ހިއުންޑާއި ގޯލްޑަން ފުޓްސަލް ޗެލެންޖު 2026 ގައި ރޭ ކުޅުނު އަތޮޅު ފައިނަލްތަކުން މޮޅުވެ، ލ. އިސްދޫ، ތ. ތިމަރަފުށި، އދ. މަހިބަދޫ އަދި ކ. ގާފަރުން އަތޮޅު ޗެމްޕިއަންކަން ހޯދައިފި އެވެ.
އެ ގޮތުން، ތިމަރަފުށިން އަށް ވަނަ ފަހަރަށް އަތޮޅު ޗެމްޕިއަންކަން ހޯދީ ފައިނަލުގައި ކިނބިދޫ އަތުން 2-1 އިން މޮޅުވެގެންނެވެ. އަހުމަދު އަފްލާޒް، ތިމަރަފުއްޓަށް ލީޑުނަގައިދިން މި މެޗުގައި ކިނބިދޫން އެއްވަރުކުރީ މި އަތޮޅުން މި ފަހަރު އެންމެ ގިނަ ގޯލު ޖެހި ކުޅުންތެރިޔާ، މުހައްމަދު ޝާފިއު އެވެ. ތިމަރަފުށި މޮޅުވި ލަނޑު ޖެހީ ކޯނަރަކުން ތަނަވަސްކުރި ފުރުސަތެއްގައި، ފައިނަލް މެޗުގެ މޮޅު ކުޅުންތެރިޔާ، އާދަމް ނާސިހު (އާދަންނާ) އެވެ. ތިމަރަފުއްޓަށް ތިން ވަނަ ލަނޑެއް ޖަހަން ލިބުނު ޕެނަލްޓީ އަކުން އަފްލާޒް ފޮނުވާލި ބޯޅަ ކިނބިދޫ ކީޕަރު ފަޔާޒް ވަނީ މަތަކޮށްފަ އެވެ.
މިއީ، ތިމަރަފުށިން އަތޮޅު ތަށި އުފުލާލި އަށް ވަނަ ފަހަރެވެ. އެ ޓީމުން މި ކާމިޔާބީ ހޯދި އަހަރުތަކަކީ، 2016، 2017، 2018، 2019، 2022، 2024، 2025 އަދި 2026 އެވެ.
ގޯލްޑަން ފުޓްސަލް ޗެލެންޖުގެ ތ، އަތޮޅުގެ ތަށި ހޯދުމަށް ފަހު އުފާފާޅުކުރަނީ.---- ފޮޓޯ: އިމޭޖަސް،އެމްވީ
ޖެހިޖެހިގެން ދެ ވަނަ ފަހަރަށް ޕެނަލްޓީ ޖަހައިގެން މޮޅުވެ، ލ. އަތޮޅުގެ ޗެމްޕިއަންކަން އިސްދޫން މި ވަނީ ހޯދައިފަ އެވެ. މިދިޔަ އަހަރުގެ ފައިނަލުގައި ގަން އަތުން 4-3 އިން ޕެނަލްޓީ ޖަހައިގެން މޮޅުވި އިސްދޫން މި ފަހަރުގެ މެޗުގައި 1-1 އިން އެއްވަރުވެގެން ޕެނަލްޓީގައި، އިސްދޫ މޮޅުވީ 7-6 އިންނެވެ. މެޗުގައި ގަމުގެ އަހުމަދު އަޖުވަދު ލަނޑު ޖެހިއިރު، އިސްދޫން ގޯލު ޖެހީ، އަލީ ހުމޭޒު އެވެ.
ޕެނަލްޓީގައި އިސްދޫން ހަ ޕެނަލްޓީ ކާމިޔާބުކުރިއިރު، ގަމަށް ވައްދާލެވުނީ، ފަސް ޕެނަލްޓީ އެވެ. އިސްދޫގެ ޕެނަލްޓީތައް ޖެހީ، ލޫތު އަހުމަދު ފަތުހީ، ހުމޭޒު، އަހުމަދު އަފްސަމް، ހޫދު އަހުމަދު ފަތުހީ، އަލީ މީސާގް އީސާ (މީއްޓެ)، ހަސަން ސާމިނު އެވެ. ގަމުގެ ޕެނަލްޓީތައް ކާމިޔާބުކުރީ އަހުމަދު ހަލީމް (އައްމަަޑޭ)، ހުސެއިން ނާޝިދު (ނާއްޓޯ)، މުހައްމަދު ޖިނާހު، އަލީ އިރުޝާދު އަދި ޒައިދާން އަބްދުﷲ (ޒައިއްކޮ) އެވެ.
ގޯލްޑަން ފުޓްސަލް ޗެލެންޖުގައި ލ. އަތޮޅުގެ ޗެމްޕިއަންކަން ހޯދި އިސްދޫ ޓީމުގެ ކުޅުންތެރިން އުފާފާޅުކުރަނީ.---- ފޮޓޯ: އިމޭޖަސް.އެމްވީ
ފައިނަލުގެ މޮޅު ކުޅުންތެރިއަކަށް ހުމޭޒު ހޮވުނުއިރު، އެންމެ ގިނަ ލަނޑު ޖެހި ކުޅުންތެރިޔާގެ މަގާމާއި އަތޮޅުގެ މޮޅު ކުޅުންތެރިއަކަށް ހޮވުނީ މީއްޓެ އެވެ.
ގާފަރުން ހަ ވަނަ ފަހަރަށް ކ އަތޮޅުގެ ޗެމްޕިއަންކަން ހޯދީ 2-0 އިން އެންމެ ފަހުގެ އަތޮޅު ޗެމްޕިއަން މާފުށި ބަލިކޮށްގެންނެވެ. މިިއީ، މި ފަހަރުގެ މުބާރާތުގައި މާފުށި އަތުން ގާފަރު މޮޅުވި ދެ ވަނަ މެޗެވެ. ގާފަރުން ސާމިން މުހައްމަދު ނަސީރު އާއި އަލީ މާއިސް (މައްޓު)ގެ ލަނޑުތަކުން އަތޮޅު ޗެމްޕިއަންކަން އަލުން ހޯދިއިރު، އެ ޓީމުން މި ކާމިޔާބީ ހޯދި އަހަރުތަކަކީ، 2015، 2017، 2022، 2024 އަދި 2026 އެވެ.
ފައިނަލް މެޗާއި އަތޮޅުގެ މޮޅު ކުޅުންތެރިއަކީ ގާފަރުގެ ސާމިން އެވެ. އަދި، އެންމެ ގިނަ ގޯލު ޖެހި ކުޅުންތެރިއަކީ މާފުށީގެ ހުސެއިން ރިފާން އެވެ.
މަހިބަދޫ ކުޅުންތެރިން، ގޯލްޑަން ފުޓްސަލް ޗެލެންޖުގެ އދ އަތޮޅުގެ ޗެމްޕިއަންކަން ދެ ވަނަ ފަަހަރަށް ހޯދުމަށްފަހު އުފާފާޅުކުރަނީ.--- ފޮޓޯ: އިމޭޖަސް،އެމްވީ
މަހިބަދޫން އަތޮޅު ޗެމްޕިއަންކަން ދެ ވަނަ ފަހަރަށް ހޯދީ ފައިނަލުގައި، އޮމަދޫ އަތުން 5-2 އިން މޮޅުވެގެންނެވެ. މަހިބަދޫގެ ލަނޑުތައް ޖެހީ އަބްދުﷲ މިދުހަތު ފަހުމީ (ބިޗަޑް)، ޝުއައިދު ސައީދު، މުހައްމަދު އަފްހާމް އަލީ، އިބްރާހިމް ޝާތިރު އަދި އިސްމާއިލް ނަޒީރު އެވެ. އޮމަދޫގެ ދެ ލަނޑު ވެސް ޖެހީ އަބްދުﷲ ނާހިލް އެވެ.
މަހިބަދޫން ވަނީ އަތޮޅު ޗެމްޕިއަންކަން 2024 ވަނަ އަހަރު ވެސް ހޯދައިފަ އެެވެ. ފައިނަލް މެޗުގެ މޮޅު ކުޅުންތެރިއަކީ މަހިބަދޫގެ ބިޗަޑް އެވެ. އަތޮޅުގެ މޮޅު ކުޅުންތެރިއަކަށް އޮމަދޫގެ އަލީ ޝާޒް ހިލްމީ ހޮވުނުއިރު، އެންމެ ގިނަ ގޯލު ޖެހީ ދަނގެތީގެ އަހުމަދު ސުދައިސް އަލީ އެވެ.
ގޯލްޑަން ފުޓްސަލް ޗެލެންޖުގައި މިއަދާއި މިރޭ އޮތީ ހަތް ފައިނަލެވެ.
16:00 - ދ. ފައިނަލް: މާއެނބޫދޫ - ކުޑަހުވަދޫ
16:00 - ފ. ފައިނަލް: ނިލަންދޫ - މަގޫދޫ
--------------------------------------------
20:00 - މ. ފައިނަލް: މަޑުއްވަރީ - ދިއްގަރު
20:00 - ޅ. ފައިނަލް: ނައިފަރު - ކުރެންދޫ
21:45 - ބ. ފައިނަލް: އޭދަފުށި - ދަރަވަންދޫ
21:45 - ހދ. ފައިނަލް: ނައިވާދޫ - ނޮޅިވަރަންފަރު
23:00 - ށ. ފައިނަލް: ކަނޑިތީމު - ފޯކައިދޫ