ބްރެޒިލްގެ ސާއޯ ޕައުލޯގެ މަދަރުސާއެއްގެ ދަރިވަރަކު، މުދައްރިސަކަށް ވަޅިއަކުން ހަމަލާދީ މަރާލައިފިއެވެ. މި ހަމަލާގައި އިތުރު 3 މުދައްރިސަކާއި 2 ދަރިވަރަކު ޒަހަމްވިއެވެ.
މިހަމަލާގެ މަގްސަދު އަދި ކަނޑައަޅާފައިނުވާއިރު، އެސޯސިއޭޓެޑް ޕްރެސް އޭޖެންސީއަށް އިންޓަވިއުއެއް ދިން އެ މަދަރުސާގެ 13 އަހަރުގެ ދަރިވަރަކަށް ހަވާލާދީ އެ މީޑިއާއިން ބުނާގޮތުގައި، ހަމަލާދިން ދަރިވަރާއި އެހެން ކުއްޖެއްގެ މެދުގައި ޖެހުނު ހަހަމަނުޖެހުމެއްގެ މެދަށް މުދައްރިސު ޓެންރެއިރޯ ވަދެ އެކަން ހުއްޓުވުމާއި ގުޅިގެން ހަމަލާދިން ދަރިވަރު ހުރީ މުދައްރިސުގެ ދެކެ ރުޅިއައިސްފައެވެ. އަދި އެގަޑީގައި ހަމަލާދިން ކުއްޖާ، މުދައްރިސަށް އިންޒާރުދިނެވެ. އޭގެ ފަހުން ހޯމަ ދުވަހުގައި، ހަމަލާދިން ކުއްޖާ މަދަރުސާއަށް މޫނުނިވާކޮށްގެން އައިސް ފަހަތުން މުދައްރިސަށް ހަމަލާދިނީއެވެ.
ބްރެޒިލްގެ މަދަރުސާއެއްގައި މިފަދަ ހަމަލާއެއް ހިނގުމަކީ އައު ކަމެއްނޫނެވެ. އެގޮތުން، ބްރެޒިލްގެ ފޮލްހާ ނޫސް މަޖައްލާއިން ބުނާގޮތުގައި، ހަމަލާދިން ކުއްޖާ މީގެ ކުރިން ޓުވިޓާގައި، 2019 ވަނަ އަހަރުގައި ބްރެޒިލްގެ ސުޒަނޯ ކިޔާ ތަނެއްގައި ހިނގި މަދަރުސާއަކަށް ދިން ހަމަލާއަކަށް ރިއާޔަތްކުރިއެވެ.
އެ ފަހަރު ދިން ހަމަލާގައި 5 ދަރިވަރުންނާއި، 2 މަދަރުސާގެ އޮފިޝަލުން މަރާލާފައިވަނީ ބަޑިޖަހައެވެ. އިތުރު 10 ދަރިވަރުން ޒަހަމްވި ހަމަލާ ދިނުމަށްފަހުގައި، ހަމަލާދިން ކުރީގެ އެ މަދަރުސާއިން ކިޔެވި 2 ދަރިވަރުން، 17 އަހަރުގެ ގިލްހެރމޭ ޓައުޗީ މޮންޓެއިރޯ އާއި 25 އަހަރުގެ ލުއީޒް އެންރީކޭ ޑި ކަސްޓުރޯ އަމިއްލައަށް މަރުވީއެވެ.