ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ލީޑަރަކަށް އައްޔަންކޮށް، އިދިކޮޅު އިއްތިހާދު އުފައްދަވައި މިހާރު ލަންޑަނުގައި ކުރިއަށްދާ ބައްދަލުވުމުގައި އެކަން އިއުލާނު ކުރައްވައިފި އެވެ. އިދިކޮޅު އިއްތިހާދުގެ ލީޑަރަކީ ޑރ. ޖަމީލުކަން އިއުލާނު ކުރެއްވީ ކުރީގެ ރައީސް މުހައްމަދު ނަޝީދު އެވެ. އެ އިއްތިހާދުގައި ކާނަލް ނާޒިމްގެ ފަރާތުން އަމަނިކުފާނުގެ ކޮއްކޮ އާދަމް އާޒިމާއި ކުރީގެ ނައިބު ރައީސް އަހުމަދު އަދީބު ފަރާތުން އަނބިކަނބަލުން ލިއުޝާ އާއި އަދާލަތު ޕާޓީގެ ފަރާތުން އަލީ ޒާހިރުވެސް ބައިވެރިވެވަޑައިގަންނަވަ އެވެ. އޭގެ އިތުރުން އެމްޑީޕީގެ ފަރާތުން ޗެއާޕާސަން އަލީ ވަހީދުއާއި ގަލޮޅު ދެކުނު ދާއިރާގެ ރައްޔިތުން މަޖިލީހުގެ މެމްބަރު އަހުމަދު މަހްލޫފުވެސް އިއްތިހާދުގައި ހިމެނެ އެވެ. އެރަސްމިއްޔާތުގައި ވާހަކަފުޅުދައްކަވަމުން ރައީސް ނަޝީދު ވިދާޅުވީ އިއްތިހާދުގެ ލީޑަރަކީ " އިންތިހާބީ ނައިބު ރައީސް" ޑރ. މުހައްމަދު ޖަމީލު އަހުމަދު ކަމަށެވެ. އިއްތިހާދުގެ އެންމެ ބޮޑު ބޭނުމެއްގެ ގޮތުގައި ރައީސް ނަޝީދު ފާހަގަކުރެއްވީ އިދިކޮޅު ފަރާތްތަކަށް ކުރިމަތިވެފައިވާ ދަތިތަކުން ސަލާމަތްވެ ގައުމަށް ޑިމޮކްރަސީ ގެނައުން ކަމަށެވެ. މީގެކުރިންވެސް އިދިކޮޅު ފަރާތްތަކުން އެއްވެގެން އިއްތުހާދެއް އެއްކޮށް 2008 ގައި މަސައްކަތްކުރިނަމަވެސް ފަހުން އެ އިއްތިހާދު ބައިވެގެން ދިޔަކަން ފާހަގަކޮށް ރައީސް ނަޝީދު ވިދާޅުވީ މިފަހަރުގެ އިއްތިހާދަކީ ކުރިއަށްވުރެ ވަރުގަދަ ގުޅުން ބަދަހި އިއްތިހާދެއް ކަމަށެވެ. އަދި އެ އިއްތިހާދުން މަސައްކަތް ކުރާނީ ގައުމަށްޓަކައި ކަމަށް ނަޝީދު ވިދާޅުވި އެވެ. މިހާރު ލަންޑަނުގައި ކުރިއަށްދާ އެއްބައްދަލުވުމުގައި ބޭރުގެ ބައެއް ފަރާތްތަކުންވެސް ވަނީ ބައިވެރިވެ ވަޑައިގެންފަ އެވެ.