ރައްޔިތުންގެ މަޖިލީހުގެ އިންތިހާބުގައި އެންމެ ވަރުގަދަ ރޭހެއް ޖެއްސެވި ބޭފުޅަކަށް ވަނީ ތިމަރަފުށީ ދާއިރާއަށް ކުރިމަތިލައްވައި ނާކާމިޔާބުވެވަޑައިގެންނެވި ޣައްސާން މައުމޫނެވެ. މަޖިލީހުގެ ގޮނޑިއެއް ކާމިޔާބު ނުކުރެއްވުނު ނަމަވެސް ގިނަ މީހުން އެއްބަސްވާ ގޮތުގައި ރައީސް މައުމޫންގެ ދަރިކަލުން ޣައްސާނަކީ ރާއްޖޭގެ ސިޔާސީ އުދެރެހަށް އަރައިގެން އަންނަ ތަރިއެކެވެ. މައުމޫން ފަދަ އާދައާހިލާފު ޝަހުސިއްޔަތެކެވެ. ޣައްސާން ވަނީ އޭނާގެ ސިޔާސީ ހަޔާތާބެހޭ ގޮތުން ސަންގެ އެޑިޓަރު ސިނާން އަލީ އާ ވާހަކަފުޅު ދައްކަވާފަ އެވެ.
ވެރިކަމަށް ވަޑައިގެންނެވުމުގެ އެއްވެސް ޝައުގުވެރިކަމެއް އެބަހުރިތޯ؟ ޢާއިލާގެ ތެރެއިން އެއްވެސް ބަޔަކު ޣައްސާން ވެރިކަމަށް ގެންނަވަން ބޭނުންފުޅުވޭތޯ؟
ޖަވާބު: ޤައުމެއްގެ ވެރިކަން ހަމަޖެހިގެން ދާންޖެހޭނީ ޤައުމަށް އެންމެ ފައިދާ ހުރި ގޮތަކަށް. ރައްޔިތުންނަށް އެންމެ ފައިދާހުރިގޮތަކަށް. އެއީ ވަކި ޢާއިލާއަކުން ނިންމާ ކަމެއްނޫން. އަޅުގަނޑު މިހުރީ އަޅުގަނޑުގެ ޤާބިލުކަން ތަންދިން މިންވަރަކުން ޤައުމަށް ޚިދުމަތްކޮށްދޭން ތައްޔާރަށް.
2013 ވަނަ އަހަރު އޮންނަ ރިޔާސީ އިންތިޚާބުގައި ބައްޕާފުޅު ވާދަ ކުރައްވަފާނެތޯ؟
ޖަވާބު: ބައްޕަ ގަސްދުކުރައްވާގޮތެއް އަޅުގަނޑަކަށް ނޭނގެ.
އަޅުގަނޑުގެ ބައްޕަ އަކީ ޤައުމަށް ވަރަށް ގިނަގުނަ ޚިދުމަތްތަކެއް ކުރައްވަމުންގެންދަވާ، ޤައުމުދެކެ ވަރަށް ލޯބިފުޅުވާ ބޭފުޅެއް. ޤައުމަށް ބޭނުންވެއްޖެ ކޮންމެ ހާލަތެއްގައި ފަސްޖެހިވަޑައެއް ނުގަންނަވާނެ.
2013 ވަނަ އަހަރު އޮންނަ ރިޔާސީ އިންތިޚާބުގައި ބައްޕާފުޅު ވާދަކުރެއްވުމަކީ ޣައްސާނު އަމިއްލަފުޅު ހައިސިއްޔަތުން ތާއީދު ކުރައްވާނެ ކަމެއްތޯ؟ އަދި ނުކުންނަވައިފި ނަމަ ކެމްޕޭނުގައި އުޅުއްވާނަންތޯ؟
ޖަވާބު: ބައްޕަ ވަކިގޮތެއް ނިންމެވުމަށްފަހު އަޅުގަނޑުމެން ހަތަރު ދަރީންވެސް އެކަމަކަށް ތާޢީދުކޮށް މަސައްކަތް ކޮށްދޭނަން. މިހާތަނަށްވެސް އަޅުގަނޑުމެން އަމަލުކޮށްފައިވަނީ މިގޮތަށް. މުސްތަޤުބަލުގައިވެސް އިރާދަ ކުރެއްވިއްޔާ ތިބޭނީ ހަމަ އެގޮތަށް.
ބައެއްފަރާތްތަކުން އެބަބުނޭ ރާއްޖޭގައި ރައީސް މައުމޫނުގެ ތާއީދު ކުރިއަށްވުރެން ކުޑަވެއްޖެޔޭ. މީހުން މަޑުމަޑުން މައުމޫނުގެ ހަނދާންތަކާ ދުރަށް އެބަދެއޭ. މިކަމާ ވިދާޅުވަނީ ކީކޭތޯ؟
ޖަވާބު: އަޅުގަނޑަކީ ރިޔާސީ އިންތިޚާބުގައި ބައްޕަ އަރިހުގައި އަތޮޅުތަކަށް ޒިޔާރަތް ކުރި މީހެއް. ނިމިގެންދިޔާ ލޯކަލް ކައުންސިލް އިންތިޚާބުގެ ކެމްޕޭނުގައިވެސް ބައްޕަ އަރިހުގައި އަތޮޅުތަކަށް ޒިޔާރަތްކުރިން. އަޅުގަނޑަށް ފެނުނީ، ހަމަ އެއް ރަށްތަކެއްގައި، އޭރަށްވުރެން މިހާރު ބައްޕައަށް އޮތް ތާޢީދު އެތައް ގުނައެއް އިތުރުވެފައިވާތަން.
އެހެން ނޫނަސް، ބަޔަކު ދައްކާ ވާހަކައަކުން ބައްޕަ ކޮށްދެއްވާފައިވާ ޚިދުމަތްތަކެއް ފަނޑެއް ނުވާނެ. ރާއްޖޭގެ ކަންކޮޅުތަކުން ފެންނަން ހުރީ ބައްޕަގެ ވެރިކަމުގައި ރާއްޖެއަށް ލިބިފައިވާ ތަރައްޤީ އާއި ކުރިއެރުން.
ޣައްސާނަކީ ކޮންކަހަލަ ޝަޚުސިއްޔަތެއް؟
ޖަވާބު: އަޅުގަނޑު އަބަދުވެސް ނަމޫނާއަކަށް ބަލަނީ އަޅުގަނޑުގެ ބައްޕަ. އެކަމަކު އަޅުގަނޑު ބައްޕަ ފަދަ ޝަޚުސިއްޔަތަކަށް ވެވޭނީ ވަރަށް މަދު މީހަކަށް. އަޅުގަނޑަކީ ކޮންކަހަލަ ޝަޚުސިއްޔަތެއްކަން ނިންމަންޖެހޭނީ އަޅުގަނޑު ދަންނަ އެހެން މީހުން. ވީމާ އަޅުގަނޑުގެ އާއިލާ އާއި ރަހުމަތްތެރިންނާ ތިޔަ ސުވާލު ކޮށްލައްވަން ވީނޫންތޯ؟
އާއިލާއާ ޣައްސާނުގެ ގުޅުން ކިހިނެއްތޯ؟ ބައްޕަ ނުހުންނަވާ ހާލަތުތަކުގައި އާއިލާ ލީޑު ކުރައްވާނީ ކޮންބޭފުޅެއްތޯ؟
ޖަވާބު: އާއިލާއާއި ގުޅުން ވަރަށް ރަނގަޅު. އަލްޙަމްދުލިއްލާހި! ބައްޕަ ނުހުންނަވާ ހާލަތުތަކުގައި ލީޑު ކުރައްވާނީ އަޅުގަނޑުގެ މަންމަ.
އާއިލާގެ ތެރެއިން ސިޔާސީ ކަންތައްތަކުގައި އެންމެ ބޮޑަށް ޝާމިލުވެ އުޅުއްވާތަން މިފެންނަނީ ޣައްސާނު. އަދި ބައްޕަގެ އެންމެ ފަހުގެ ރިޔާސީ އިންތިޚާބުގައި ވެސް އެކަން ވަރަށްބޮޑަށް ވަނީ ފެނިފައި. އެހެން ކުދިންނަށްވުރެން ބޮޑަށް ސިޔާސީ ކަންކަމުގެ ތެރެއިން ޣައްސާނު ފެންނަނީ ކީއްވެގެންތޯ؟ އެއީ ބައްޕަ ބޭނުންފުޅުވާ ގޮތްތޯ؟ ނޫނީ ބައްޕަ ޣައްސާން ދެކެ އެހެންބޭފުޅުންނަށް ވުރެން ބޮޑަށް ލޯބިފުޅު ވަނީތޯ؟
ޖަވާބު: އަޅުގަނޑަށް ހީވަނީ ތިޔައީ މަޢުލޫމާތުގެ ކުށެއްހެން. އަޅުގަނޑުގެ ދެ ދައްތައާއި ބޭބެ ސިޔާސީ ކަންކަމުގައި އަޅުގަނޑަށްވުރެ ކުރިން ހަރަކާތްތެރިވާން ފަށައިފި. އަދި، މިހާރުވެސް ގެންދަނީ ހަރަކާތްތެރިވަމުން.
އަޅުގަނޑު ދައްތަ ދުންޔާ، ޑެޕިއުޓީ މިނިސްޓަރެއްގެ މަޤާމުވެސް އަދާކުރި. އަދި، ދުންޔާ އަކީ ފެށުނީއްސުރެ ޑީ.އާރު.ޕީ ގެ ކައުންސިލް މެންބަރެއް. މިހާރު ޕާޓީގެ އަންހެނުންގެ ގޮފީގެ ރައީސްވެސްމެ. އަޅުގަނޑުގެ އަނެއް ދައްތަ ޔުމްނާ އަކީ ޑީ.އާރު.ޕީ ގެ އެންމެފުރަތަމަ އުފެއްދި ވަގުތީ ހިންގާ ކޮމިޓީގެ މެންބަރެއް. އަދި، މިހާރުވެސް ޑީ.އާރު.ޕީ ގެ އަންހެނުންގެ ކައުންސިލްގައި އުޅޭ ވަރަށް ހަރަކާތްތެރި މެންބަރެއް.
އަޅުގަނޑުގެ ބޭބެ ފާރިސް އަކީ ޑީ.އާރު.ޕީ ގެ ކައުންސިލުން ނިންމައިގެން "މައުމޫން 2008" ގެ ކެމްޕޭން މެނޭޖަރު.
ސިޔާސީ ކަންކަމުގައި ބައްޕަ ޣައްސާނާ ނުވަތަ ޢާއިލާއާ މަޝްވަރާ ކުރައްވާތޯ؟
ޖަވާބު: ބައްޕަ އަކީ މަޝްވަރާ ކުރެއްވުމާއި ޑިމޮކްރަސީގެ އުސޫލުތަކުގެ މަތިން ކަންކަން ނިންމަވާ ބޭފުޅެއް. އެގޮތުން ކޮންމެ ކަމެއްގައިވެސް ވަރަށް ގިނަ ބޭފުޅުންނާ މަޝްވަރާ ކުރައްވާ.
ވެރިކަމުގައި ހުންނެވި އިރު މަޝްވަރާކުރެއްވީ އޭރުގެ ކެބިނެޓާއި ބައްޕަގެ އެޑްވައިޒަރުންނާ. އޭރު އެއީ ރައީސުލްޖުމްހޫރިއްޔާ. ނަމަވެސް، މިހާރު ބައްޕަ އަޅުގަނޑުމެންނާ ސިޔާސީ ކަންކަމުގައިވެސް މަޝްވަރާ ކުރައްވާ.
ބައެއް ފަރާތްތަކުން ބުނޭ ރައީސް މައުމޫނުގެ ބޭފުޅުން ސިޔާސީ ކަންކަމުގެ ތެރެއަށްވަނީ ވެރިކަމުގެ އެންމެ ފަހު ދައުރުގައި ދެން އެހެން ގޮތެއް ނެތިގެންނޭ. އިތުބާރުކުރެވޭނެ ބަޔަކު އަރިހުގައި ނެތިގެން އެންމެ ފަހުން މައުމޫނުގެ ބޭފުޅުން އެމަނިކުފާނުގެ ވެރިކަން ހިމާޔަތްކުރެއްވުމަށް ނުކުމެވަޑައިގަތީއޭ.... މިކަމާ ވިދާޅުވާނީ ކީކޭތޯ؟
ޖަވާބު: ނޫން. ބައްޕަ އަރިހުގައި އޭރުވެސް ވަރަށްގިނަ ބޭފުޅުންތަކެއް ހަރަކާތްތެރިވެ ވަޑައިގެންނެވި. އަދި، މިހާރުވެސް ވަރަށްގިނަ ބޭފުޅުންތަކެއް ހަރަކާތްތެރިވެ ވަޑައިގަންނަވާ. އަދި، އެބޭފުޅުންނަކީ ބައްޕައަށް ވަފާތެރި، ޤާބިލު ބޭފޫޅުން. އަޅުގަނޑުމެން މަސައްކަތް ކުރީ، ޕާޓީގެ މެންބަރުންގެ ހައިސިއްޔަތުން، އެކެމްޕޭނުގައި އެހީތެރިވެދިނުމުގައި.
ރާއްޖޭގެ ސިޔާސީ މަސްރަހު ކިހާ ވަރަކަށް އެނގިވަޑައިގަންނަވާތޯ؟
ޖަވާބު: އަޅުގަނޑަށް މިދަނީ ކޮންމެ ދުވަހަކުވެސް އިތުރު ތަޖުރިބާތަކެއް ލިބެމުން، އިތުރު ކަންތައްތަކެއް އެނގި އޮޅުންފިލަމުން. ޑީ.އާރު.ޕީ ގެ ކައުންސިލާއި އެހެނިހެން ތަންތަނުން ތަޖުރިބާކާރު ބޭފުޅުންގެ ވާހަކަފުޅު އަޑުއިވި، އެބޭފުޅުން އަރިހުން ގިނަ މަޢުލޫމާތުތަކެއް އަޅުގަނޑަށް މިދަނީ ލިބެމުން. އޭގެ އިތުރުން، ރާއްޖޭގެ ހުރިހާ އަތޮޅަކަށް ދަތުރުކުރުމުގެ ނަސީބު އަޅުގަނޑަށް ލިބިފައިވާތީ، އެކި ފަންތީގެ ދިވެހި ލޮބުވެތި ރައްޔިތުންނާ ބައްދަލުވެ، އެބޭފުޅުންގެ ފަރާތުން އިނގޭ ކަންތައްތަކަކީ އަޅުގަނޑަށް ލިބޭ އެންމެ އަގުހުރި އެއްފިލާވަޅު ކަމުގައި ދެކެން.
ރައީސް ނަޝީދު ގެ ސަރުކާރުން ބައްޕަޔަށް ދެއްވާ ހިމާޔަތާ ރައްކާތެރިކަމާ މެދު ދެކިވަޑައިގަންނަވަނީ ކިހިނެއްތޯ؟
ޖަވާބު: ރައީސްކަން ކުރައްވާފައިވާ ބޭފުޅަކަށް ލިބިވަޑައިގަންނަވަން ޖެހޭ ރައްކާތެރިކަމުގެ ކަންތައްތައް، ޤާނޫނު އަސާސީ އާއި ޤާނޫނުގައި ކަނޑައަޅާފައިވާ ގޮތަށް، އަޅުގަނޑުގެ ބައްޕައަކަށް ފުރިހަމައަށް ލިބިވަޑައިގަންނަވަމަކުން ނުދޭ.
2013 ވަނަ އަހަރު އޮންނަ ރިޔާސީ އިންތިޚާބުގެ ކުރިން ޑީ.އާރު.ޕީ ގެ ޤައުމީ ޖަލްސާއަކަށް ތަސްމީން ޖާގަ ދެއްވަފާނެކަމަށް ޤަބޫލުކުރެއްވޭތޯ؟
ޖަވާބު: ޕާޓީގެ އަސާސީ ޤަވާއިދުގެ 58 ވަނަ މާއްދާގެ (ހ) ގައި އޮންނަ ގޮތުން، ކޮންމެ މީލާދީ 2 އަހަރަކުން އެއްފަހަރު ޤައުމީ ޖަލްސާއެއް ބާއްވަން ލާޒިމުވޭ. އެންމެފަހުން ޤައުމީ ޖަލްސާއެއް ބޭއްވުނީ ވޭތުވެދިޔަ އަހަރުގެ އޭޕްރިލް މަހުގެ ތެރޭގައި. ވީމާ އަންނަ އަހަރުގެ އޭޕްރިލް މަހުގެ ކުރިން ޤައުމި ޖަލްސާއެއް އޮންނާނެ.
އަންނައަހަރު ބެއްވޭ ޑީ.އާރު.ޕީ ގެ ޤައުމީ ޖަލްސާގައި ރިޔާސީ ކެންޑިޑޭޓަކު ހޮވަން ނިންމުމާ މެދު ދެކިވަޑައިގަންނަވަނީ ކިހިނެއްތޯ؟
ޖަވާބު: ޕާޓީގެ ކައުންސިލްގައި ޒުވާނުންގެ ގޮފި ތަމްސީލުކުރާ އެއް މެންބަރުގެ ހައިސިއްޔަތުން، އަޅުގަނޑުގެ ނިންމުންތައް ބިނާކުރަނީ ޕާޓީގެ ޒުވާނުންގެ ވިންދު ހުރިގޮތަކަށް. ވީމާ، ރިޔާސީ ކެންޑިޑޭޓަކު ހޮވުމާމެދުވެސް އަޅުގަނޑު ޒުވާނުންނާ މަޝްވަރާކުރުމަށްފަހު، ގިނަ ޒުވާނުންގެ ވިސްނުން ހުރިގޮތަށް އިރާދަކުރެއްވިއްޔާ ޢަމަލުކުރާނަން.
ޑީ.އާރު.ޕީން ޤައުމީ ޕާޓީއާ އެކު ކޯލިޝަން ހެދުން އެއީ މަޝްވަރާ ކުރެވިގެން ކުރިޔަށް ގެންދިޔަ ރަނގަޅު ނިންމުމެއް ކަމަށް ޤަބޫލުކުރައްވަންތޯ؟ ޤަބޫލުނުކުރައްވާނަމަ އެއީ ކީއްވެތޯ؟
ޖަވާބު: ބޮޑުކަމެއް ނިންމަންވާނީ ގިނަބަޔަކާ މަޝްވަރާ ކުރެވި، އެކަމެއް ވަރަށް ފުންކޮށް ދިރާސާކުރުމަށްފަހު. ކައުންސިލްގައި އަޅުގަނޑު ތަމްސީލު ކުރަނީ މިޕާޓީގެ އެތައް ހާސް ޒުވާނުން. އެޒުވާނުން ތަކަކީ މިޕާޓީ ކުރިއަރުވަން ގިނަގުނަ ގުރުބާނީ ތަކެއް ވަމުންދާ ބައެއް. ވީމާ، މިފަދަ ކަމެއްގައި ޒުވާނުންގެ ގޮފީގެ މަންދޫބުންނާވެސް މަޝްވަރާކުރެއްވުން މުހިންމު.
އެދުވަހުގެ ކައުންސިލް ބައްދަލުވުމަށް ދަޢުވަތު ލިބުނީ އޭގެ ކުރީރޭ އަޅުގަނޑަށް އައި އެސް.އެމް.އެސް އެއްގެ ގޮތުގައި. އެޖެންޑާގައި ތިޔަ އިޝާރާތް ކުރެއްވި ކަންތައް އޮތީ "ރިޔާސަތުން ހުށަހަޅުއްވާ މައްސަލައެއް" ގެ ގޮތުގައި. ޖަލްސާގެ ކުރިން، އެއީ ކޮން ކަމެއްކަން އެޖެންޑާ ބަލާލުމަކުން ކައުންސިލްގެ އެއްވެސް މެންބަރަކަށް ސާފެއްނުވާނެ. ވީމާ، އެޖަލްސާގައި އެފަދަ ބޮޑުކަމެއް ނިންމޭނެކަމެއް އަޅުގަނޑަކަށްވެސް އެނގިފައެއްނެތް. އެދުވަހު ޖަލްސާއަށް ގޮވުނު ގަޑިއަށް ޕާޓީގެ އޮފީހަށް އަޅުގަނޑު ހާޒިރުވީން. އަޅުގަނޑާއި އަޅުގަނޑުގެ ދައްތަ އެތާނގައި ދޮޅު ގަޑިއިރު ހޭދަކުރިން. ލީޑަރު ވަޑައިގެން ޖަލްސާ ނުފައްޓަވާތީ އަޅުގަނޑުމެން ގެއަށް އެނބުރި ދިޔައީ. އޭގެ ފަހުން ލީޑަރު ވަޑައިގެން، ޖަލްސާ ބާއްވަވާ މިކަން ނިންމެވީ. މިއީ މުޅި ޕާޓީގެ މަސްލަހަތު އެންމެފުރިހަމައަށް ހިމާޔަތްކުރެވޭ ގޮތަށް ހިނގި ކަމެއް ކަމަކަށް އަޅުގަނޑު ނުދެކެން. މިދެކެވެނީ ނިމިގެންދިޔަ އިންތިޚާބުގައި 500 އަށްވުރެން ގިނަ ގޮނޑި ކާމިޔާބުކުރި އެތައް އެތައް ހާސް މެންބަރުން އެކުލެވޭ ޑީ.އާރު.ޕީ އާއި ނިސްބަތުން ވަރަށް ކުޑަ ޕާޓީއަކާ ދެމެދު ކޮއަލިޝަނެއް ހެދޭ ވާހަކަ.
ޕާޓީގެ ތެރޭގައި މިއުޅޭ ބައިބައިވުމާ މެދު ވިދާޅުވަނީ ކީކޭތޯ؟
ޖަވާބު: ޕާޓީގެ ތެރޭގައި އުޅޭ ދެބަސްވުމުގެ މައްސަލަވަނީ ވަރަށް ބޮޑުވެފައި. މިކަން ޙައްލުކުރެއްވުމަށް ޕާޓީގެ ޒަޢީމު ގިނަގުނަ މަސައްކަތްޕުޅުތަކެއް ގެންދަވަނީ ކުރައްވަމުން. އޭގެ އިތުރުން، ޕާޓީގެ ކައުންސިލްގައި ހިމެނިވަޑައިގަންނަވާ ބައެއް ފަންނީ ބޭފުޅުން، އަމިއްލަ އިސްނެންގެވުމެއްގައި، ޒަޢީމާ އެކު ޙައްލެއް ހޯއްދަވަންވެސް އެބަ މަސައްކަތްކުރައްވާ. މިއަށްވުރެ އިތުރު މަޢުލޫމާތެއް މިދަނޑިވަޅުގައި އަޅުގަނޑު ދީފިނަމަ، ކުރިއަށްމިދާ މަސައްކަތްތަކަށް ބުރޫ އަރާފާނެކަމަށް އަޅުގަނޑަށް ފެނޭ.