ރައްޔިތުންގެ މަޖިލިސްގެ މެންބަރުކަން އެތައް އަހަރަކު ކުރައްވާ މަޖިލީހުގެ ރައީސްކަން ވެސް ކުރައްވާ އދ މަޖިލީހުގެ އާއްމުމަޖިލިސްގެ ރައީސްކަން ވެސް ކުރައްވާފައިވާ އޮންރަބަލް އަބްދުއްލާ ޝާހިދު ރާއްޖޭގެ މިހާރުގެ ރައްޔިތުންގެ މަޖިލީހުގެ ގާނޫނީ ސައްހަ ކަމާމެދު ސުވާލު އުފައްދަވައިފިއެވެ. ޝަހިދު އެ ސުވާލު އުފެއްދެވީ ރައްޔިތުންގެ މަޖިލީހުން ގާނޫނު އަސާސީއަށް އިއްޔެގެނައި ބަދަލާ ގުޅިގެންނެވެ. 
ޝާހިދު އެކްސްގައި ކުރެއްވި ޕޯސްތެއްގައި ވިދާޅުވެފައިވަނީ "ގާނޫނުއަސާސީގެ 75 ވަނަ މާއްދާ ބުނަނީ މެންބަރުން އަމަލުކުރަންވާނީ މުޅި ގައުމާއި ހުރިހާ ރައްޔިތުންގެ މަންފާއަށް ކަމަށްް. ދިހަ ގަޑިއިރުގެ ތެރޭގައި ގާނޫނުއަސާސީއަށް ގެނެވުނު ބަދަލާ ގުޅިގެން މުހިންމު ސުވާލުތައް އެބަހުރި: މަޖިލީހުގެ މިހާރުގެ ލެޖިޓިމަސީއަކީ ކޮބާ؟ 75 ވަނަ މާއްދާއާ މި ބަދަލު ފުށުއަރާއިރު މެންބަރުން އަމަލުކުރާނީ ކިހިނެއް؟"ތޯއެވެ. 
ރައްޔިތުންގެ މަޖިލީހުގެ ގޮނޑި ގެއްލުމާ ގުޅޭގޮތުން ގާނޫނު އަސާސީއަށް ގެނައި އިސްލާހުން ގާނޫނީ ބަހުސެއްގެ ތެރެއަށް މަޖިލީހުގެ މެންބަރުންގެ ލެޖިޓެމަސީ މައްސަލަ ވެއްޓިގެން ހިނގައްޖެއެވެ. ސްޕްރީމް ކޯޓުން އަމިއްލަ އިސްނެގުމުން ވެސް ތިންބާރު އެއްވާ އެއްވުން ހުއްޓުވާ ގާނޫނު އަސާސީ ދިފާއުކޮށްދޭން ޖެހިއްޖެއެވެ.