲ ތަޢާލާގެ ޙަޟްރަތުން އައިސްފައިވާ ގޮތެވެ. އެއީ: "ދުނިޔެއާއި ދުނިޔޭގައިވާހައި އެއްޗަކަށްވުރެ އެކަލާނގެ ޙަޟްރަތުގައި މުހިންމުކަން ބޮޑު 2 ރަކްޢަތް" ކަމެވެ.  
ވީމާ މިގޮތަށް ވަޒަންކޮށްލާށެވެ! ފަތިސްނަމާދުގެ ސުންނަތަކީ: 1. "ދުނިޔެއާއި ދުނިޔޭގައިވާހައި އެއްޗަކަށްވުރެ އެކަލާނގެ ޙަޟްރަތުގައި މުހިންމުކަން ބޮޑު 2 ރަކްޢަތެވެ." 2. ރަސޫލް ރަސޫލް ޞައްލަﷲ ޢަލައިހި ވަސައްލަމަ އެންމެ ބޮޑަށް ސަމާލުކަން ދެއްވެވި ސުންނަތް ނަމާދެވެ.  
ދެން ނިކަން ބުނެބަލާށެވެ! ފަތިސްނަމާދުގެ ސުންނަތް ނުކުރާ ނަމަ އެމީހަކީ ﷲ ތަޢާލާ އަށާއި ރަސޫލް ރަސޫލް ޞައްލަﷲ ޢަލައިހި ވަސައްލަމަ ގެ ސުންނަތަށް ލޯބިކުރާ މީހަކަށްވެވޭނެ ހެއްޔެވެ؟ ﷲ ތަޢާލާގެ ޙަޟްރަތުގައި އެހައި ލޮބުވެތިކަން ބޮޑު، ރަސޫލް ޞައްލަﷲ ޢަލައިހިވަސައްލަމަ އެންމެ ބޮޑަށް ސަމާލުކަން ދެއްވެވި 2 ރަކްޢަތް ނުކޮށް ހުރެ ދެވޭނީ ކޮން ޖަވާބެއް ހެއްޔެވެ؟  
- އިސްލާމީ ތިލަފަތުގެ ދަރުސަކުން