ލިވަރޕޫލް ފުޓްބޯލް ކްލަބްގެ އެކަޑަމީއެއް ރާއްޖޭގައި ގާއިމްކުރުމުގެ ފުރުސަތު އޮތްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މިކަން ރައީސް ހާމަކުރެއްވީ "ރައްޔިތުންނާ އެކު" ޕޮޑްކާސްޓްގެ ދެވަނަ އެޕިސޯޑްގައި ވާހަކަފުޅު ދައްކަވަމުންނެވެ.
ރައީސް މުޢިއްޒު ވިދާޅުވި ގޮތުގައި، އެމް.އެމް.ޕީ.އާރު.ސީގެ ދަށުން ހިނގާ ވިޒިޓް މޯލްޑިވްސްއިން ވަނީ ލިވަރޕޫލް ފުޓްބޯލް ކްލަބާއެކު އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގެ ދަށުން ދިވެހިރާއްޖެ ވަނީ ލިވަރޕޫލްގެ ޓޫރިޒަމް ޕާޓްނަރެއްގެ ގޮތުގައި ކަނޑައަޅާފައެވެ.
މި ޕާޓްނަރޝިޕްގެ ދަށުން، އެޕްރީލް 2 ވަނަ ދުވަހު ބޭއްވޭ ލިވަރޕޫލް-އެވަރޓަން މެރސީސައިޑް ޑަރބީގައި ރާއްޖޭގެ އިޝްތިހާރުތައް ދައްކަން ފަށާނެ ކަމަށް ރައީސް ވިދާޅުވިއެވެ. މީގެ އިތުރުން، ކްލަބްގެ ސޯޝަލް މީޑިއާ ޕްލެޓްފޯމްތަކާއި މާޗަންޑައިޒްގައިވެސް ރާއްޖެ ހިމެނޭނެއެވެ.
"ދެން އަދި އިތުރު ކަންކަންވެސް ހިމެނޭ މީގެތެރޭގައި. އަޅުގަނޑު ބައެއް ބައްދަލުވުންތަކުގައިވެސް ބައިވެރިވާނަން. ސްޕޯޓްސް މިނިސްޓަރވެސް އަޅުގަނޑާ އެކީގައި ވަޑައިގަންނަވާ. ލިވަރޕޫލްގެ ފުޓްބޯލް އެކަޑަމީއެއް ރާއްޖޭގައި ހެދުންވެސް މީގައި މި ފުރުޞަތު ހުޅުވާލެވިފައި، ނޫނީ އެ އޮޕްޝަން ހިމެނޭ މީގެތެރޭގައި އިނގޭތޯ. އޭގެ މަޝްވަރާތައްވެސް ކުރިއަށްދާނެ. ލިވަރޕޫލްގެ ފުޓްބޯލް އެކަޑަމީއެއް ރާއްޖޭގައި ހެދިއްޖިއްޔާ އެއީ ވަރަށް ބޮޑު ކަމަކަށްވާނެ. ރާއްޖޭގެ ފުޓްބޯޅަ ކުރިއެރުވުމަށް، ޚާއްޞަކޮށް ކުޑަކުދިންނާއި ޒުވާން ކުދިންނަށް ދެވޭ ފުރުޞަތަކަށްވާނެ،" ރައީސް މުޢިއްޒު ވިދާޅުވިއެވެ.
މި ދަތުރުފުޅުގައި ރައީސް މުޢިއްޒު ބްރެޑްފަރޑަށްވެސް ވަޑައިގަންނަވާނެ ކަމަށާއި، އިނގިރޭސިވިލާތުގައި ކިޔަވާ 300 އަށްވުރެ ގިނަ ދިވެހި ދަރިވަރުންނާ ބައްދަލުކުރައްވާނެ ކަމަށްވެސް ވިދާޅުވިއެވެ. މި ދަތުރުފުޅުގައި ސްޕޯޓްސް މިނިސްޓަރވެސް ބައިވެރިވެ ވަޑައިގަންނަވާނެއެވެ.