ކައުންސިލް އިންތިހާބުގައި އިދިކޮޅު އެމްޑީޕީގެ ޓިކެޓްގައި ހުޅުމާލެ އުތުރު ދާއިރާއަށް ވާދަކުރައްވާ ފާތިމަތު ޒަހިއްޔާ (ޒާޔާ) މިދިޔަ އޮކްޓޯބަރު މަހު ފޭސްބުކްގައި ޖެހި ޕޯސްޓަކާ ގުޅިގެން މިއަދު ފުލުހަށް ހާޒިރުވުމަށް އިއްޔެ އެންގުމަށް ފަހު މިއަދު އެ ޗިޓު ކެންސަލްކޮށްފި އެވެ.
ވީކިހިނެއް؟ - ޒަހިއްޔާ ފުލުހަށް ހާޒިރުވުމަށް އެންގީ މިއަދު މެންދުރުފަހު 2 ޖަހާއިރަށެވެ. ނަމަވެސް ޗިޓު ކެންސަލްކުރިކަން ޒަހިއްޔާ މިއަދު ވަނީ އެކްސްގައި ކުރެއްވި ޕޯސްޓެއްގައި ހާމަކުރައްވާފަ އެވެ.
ބުނީ ކީކޭ؟ - ޒަހިއްޔާ ވިދާޅުވި ގޮތުގައި، މިއަދު ފުލުހަށް ހާޒިރުވުމަށް އަންގައި އިއްޔެ ފޮނުވި ޗިޓު ފުލުހުން ކެންސަލް ކުރި ނަމަވެސް ބަޔާން ނެގުމަށް އަދި ވަރަށް އަވަހަށް ޗިޓު ފޮނުވާނެ ކަމަށް ފުލުހުން އޭނާއަށް ގުޅާފައި އެންގި އެވެ. 
"މިއަދު ފުލުސް އޮފީހަށް ހާޒިރުވުމަށް އަޅުގަނޑަށް ފޮނުވި ޗިޓު ކެންސަލް ކުރެވިފައިވާ ވާހަކަ ފުލުހުން ގުޅާފައި އަޅުގަނޑަށް އަންގައިފި. އަދި އެ ބަޔާން ނަގަން އަނެއްކާވެސް ވަރަށް އަވަހަށް ޗިޓު ފޮނުވާނެ ވާހަކަ ވެސް ވިދާޅުވި،" ޒަހިއްޔާ ލިއުއްވާފައިވެ އެވެ.
ތަފްސީލް - ޗިޓުން އެނގޭ ގޮތުގައި، އޭނާ ހާޒިރުވުމަށް އެންގީ، މީގެ ގާތްގަނޑަކަށް ތިން މަސް ކުރިން، 4 އޮކްޓޯބަރުގައި އޭނާގެ ފޭސްބުކް އެކައުންޓުން ކުރި ޕޯސްޓެއްގައި ފުލުހުންނަށް އިންޒާރު ދީފައިވާ ކަމަށް ތުހުމަތުކުރާ މައްސަލާގަ އެވެ.
އެއީ ކޮން ޕޯސްޓެއްކަން ޗިޓުގައި ނެތް ނަމަވެސް އެ ދުވަހު ޒަހިއްޔާ ކުރެއްވި ޕޯސްޓްގައި ލިޔުއްވާފައިވަނީ "17 ނޮވެމްބަރަށް ތައްޔާރުވުމަށް ކަނޑޫދޫ މިރުހުން ސްޕްރޭ ތައްޔާރުކުރަން ފަށައިފިން. ހަމަ ޖެހީ، ހަމަ ޖެހީ،" މި ގޮތަށެވެ.
އެނގުން މުހިންމު - މި މައްސަލައިގައި އޮކްޓޯބަރު މަހުގެ ތެރޭގައި ޒަހިއްޔާގެ ފޯނު ފުލުހުން ހިފެހެއްޓި އެވެ. ފޯނު ދޫކޮށްލީ ގާތްގަނޑަކަށް ހަފްތާއެއް ފަހުންނެވެ. 
ތިން މަސް ފަހުން ފުލުހަށް ހާޒިރުވުމަށް އަންގާފައިވަނީ ކައުންސިލް އިންތިހާބުގެ ކެމްޕެއިންގައި އުޅުއްވަނިކޮށެވެ.