މިއަދު ފާހަގަމިކުރަނީ ދިމާވާ ވަރަށް ނުރައްކައުތެރި މައްސަލައެކެވެ. ރަނގަޅަށް ވިސްނާށެވެ. ސިޙުރުވެރިންނަކީ އެމީހުންގެ ދީން ވިއްކާލައިގެން ތިބޭބައެކެވެ. ފައިސާ ދިނުމުން ކޮންމެ ކަމެއްވެސް ކުރާނެ ބައެކެވެ.  
ކުޑަކުޑަ ޙާދިސާއެއް ކިޔައިދޭނަމެވެ. ފިރިހެން ދަރިފުޅާއި އޭނާގެ އަނބިމީހާގެ މެދުގައި މައްސަލަޖެހޭވަރުން އެކަން ރަނގަޅުކުރެވޭތޯ މަންމަ ސިހުރުވެރިއެއްގެ ގާތަށް ގޮސް ކަމެއްކޮށްދިނުމަށް އެދުނެވެ. އެކަން ފަހަރިއަކަށް އެނގުނެވެ. އޭނާއަކީ އެ މައްސަލަ ޙައްލުކުރަން ބޭނުންވާ މީހެއް ނޫނެވެ. ޙަސަދަލައިގެން އުޅޭތީ ބޭނުންވެގެން ހުރީ އެދެމަފިރިން ދުރުކުރުވުމަށެވެ. އެހެންވެ އޭނާވެސް ހަމަ އެ ސިޙުރުވެރިޔާގެ ގާތަށް ގޮސް އެކަން ނުބައިކޮށްދިނުމަށް އެދި ގިނަ އަދަދެއްގެ ފައިސާތައް ދިނެވެ.  
ނަތީޖާއަކަށްވީ ދެމީހުންގެ އަތުންވެސް ފައިސާގައި ހިފާފައި ދެމަފިރިންގެ ގުޅުން ގޯސްވާނެ ގޮތަށް ކަންކަން ކުރުމެވެ. އެކަމުގެ ނުބައި އަސަރުކޮށް ކަންކަން ނުބައިން ނުބއަށްދާން ފެށިއެވެ. ޙަޤީޤަތް އެނގުނީ ރުޤްޔާކުރާ މީހެއްގެ މީހެއްގެ ގާތަށް ގޮސް ޝަރުޢީ މަގުން ރުޤްޔާކުރަން ފެށުމުންނެވެ.  
މީސްތަކުންނޭވެ! މިފަދަ ކަންކަން ހިނގަނީ މަދަކުން ނޫނެވެ. ސިޙުރުވެރިންގެ ކަންކަން ރަނގަޅަށް ދިރާސާކޮށްބަލާށެވެ! އެމީހުން ގިނައިން ސިޙުރުހަދާކަމަކީ ދެމަފިރިންގެ ދޭތެރެޖެއްސުވުމެވެ. ފިތުނަ އުފެއްދުވުމެވެ. އަދި އެންމެ ބޮޑަށް ކާމިޔާބުކުރެވޭ ސިޙުރަކީވެސް އެއީއެވެ. ސަބަބަކީ ދެމަފިރިންގެ މެދުގައި ފިތުނަ އުފައްދުވައި ކައިވެނި ރޫޅުވުމަކީ ޝައިޠޯނާ ކުރަން އެންމެ ބޮޑަށް ބޭނުންވާ ކަންތައް ކަމުގައިވާތީއެވެ. އެކަމަށް ހުރިހާ ޝައިޠޯނުންވެސް މަސައްކަތްކުރާނެތީއެވެ. އެމީހަކު އެންމެ ކުރަންބޭނުންވާ ކަމެއް، ނުވަތަ އެންމެ ބޮޑަށް އުފާވާ ކަމެއް ކުރަން ފުރުޞަތު ލިބުނީމަ އެކަމެއްކުރަން އަވަސްވެ ނުގަންނާނީ ކާކުހެއްޔެވެ؟  
ވީމާ ކޮންމެ މީހަކުވެސް، ކޮންމެ ދެމަފިރިއަކުވެސް އެންމެ ބޮޑަށް ސަމާލުކަންދޭންވީ ފަތިސްނަމާދުކުރުމަށާއި ދެއިރުގެ ޛިކުރުތައް ކިޔުމަށެވެ. ގެއިން ނުކުންނައިރުގައާއި ވަންނައިރު ކިޔަން ހުރި ޛިކުރުތައް ކިޔުމަށެވެ.
- އިސްލާމީ ތިލަފަތުގެ ދަރުސަކުން
ބައެއް ފަހަރު ސިޙުރުވެރިންގެ ގާތަށް ދަނީ ވަރަށް ހެޔޮ ނިޔަތެއްގައެވެ. އެއީ ދަރިފުޅުމެން ދެމަފިރިންގެ މެދުގައި މައްސަލަތަކެއް ޖެހިގެން އުޅޭތީ ޙައްލުކުރުމުގެ ނިޔަތުގައެވެ. ނިޔަތަކީ ކިތަންމެ ރަނގަޅު ނިޔަތެއް ނަމަވެސް ދެމަފިރިން ގުޅުވަން ނުވަތަ ދެމަފިރިންގެ ގުޅުން ރަނގަޅު ކުރުވަން ނަމަވެސް އެއްވެސް ބާވަތެއްގެ ސިޙުރެއް ހެއްދުވުމަކީ ކަނޑައެޅިގެން ޙަރާމް ކަމެކެވެ. ޝިރުކުކުރުމުގެ ފާފައެކެވެ. ވީމާ ކަމެއް ދިމާވެއްޖެނަމަ ސިޙުރުވެރިންގެ ގާތަށް ނުގޮސް އިތުބާރުކުރެވޭ ޝަރުޢީ ރުޤްޔާކުރާ މީހުންގެ ލަފާ ހޯދާށެވެ! ދުޢާކުރުން ގިނަކުރާށެވެ! ހިންމަވައި ދެއްވަވާނެތެވެ. އިން ޝާ ﷲ