ކަރަންޓު އަގުބޮޑުކުރުމާ ދެކޮޅު ހެދުމަށް އިދިކޮޅު ޑީއާރުޕީން އިސްވެ އިންތިޒާމް ކޮށްގެން މިރޭ ބޭއްވި މުޒާހަރާގައި ފުލުހުންނާއި ސަރުކާރާ އިދިކޮޅު މީހުންގެ މެދުގައި ހަމަނުޖެހުން ހިނގައި ބައެއް މީހުންނަށް ހާނިއްކަ ވެއްޖެ އެވެ.
ސްޓެލްކޯ ކުރިމަތީގައި ފެނާއި ކަރުނަ ގޭސް ޖަހައިގެން ފުލުހުން ރޫޅާލި މުޒާހަރާގައި ހާނިއްކަވެގެން ވިއްސަކަށް މީހުން ހޮސްޕިޓަލަށް ގެންދިޔަކަން ހަވީރަށް ވަނީ އެނގިފަ އެވެ. އޭގެ ތެރޭގައި ފަސް ފުލުހަކު ވެސް ހިމެނެ އެވެ. މުޒާހަރާގެ 12 ބައިވެރިއަކު އައިޖީއެމްއެޗަށް އަދި އެކަކު އޭޑީކޭ އަށް ގެންދިޔަ މަންޒަރު ހަވީރުގެ ނޫސްވެރިންނަށް ފެނިފައިވެ އެވެ. އޭގެ ތެރޭގައި ޑީއާރުޕީގެ ޑެޕިއުޓީ ލީޑަރުންނާއި މަޖިލިސް މެމްބަރުން ހިމެނިވަޑައިގެންނެވި އެވެ.
ހޮސްޕިޓަލަށް ގެންދިޔަ މީހުންނަށް އެކިވަރުގެ ހާނިއްކަތައް ވަނީ ލިބިފަ އެވެ. ނަމަވެސް މާބޮޑު ތަފްސީލެއް މިރޭ ލިބިފައެއް ނުވެ އެވެ.
މުޒާހަރާގެ ބައިވެރިންގެ ތެރެއިން ވިއްސަށް ވުރެ ގިނަ މީހުން ސްޓެލްކޯ ކުރިމަތިން ފުލުހުންގެ ބެލުމުގެ ދަށަށް ގެންދިޔަ މަންޒަރު ފެނުނެވެ. ބައެއް މީހުން ގެންދިޔައީ ބިޑިއަޅުވައިގެންނެވެ.
ގައުމީ ޕާޓީ ވެސް ބައިވެރިވި މުޒާހަރާ ފެށީ 00: 9 ގައި ލޮނުޒިޔާރަތްކޮޅުގައި އޮތް އެއްވުމަކުންނެވެ.
ރަތް ކުލަ ލައިގެން ތިބި މުޒާހަރާ ބައިވެރިންގެ ޝުއޫރަކީ "ކަރަންޓު އަތް ނުފޯރާ ފަށަށް" ގޮސް "ރައްޔިތުން ރަތަށް" އަރައިފި ކަމަށެވެ.
ސުނާމީ ބިނާ ސަރަހައްދުގައި ބޭއްވި އެއްވުމުގައި ޑީއާރުޕީގެ ލީޑަރު އަހުމަދު ތަސްމީން އަލީ އާއި ޑެޕިއުޓީ ލީޑަރު އަލީ ވަހީދާއި އެ ޕާޓީގެ އެހެން ބައެއް މަޖިލިސް މެމްބަރުންނާއި ގައުމީ ޕާޓީގެ އިސް ބޭފުޅަކު ވާހަކަ ދެއްކެވި އެވެ.
އެ ބޭފުޅުން ވިދާޅުވީ ކަރަންޓުގެ އަގު ބޮޑުނުކުރައްވާނެ ކަމަށް ވިދާޅުވެ ރައީސް މުހައްމަދު ނަޝީދު ކެމްޕެއިންގައި ވެވަޑައިގެންނެވި ވައުދާ ހިލާފުވެވަޑައިގެންފައިވާ ކަމަށެވެ. އަދި ރައީސް ނަޝީދު އޭރު ވިދާޅުވި ވާހަކަފުޅުގެ އޯޑިއޯ ކްލިޕެއް އިއްވަމުން ގެންދިޔަ އެވެ.
ޑީއާރުޕީ އާއި ގައުމީ ޕާޓީން ބުނަމުން ގެންދިޔައީ ރާއްޖޭގެ މުސްތަގުބަލަކީ އެ ޕާޓީތައް ކަމަށާއި ވެރިކަން ކުރާނީ އެ ޕާޓީތަކުން ކަމަށެވެ. އަދި ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި އެ ޕާޓީތަކަށް ނިސްބަތްވާ މެމްބަރުންނަށް ވޯޓު ދިނުމަށާއި އެމްޑީޕީގެ އެއްވެސް ކެންޑިޑޭޓަކަށް ވޯޓު ނުދިނުމަށް އެކި ބޭފުޅުން ގޮވައިލެއްވި އެވެ.
ކަރަންޓުގެ އަގު ވަގުތުން އިއާދަކުރުމަށާއި ރައީސް ނަޝީދު އިސްތިއުފާ ދެއްވުމަށް މުޒާހަރާގައި ދިޔައީ ތަކުރާރުކޮށް ގޮވަމުންނެވެ.
ދޮޅުގަޑިއެއްހާ އިރު ފަހުން، މުޒާހަރާގެ ބައިވެރިން ލޮނުޒިޔާރަތްކޮޅުން ނައްޓާލީ ސަރުކާރަށް ދޭ "ނޯޓިސް"އެއް ކަމަށް ބުނެ ތައްޔާރު ކޮށްފައިވާ ކަރުދާސްތަކެއް ރައީސް ނަޝީދުގެ ރަސްމީ ގެކޮޅު މުލީއާގޭ ފާރުގައި ހިއްޕާނެ ކަމުގެ އިންޒާރާ އެކުގަ އެވެ.
ޑީއާރުޕީގެ ނާއިބު ޒައީމުންނާއި މަޖިލިސް މެމްބަރުން އިސްކޮށް ތިއްބަވައިގެން އަމީނީމަގުން ހިނގާފައި ގޮސް ސްޓެލްކޯއާ ހަމަކުރި އިރު ރަޔަޓް ފުލުހުން ތިބީ އެ ސަރަހައްދު ބަންދުކޮށްގެންނެވެ. އަދި އެއަށް ވުރެ ކުރިއަށް ދެވޭ ގޮތެއް ނުވި އެވެ.
މުޒާހަރާގެ ބައިވެރިން ސްޓެލްކޯ ސަރަހައްދުން ދުރަށް ނުގޮސްފިނަމަ ގާނޫނީ ފިޔަވަޅު އަޅާނެ ކަމުގެ އިންޒާރު ފުލުހުން ދެމުން ގެންދިޔަ އެވެ. ނަމަވެސް ސްޓެލްކޯގެ އިރުން ކުޑަކުދިންގެ ބަގީޗާ ސަރަހައްދުގައި ތިބެގެން ޑީއާރުޕީން ބުނަމުން ދިޔައީ އެއީ ގާނޫނާ އެއްގޮތްވާ ގޮތުގެ މަތިން ކުރިއަށް ގެންދާ މުޒާހަރާއެއް ކަމަށާއި ކަރަންޓުގެ އަގު ތިރިނުކުރަނީސް އެ މުޒާހަރާ ހުއްޓާނުލާނެ ކަމަށެވެ.
ފުލުހުން ވެސް މުޒާހަރާގައި ބައިވެރިވެ ސަރުކާރު "ވައްޓާލަން" އެހީތެރިވުމަށް ޑީއާރުޕީގެ ޑެޕިއުޓީ ލީޑަރު އުމަރު ނަސީރު ގޮވާލެއްވި އެވެ.
އެމްޑީޕީގެ ސަޕޯޓަރުން ވެސް އެ ސަރަހައްދަށް އެއްވެ، ސްޓެލްކޯގެ ހުޅަނގު ކަންމައްޗާ ދިމާލުގައި ތިބެގެން ކުރީގެ ސަރުކާރުގެ އިސްވެރިންގެ މައްސަލަތައް ބެލުމަށް ގޮވާލަމުން ގެންދިޔައެވެ.
ދެގަޑިއެއްހާއިރު ފަހުން ފުލުހުން މުޒާހަރާ ރޫޅާލާނެ ކަމުގެ އިންޒާރު ދިނެވެ. އަދި އޭގެ ބައިގަޑިއެއްހާއިރު ފަހުން ފެނާއި ކަރުނަ ގޭސް ޖެހި އެވެ.
ހާނިއްކަވީ މީހުން ހޮސްޕިޓަލަށް ގެންދިޔައީ ފުލުހުންނެވެ.
މުޒާހަރާގައި ކުޑަކުދިންގެ ބަގީޗާ އަށް ވަނީ ގެއްލުން ލިބިފަ އެވެ. އަދި މުޒާހަރާ ކުރަމުން ދިޔަ ވަގުތު ހެންވޭރު ވިލީ ފުލުސް އިމާރާތުގެ ބިއްލޫރިތައް ވަނީ ތަޅާލައިފަ އެވެ. އެތާ ތިބި ފުލުހުން ބުނިގޮތުގައި ބަޔަކު އެތަނަށް ހަމަލާ ދިނީ ފުލުހުން ވެސް ތިއްބަ އެވެ. އެ ތަނުގެ ކުރިމަތީގައި އޮތް ފުލުހުންގެ ވެހިކަލެއްގައި ދެ ޒުވާނަކު ހައްޔަރުކޮށްފައި ތިއްބާ ހަވީރުގެ ނޫސްވެރިންނަށް ފެނިފައިވެ އެވެ.
ޑީއާރުޕީގެ އަޑުގަދަ ކުރާ ސާމާނު ހުރި ޕިކަޕުތެރެއަށް ފުލުހުން ފެން ޖެހުމާ ގުޅިގެން އެ ސާމާނުތައް ވަނީ ހަލާކުވެފަ އެވެ.
މުޒާހަރާކުރަމުން ދިޔަ ވަގުތު މުލީއާގެ އާއި ސިފައިންގެ ހުންނަ ސަރަހައްދު އޮތީ ބަންދުކޮށްފަ އެވެ. އަދި އެ ސަރަހައްދުގައި ސިފައިން ފޯރިމަރަމުން ގެންދިޔަ އެވެ.
މުޒާހަރާ ރޫޅާލުމަށް ފަހު ފުލުހުން ވަނީ ސްޓެލްކޯ ކައިރިން މީހުން ފޮނުވާލައިފަ އެވެ. ނަމަވެސް 15: 2 ހާއިރު ވެސް އިދިކޮޅު މީހުން ކަލާފާނު ސްކޫލް ހިސާބުގައި ތިއްބެވެ.
ކުއްލި ހަބަރުގެ އަޕްޑޭޓްތައް:
15: 02 - ފުލުހުން މިހާރު ވަނީ ސްޓެލްކޯ ކައިރިން މީހުން ފޮނުވާލައިފަ އެވެ. ނަމަވެސް އިދިކޮޅު މީހުން ކަލާފާނު ސްކޫލް ހިސާބުގައި އަދިވެސް އެބަތިއްބެވެ.
09: 02 - މުޒާހަރާގައި ކުރަމުން ދިޔަ 12 މީހަކު އައިޖީއެމްއެޗަށް ގެންގޮސްފައި އެބަތިއްބެވެ.
00: 2 - ހެންވޭރު ވިލީ ފުލުސް އިމާރާތުގެ އިރުމަތީފަރާތާއި ދެކުނުފަރާތު ބިއްލޫރިތައް ވަނީ ތަޅާލައިފަ އެވެ. އެތާ ތިބި ފުލުހުން ބުނިގޮތުގައި ބަޔަކު އެތަނަށް ހަމަލާ ދިނީ ފުލުހުން ވެސް ތިއްބަ އެވެ. އެ ތަނުގެ ކުރިމަތީގައި އޮތް ފުލުހުންގެ ވެހިކަލެއްގައި ދެ ޒުވާނަކު ހައްޔަރުކޮށްފައި އެބަ ތިއްބެވެ.
(އަޕްޑޭޓް އަންނަނީ)
45: 01 - މުޒާހަރާގައި ހާނިއްކަވެގެން އައިޖީއެމްއެޗަށް އަދިވެސް މީހުން އެބަ ގެންދެ އެވެ.
43: 01 - މުޒާހަރާގައި ކުޑަކުދިންގެ ބަގީޗާ އަށް ވަނީ ގެއްލުން ލިބިފަ އެވެ. އަދި ހެންވޭރު ޕާކު ކައިރީ ހުންނަ ވިލީ ފުލުހަށް ގެއްލުން ދީފައިވާ ކަމުގެ ކަށަވަރު ނުވާ ރިޕޯޓެއް ވަނީ ލިބިފަ އެވެ.
40: 01 - ޑީއާރުޕީ މެމްބަރު އަލީ ވަހީދާއި އަހުމަދު މަހުލޫފާއި އިތުރު އެކްޓިވިސްޓަކު ވެސް އައިޖީއެމްއެޗަށް ގެންގޮސްފި އެވެ.
34: 01 - ފުލުހުންގެ ހަތަރު މީހަކާއި ޑީއާރުޕީގެ ތިން އެކްޓިވިސްޓަކު އައިޖީއެމްއެޗަށް ގެންގޮސްފި އެވެ. އެ މީހުންނަށް ވަނީ އެކިވަރުގެ ހާނިއްކަތައް ވެފަ އެވެ. ފެންނަ ފެނުމުގައި އެކަކުގެ ހާލު ގޯހެވެ.
28: 01 - ފުލުހުންގެ ލޮރީގައި މީހުން ހޮސްޕިޓަލަށް ގެންދިޔުމުގެ މަސައްކަތް އެބަ ކުރެ އެވެ. އޭގެ ތެރޭގައި ޑީއާރުޕީގެ މަޖިލިސް މެމްބަރު އަލީ އާރިފް ހިމެނިވަޑައިގަންނަވަ އެވެ.
21: 01 - ވިއްސަށް ވުރެ ގިނަ މީހުން ފުލުހުންގެ ބެލުމުގެ ދަށަށް ގެންގޮސްފި އެވެ. ބައެއް މީހުން ތިބީ ބިޑިއަޅުވައިފަ އެވެ. ފުލުހުން ވަނީ މުޒަހާރާ ކުރަމުން ދިޔަ މީހުން ކުޑަކުދިންގެ ބަގީޗާގެ މެދަކާ ހަމައަށް ޖައްސާފަ އެވެ. އެމްޑީޕީގެ ސަޕޯޓަރުން ސްޓެލްކޯގެ ހުޅަނގު ފަރާތު ކަންމަތީގައި އެބަތިއްބެވެ.
ސަރުކާރާ އިދިކޮޅު މީހުންގެ ތެރެއިން ބަޔަކު، ވެއްޓިފައި ކަހަލަ ގޮތަކަށް ބިންމަތީގައި އެބަތިއްބެވެ. އޭގެ ތެރޭގައި މަޖިލިސް މެމްބަރުން ހިމެނިވަޑައިގަންނަވަ އެވެ.
13: 01 - ކަރުނަ ގޭހާއި ފެން ޖަހައި މުޒާހަރާ ރޫޅާލައިފި އެވެ. އަދި އަޑުގަދަ ކުރާ ސާމާނު ހުރި ޕިކަޕުތެރެއަށް ފެން ޖެހުމާ ގުޅިގެން އެ ސާމާނުތައް ހަލާކުވެއްޖެ އެވެ.
08: 01 - ފުލުހަކަށް ހާނިއްކަ ވެއްޖެ އެވެ.
06: 01 - ބައެއް މީހުންނަށް ވަނީ ހާނިއްކަ ވެފަ އެވެ. އަދި ފުލުހުންގެ ވެހިކަލަށް ބަޔަކު އަރުވައިފި އެވެ.
04: 01 - ކަރުނަ ގޭސް ޖަހަން ވެސް ފަށައިފި އެވެ. މުޒާހަރާ ކުރާ މީހުން ފުލުހުންނާ ދިމާލަށް އެއްޗެތި އުކަމުން ވެސް އެބަ ގެންދެ އެވެ.
02: 01 - މުޒާހަރާ ރޫޅާލުމަށް ފުލުހުން ފެން ޖަހަން ފަށައިފި އެވެ.
30: 00 - މުޒާހަރާ ރޫޅާލުމަށް ފުލުހުން ތައްޔާރުވާން ފަށައިފި އެވެ.
16: 00 - ކަރަންޓުގެ އަގު ތިރިނުކުރަނީސް މުޒާހަރާ ނުހުއްޓާނެ ކަމަށް ބުނެ ސްޓެލްކޯ ދޮށުގައި އަދިވެސް މުޒާހަާ ކުރިއަށް އެބަގެންދެ އެވެ.
25: 23 - މުލީއާގެ އާއި ސިފައިންގެ ހުންނަ ސަރަހައްދު ވަނީ ބަންދުކޮށްފަ އެވެ. އަދި އެ ސަރަހައްދު ބެލެހެއްޓުމަށް ސިފައިން އެބަ ހަރަކާތްތެރިވެ އެވެ.
11: 23 - އެމްޑީޕީގެ ސަޕޯޓަރުން ކަމަށް ބެލެވޭ ބަޔަކު ވެސް އަމިނީމަގުގައި، ސްޓެލްކޯގެ ހުޅަނގުން މަޑުކޮށްގެން ތިބެ އަޑުއުފުލަމުން އެބަގެންދެ އެވެ.
07: 23 - ސްޓެލްކޯ ކުރިމަތީގައި ތިބެގެން މުޒާހަރާ ކުރިއަށް އެބަގެންދެ އެވެ. ފުލުހުން ވެސް އެ މީހުންނާ ބައިވެރިވެ ސަރުކާރު "ވައްޓާލަން" އެހީތެރިވުމަށް ޑީއާރުޕީގެ ޑެޕިއުޓީ ލީޑަރު އުމަރު ނަސީރު ގެންދަވަނީ ގޮވާލައްވަމުންނެވެ.
43: 22 - މުޒާހަރާގެ ބައިވެރިން ސްޓެލްކޯ ސަރަހައްދުން ދުރަށް ނުގޮސްފިނަމަ ގާނޫނީ ފިޔަވަޅު އަޅާނެ ކަމުގެ އިންޒާރު ފުލުހުން ވަނީ ދީފަ އެވެ. ޑީއާރުޕީން ބުނަމުން ދަނީ އެއީ ގާނޫނާ އެއްގޮތްވާ ގޮތުގެ މަތިން ކުރިއަށް ގެންދާ މުޒާހަރާއެއް ކަމަށާއި އެ މުޒާހަރާ ހުއްޓާނުލާނެ ކަމަށެވެ.
ގައުމީ ޕާޓީ ވެސް ބައިވެރިވާ މުޒާހަރާގައި ރަތް ކުލަ ލައިގެން ތިބެ ގޮވަމުން ދަނީ "ކަރަންޓު އަތް ނުފޯރާ ފަށަށް" ގޮސް "ރައްޔިތުން ރަތަށް" އަރައިފި ކަމަށާއި ވަގުތުން ކުރިން ހުރި އަގަށް ރުޖޫއަ ކުރަން ސަރުކާރަށް ގޮވާލާ ކަމަށެވެ. އަދި އެ މަނިކުފާނުގެ ސަރުކާރެއްގައި ކަރަންޓުގެ އަގު ބޮޑުނުކުރައްވާނެ ކަމަށް ވިދާޅުވެ ރައީސް މުހައްމަދު ނަޝީދު ކެމްޕެއިންގައި ވެވަޑައިގެންނެވި ވައުދާ ހިލާފުވެވަޑައިގެންފައިވާ ކަމަށާއި އެ މަނިކުފާނު އިސްތިއުފާ ދެއްވުމަށް ވެސް ދަނީ ގޮވަމުންނެވެ.
މުޒާހަރާގެ ބައިވެރިން ލޮނުޒިޔާރަތްކޮޅުން ނައްޓާލީ ސަރުކާރަށް ދޭ "ނޯޓިސް"އެއް ކަމަށް ބުނެ ތައްޔާރު ކޮށްފައިވާ ކަރުދާސްތަކެއް ރައީސް ނަޝީދުގެ ރަސްމީ ގެކޮޅު މުލީއާގޭ ފާރުގައި ހިއްޕާނެ ކަމުގެ އިންޒާރާ އެކުގަ އެވެ.
39: 22 - ޑީއާރުޕީގެ ނާއިބު ޒައީމުން އިސްކޮށް ތިއްބެވި މުޒާހަރާގެ ބައިވެރިން ސްޓެލްކޯއާ ހަމަކުރި އިރު ރަޔަޓް ފުލުހުން ތިބީ އެ ސަރަހައްދު ބަންދުކޮށްގެންނެވެ. މިހާރު އެ ތަނަށް އިތުރު ފުލުހުން ވަނީ އައިސްފަ އެވެ.
30: 22 - ކަރަންޓުގެ އަގުބޮޑުވުމާ ގުޅިގެން ޑީއާރުޕީން އިސްނަގައިގެން އިންތިޒާމް ކުރި މުޒާހަރާގައި ލޮނުޒިޔާރަތްކޮޅުގައި އެއްވުމެއް ބޭއްވުމަށްފަހު އަމީނީމަގުން ހިނގަން ފަށައިފި އެވެ.