ކުރީގެ ރައީސް އަދި ޑިއާރުޕީގެ ޒައީމް މައުމޫން އަބްދުލް ގައްޔޫމް ހައްޔަރު ކުރުމަށް ގޮވާލައި މައުމޫން ދިރިއުޅުއްވާ ގެކޮޅު އަލިވާގެ ކައިރިއަށް އެމްޑީޕީގެ އެކްޓިވިސްޓުންގެ ގިނަ އަދަދެއްގެ ބަޔަކު އެއްވެ ހަމަނުޖެހުން ހިންގައިފި އެވެ.
މިރޭ ގާތްގަނޑަކަށް 11:00 ޖަހާ އެހާކަންހާއިރު މައުމޫން ދިރިއުޅުއްވާ ގެކޮޅު މާފަންނު އަލިވާގެ ކައިރިއަށް އެމްޑީޕީގެ އެކްޓިވިސްޓުން އެއްވެ ރައީސް މައުމޫން ހައްޔަރު ކުރުމަށް ގޮވަން ފެށުމުން މައުމޫނަށް ތާއީދު ކުރާ މީހުންވެސް ވަނީ ކުޑައިރުކޮޅެއްގެ ތެރޭގައި އަލިވާގެ ދޮށައް އެއްވެފަ އެވެ. އެއްވުން ބޮޑު ހަމަނުޖެހުމަކަށް ބަދަލުވެގެންދިޔައީ އެހިސާބުންނެވެ. އެގޮތުން ދެ ފަރާތުގެ މެދުގައި ހޫނުބަހުގެ ހަމަލާތަށް ހިނގާތާ ބައިގަޑިއެއް ހާއިރު ފަހުން ދެ ފަރާތުގެ ބަހުގެ ހަމަލާތައް ބަދަލުވެގެން ދިޔައީ ގަލާއި ތެޅި މިރުހުގެ ހަމަލާތަކަކަށެވެ.http://sun.mv/albums/l_292.jpg
މައުމޫންގެ ހިމާޔަތުގައި އަލިވާގެ މައި ދޮރާށި ކުރިމަތީ ތިބި މީހުން އުކަމުން ދިޔަ ތެޅި މިރުސް ޕެކެޓްތަކުގެ ރައްދެއްގެ ގޮތުން މ. ކުރަހާގޭ ކުރިމަތީ ތިބި އެމްޑީޕީގެ ސަޕޯޓަރުން ވެސް ގަލާއި ވެލި އުކަން ފެށި އެވެ. އެމީހުން އަލިވާގެ ތެރެއަށް ގާ އުކުމުގެ ސަބަބުން އެގޭގެ ބައެއް ބިއްލޫރިތަށް ވެސް ތަޅައިގެން ގޮސްފައި ވެއެވެ. ދެ ފަރާތުން ގަލާއި ވެއްޔާއި ފެނާއި ތެޅި މިރުސް ގަޑިއެއްހާއިރު މެދުކެނޑުމެއްނެތި އުކާފައި ވެއެވެ. މިހަމަލާތަކުގެ ތެރޭގައި އެ ސަރައްދު ބަލައްޓަން އުޅުނު ބައެއް ފުލުހުންނާއި އާންމުންނަށް ވަނީ އަނިޔާތައް ވެސް ވެފައެވެ. ފުލުހުން އެމްޑީޕީގެ ސަޕޯޓަރުން ފަހަތަށް ޖައްސައި އޯކިޑް މަގަށް ނެރުނީ އޭގެ ފަހުންނެވެ.
ފުލުހުންނާއި އާންމުންގެ ތެރެއިން އަނިޔާ ލިބުނު މީހުންނަށް ލިބުނީ ކިހާ ވަރެއްގެ އަނިޔާތަކެއް ކަމެއް ސާފުވާ ގޮތެއް ނުވި އެވެ.
ހަމަނުޖެހުންތަކުގެ ވަކި ހިސާބަކުން އެމްޑީޕީގެ ސަޕޯޓަރުންގެ އަޑުގަދަކޮށް ފުލުހުންނާއި ކުރިމަތިލާން ފެށުމުން ރަޔަޓް ގިޔަރުގައި ތިބި ފުލުހުންގެ ފައުޖެއް އައިސް ތަކުރާރުކޮށް ފަހަތަށް ޖައްސައި އެއްވުން ރުޅައިލާ ކޮންމެ ފަހަރަކު އަލުން އެއްވެ މައުމޫނު ހައްޔަރު ކުރުމަށް އަޑު ހަރުކޮށް ގޮވާފައި ވެއެވެ. އަދި ފަހުން ވެސް އެމްޑީޕީގެ ސަޕޯޓަރުން އަޑުގަދަ ކުރާ ހަރުކޮށްފައިވާ ޕިކަޕެއް އެ ސަރަހައްދަށް ވައްދައި މައުމޫނާއި ކުރީގެ ސަރުކާރުގެ އިސްވެރިން ހައްޔަރުކުރުމަށް ވަނީ ގޮވާފަ އެވެ. އެފަހަރުވެސް އަލިވާ ގޭގެ ކައިރީގައި ތިބި މައުމޫންގެ ސަޕޯޓަރުން ލޭހޫނުވެ ކުރިމަތިލުންތަކެއް ހިނގި އެވެ.
އެމްޑީޕީގެ ސަޕޯޓަރުން ގަޑިއެއްހާއިރު ވަންދެން އަޑުގަދަ ކުރާ ބޭނުންކޮށްގެން ޝުއޫރުފާޅުކުރުމަށް ފަހު އެ ސަރަހައްދު ދޫކޮށްދިޔައީ "ރައީސުލްޖުމްހޫރިއްޔާ މުހަންމަދު ނަޝީދު، އެ އެއްވުން ހުއްޓާލަން އަންގަވައިފި" ކަމަށް ބުނަމުންނެވެ. އޭގެ އިތުރުން އެ މީހުން ދިޔައީ "މައުމޫން ހައްޔަރު ނުކުރަންޏާ މާދަމާރޭވެސް އެއްވަން ޖެހިދާނެ ކަމަށް" ބުނެ އިންޒާރުތައް ވެސް ދީފައި ވެއެވެ. އަލިވާގޭ ސަރަހައްދު ދޫކޮށް އެމްޑީޕީގެ އެކްޓިވިސްޓުން ދިޔައީ 1:00 ވެސް ޖަހާ ބޮޑުވި ފަހުންނެވެ. އެނގިފައިވާ ގޮތުގައި އެމީހުން އަލިވާގޭ ދޮށަށް ދިޔައީ އަމީނީ މަގުގައި ހުންނަ އެމްޑީޕީ ހަރުގޭގެ ތެރޭގައި ތިބުމަށް ފަހު އެވެ.
އަލިވާގޭ ކައިރިއަށް އެމްޑީޕީގެ ސަޕޯޓަރުން އެއްވެ އުޅުނު އިރު އެ އެއްވުން ރޫޅައިލުމަށް ފުލުހުން އެއްވެސް ވަރަކަށް ބާރުގެ ބޭނުމެއް ނުކުރެ އެވެ. އަދި މީހަކު ހައްޔަރު ކޮށްފައެއްވެސް ނުވެ އެވެ.
އަލިވާގޭ ކައިރިއަށް އެއްވި މީހުންގެ ހަރަކާތަކުގައި އިސްކޮށް އުޅުއްވީ ކުރީގެ ފިލްމީ ތަރި އަދި މިހާރު މެދުހެންވޭރު ދާއިރާގެ ކައުންސިލަރު ލުފްޝާން ޝަކީބް (ލޫއްޕެ) އެވެ. މީހުން އެއްވެ ހަމަނުޖެހުންތައް ހިނގަމުން ދިޔައިރު އެ ސަރަހައްދުގައި ދިރިއުޅޭ އާންމުންނަށް ވަނީ މަގުމައްޗަށް ނުކުމެ އުނދަގޫވާތީ އެކަމުގެ ޝަކުވާ ފުލުހުންނަށް ހުށަހަޅައިފަ އެވެ.