ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހުޅުމާލޭގައި ހިންގި އޮޕަރޭޝަނެއްގައި ބައި ކިލޯގެ ޑްރަގާއެކު މިދިޔަ ހޯމަ ދުވަހު މީހަކު ހައްޔަރުކޮށްފި އެވެ.
އޮޕަރޭޝަން އަލިމަގުގެ ދަށުން ހިންގި މި އޮޕަރޭޝަނުގައި ހައްޔަރުކުރީ ހމ. ސިފްކޯހިޔާ 0801 ބީ / މާލެ، އިބްރާހީމް އަމްރު ތައުފީގު، 22، އެވެ.
އޭނާ ދިރިއުޅޭ ކޮޓަރިން ގިނަ އަދަދެއްގެ މަސްތުވާތަކެއްޗާއި، އެތަކެތި ބަންދުކުރުމަށް ބޭނުންކުރާ އާލާތްތައް ފެނިފައިވާ ކަމަށް ފުލުހުން ކޯޓުގައި ބުނެފައިވެ އެވެ.
މިގޮތުން ފުލުހުން ކޯޓުގައި ބުނީ އޭނާ ދިރިއުޅޭ ކޮޓަރީގައި ހުރި ޑްރެސިން ޓޭބަލްގެ ޑްރޯވާގެ ތެރެއިން ހުސް ރަބަރު ޕެކެޓާއި ކައްޓާ ފެނިފައިވާ ކަމަށެވެ.
ކޯޓުގައި އޭނާގެ ފަރާތުން ބުނެފައިވަނީ އޭނާއަކީ މަސްތުވާތަކެތި ބޭނުންކުރާ މީހެެއް ކަމަށާއި މަސްތުވާތަކެތި ވިއްކާ ވިޔަފާރި ނުކުރާ ކަމަށެވެ.
މި މައްސަލައާ ގުޅިގެން އިބްރާހީމް އަމްރު ތައުފީގުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް ވަނީ އަމުރުކޮށްފަ އެވެ.