އަންނަ އާދިއްތަ ދުވަހުން ފެށިގެން ބޭންކް އޮފް މޯލްޑިވްސް (ބީއެމްއެލް) ގެ ކްރެޑިޓް ކާޑުތަކުގެ ޑޮލަރު ލިމިޓު ބޮޑުވާނެކަން އެ ބޭންކުން ރަސްމީކޮށް އިއުލާނުކޮށްފި އެވެ.
ބީއެމްއެލް އިން މިއަދު ސޯޝަލް މީޑިއާގައި ކުރި ޕޯސްޓެއްގައި ބުނީ އެ ބޭންކުގެ ކްރެޑިޓު ކާޑުތައް ބޭނުންކޮށްގެން ބޭރުގެ މުއާމަލާތްތައް ކުރަން ކޮންމެ މަހަކަށް ކަނޑައަޅާފައިވާ ޑޮލަރު ލިމިޓު ފެބްރުއަރީ 1، އިން ފެށިގެން ބޮޑުކުރަން ނިންމާފައިވާ ކަމަށެވެ.
އެގޮތުން ކްލެސިކް ކާޑުގެ ލިމިޓް 750 ޑޮލަރުން 1،400 ޑޮލަރަށް، ގޯލްޑް ކާޑުގެ ލިމިޓް 750 ޑޮލަރުން 1500 ޑޮލަރަށް، އަދި ޕްލެޓިނަމް ކާޑުގެ ލިމިޓް 1،500 ޑޮލަރުން 3،000 ޑޮލަރަށް ބޮޑުކުރަން ނިންމާފައިވާކަން ބީއެމްއެލް އިން މިއަދު ވަނީ އިއުލާނުކޮށްފަ އެވެ.
މި ތާރީހުގައި ބީއެމްއެލްގެ ކްރެޑިޓު ކާޑުތަކުގެ ޑޮލަރު ލިމިޓު ބޮޑުކުރާނެކަން ފުރަތަމަ އިއުލާނުކުރެއްވީ ރައީސް މުހައްމަދު މުއިއްޒު ސެޕްޓެމްބަރު 29، 2025، ގައި އެކްސްގައި ކުރެއްވި ޕޯސްޓެއްގަ އެވެ.
މިދިޔަ އަހަރުގެ ފަހުކޮޅު ވެސް ބީއެމްއެލް އިން ވަނީ ކަސްޓަމަރުންނަށް ދޭ ބައެއް ހިދުމަތްތަކަށް ލުއި ދީފަ އެވެ. އެގޮތުން ޑެބިޓު ކާޑު ބޭނުންކޮށްގެން ބޭރު ގައުމުތަކުގައި ވިޔަފާރި ކުރެވޭ އަދަދު އިތުރުކޮށް އެ ބޭންކުގެ ޕީއޯއެސް މެޝިންތައް ބޭނުންކޮށްގެން ކުރާ ވިޔަފާރިތަކުން ނަގާ މާޗަންޓު ފީ ކުޑަކުރަން ނިންމީ ނޮވެމްބަރު 11، 2025، ގަ އެވެ.
ބީއެމްއެލް އިން ޕީއޯއެސް މެޝިން ބޭނުންކުރަން ފެށީއްސުރެ މާޗަންޓު ފީ ހިފެހެއްޓިފައި ހުރީ 2.5 ޕަސެންޓުގަ އެވެ. އެ އަދަދު ދަށްކުރީ އެއް ޕަސެންޓަށެވެ. މީގެ އިތުރުން، ވިޔަފާރިތަކަށް އިތުރަށް ލުއިކޮށްދިނުމަށް އެޑްވާންސް މާޗަންޓް ސެޓްލްމަންޓް ފެސިލިޓީ އެއް ތައާރަފުކުރުމަށް ވެސް ބީއެމްއެލް އިން އޭރު ނިންމި އެވެ.
ބޭރު ގައުމުތަކުގައި ހުންނަ ޕީއޯއެސް މެޝިންތަކުން ވިޔަފާރި ކުރެވޭ އަދަދު 1،000 ޑޮލަރަށް، އަދި އެއާލައިން ޓިކެޓާއި ހޮޓާތަކަށް ލާރި ދެއްކުމާށް ކާޑުން ދެއްކޭ އަދަދު 3,000 ޑޮލަރަށް އިތުރުކުރަން ވެސް ބީއެމްއެލް އިން ނިންމި އެވެ.
ބީއެމްއެލް ގެ ރުފިޔާ ޑެބިޓު ކާޑުތައް ބޭނުންކޮށްގެން ރާއްޖެއިން ބޭރުގެ އޭޓީއެމްތަކުން ނެގޭ ޑޮލަރުގެ ލިމިޓު ޖޫން 30، 2025، ގައި ވަނީ ކުޑަކޮށްފަ އެވެ. ހަމަ އެ ދުވަހު ރުފިޔާ ޑެބިޓު ކާޑުތަކުން ކުރާ ބޭރު މުއާމަލާތްތަކުގެ ލިމިޓު އަންނަ މަހުން ފެށިގެން 500 ޑޮލަރަށް ބޮޑުކުރި އެވެ.
ޑޮލަރު ލިމިޓު 500 އަށް ބޮޑުކުރަން ބޭންކުން ނިންމީ ބައެއް މީހުން ވިޔަފާރިކުރަން މުދާ ގެންނަން ބީއެމްއެލް ޑެބިޓު ކާޑުތަކުން ފައިސާ ދެއްކުން ހުއްޓުވަން ކަމަށް ބުނެ، ދިވެހިންގެ ތެރޭގައި ވިޔަފާރިކުރަން މަގުބޫލު ބައެއް ސައިޓުތަކަށް ފައިސާ ދައްކާ ކޮންމެ ފަހަރަކު 30 ޕަސެންޓުގެ ފީއެއް ނަގަން ނިންމުމާއެކު ކުރިމަތިވި ފާޑުކިޔުންތަކާއެކު އެވެ.