ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ކިނޮޅަސް ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ (އ.ތ.މ) ކޮމިޓީ އަދި މުއައްސަސާތަކުގެ އިސްވެރިންނާ ބައްދަލުކުރައްވައި ރަށުގެ ތަރައްޤީއަށްޓަކައި ކުރުމަށް ބޭނުންވާ ކަންކަމާއި، ރައްޔިތުން އެންމެ އެދޭ ކަންކަމާ ގުޅޭގޮތުން މަޝްވަރާކުރައްވައިފިއެވެ. މި ބައްދަލުކުރެއްވުން ކުރިއަށްދިޔައީ މިއަދު ހެނދުނު ކިނޮޅަސް ސުކޫލުގައެވެ.
މިއަދުގެ ބައްދަލުކުރެއްވުމުގައި ރަށުގެ ރައްޔިތުން އެންމެ ބޭނުންވާ ކަންކަމާއި، ރައްޔިތުންނާ މަޝްވަރާކުރައްވައިގެން ތައްޔާރުކޮށްފައިވާ ތަރައްޤީގެ ޕްލޭން ކައުންސިލްގެ ފަރާތުން ރައީސުލްޖުމްހޫރިއްޔާއާއި ޙިއްޞާކުރެއްވިއެވެ.
މިގޮތުން ރަށުގެ ތަޢުލީމީ ދާއިރާ ހަރުދަނާ ކުރުމަށް ރަށު ސުކޫލުގައި މަލްޓިޕާޕަސް ހޯލަކާއި، އިތުރު ކުލާސް ރޫމްގެ މުހިންމު ކަން ފާހަގަކުުރެއްވިއެވެ. އަދި ރަށުގެ ޞިއްޙީ މަރުކަޒު ހިންގުމުގައި ހުރި ގޮންޖެހުންތައްވެސް ކައުންސިލުން ޙިއްޞާކުރެއްވިއެވެ.
ހަމައެއާއެކު ރަށުގައި ހުރިހާ އުމުރެއްްްްގެ ފަރުދުންނަށް ބޭނުންކުރެވޭނެ ލައިބުރަރީއެއް ޤާއިމުކޮށްދެއްވައި ރަށުގެ ޒުވާނުންނަށް، ފުޓުސަލް ދަނޑަކާއި، ވޮލީ ކޯޓަކާއި، އިންޑޯރ އަދި އައުޓުޑޯ ޖިމެއް ޤާއިމުކޮށްދެއްވުމަށްވެސް ކައުންސިލުން ވަނީ އެދިވަޑައިގެންފައެވެ.
މިއަދުގެ ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރެއްވި ކަންކަމުގެ ފަހުގެ މަޢުލޫމާތުތައް ޙިއްޞާކުރައްވާފައެވެ.
ކިނޮޅަސް ކައުންސިލާ، އ.ތ.މ ކޮމިޓީއާ ރައީސުލްޖުމްހޫރިއްޔާ ބައްދަލުކޮށްލެއްވުމުގެކުރިން އެމަނިކުފާނު ވަނީ އެރަށުގައި އަލަށް އިމާރާތްކުރާ ކައުންސިލް އިދާރާގެ ބިންގާ އެޅުމުގެ ރަސްމިއްޔާތު ޝަރަފުވެރިކޮށްދެއްވާފައެވެ.