ސިޔާސީ ޕާޓީ އުފެއްދުމުގެ މަސައްކަތް ކުރިއަށް ގެންދިއުމަށް އިތުރު ފަރާތަކަށް މިއަދު ހޯމް މިނިސްޓަރު ހުއްދަ ދެއްވައިފި އެވެ.
މޯލްޑިވްސް ލޭބަ ޕާޓީގެ ނަމުގައި ޕާޓީ އުފެއްދުމުގެ މަސައްކަތް ކުރިއަށް ގެންދިއުމަށްް ހުއްދަ ދެއްވައިފައި ވަނީ މ. ސްޓާލިން މުހައްމަދު ހަލީމް (ކެސްޓޯ) އަށް ކަމުގައި ހޯމް މިނިސްޓްރީގެ އޮފިޝަލަކު ދެންމެ ކަށަވަރުކޮށްދެއްވި އެވެ.
ސިޔާސީ ޕާޓީ އުފެއްދުމުގެ މަސައްކަތް ކުރިއަށް ގެންދިއުމަށް މޯލްޑިވްސް ލޭބަ ޕާޓީ އަށް ހުއްދަ ދެއްވުމުން، ސިޔާސީ ޕާޓީ އުފެއްދުމުގެ މަސައްކަތް ކުރިއަށް ގެންދިއުމަށް ހޯމް މިނިސްޓްރީން ހުއްދަ ދެއްވި ފަރާތްތަކުގެ އަދަދު ހަތަރަކަށް އެރީ އެވެ.
އެ ހުއްދަ އިއްޔެ ހުއްދަ ދެއްވައިފައިވާ ތިން ޕާޓީ އަކީ ދިވެހި ރައްޔިތުންގެ ޕާޓީ، ދިވެހި ރައްޔިތުންގެ ޑިމޮކްރެޓިކް ޕާޓީ، އަދި އިސްލާމިކް ޑިމޮކްރެޓިކް ޕާޓީ އެވެ. މީގެ ތެރެއިން ދިވެހި ރައްޔިތުންގެ ޕާޓީ އާއި ދިވެހި ރައްޔިތުންގެ ޑިމޮކްރެޓިކް ޕާޓީން ރޭ ވަނީ ބައްދަލުވުން ބާއްވައިފަ އެވެ.
ސިޔާސީ ޕާޓީ އުފެއްދުމާ ބެހޭ ގޮތުން ދެ ޕާޓީއެއްގެ ބައްދަލުވުން ރޭ ބާއްވައިފި
15: 09
އަހުމަދު ހަމްދޫން އަދި އަބްދުﷲ ޖަމީލް
ސިޔާސީ ޕާޓީ އުފެއްދުމާ ބެހޭ ގޮތުން ދެ ޕާޓީއެއްގެ ބައްދަލުވުން މާލޭގައި ރޭ ބާއްވައިފި އެވެ.
ރޭ ބައްދަލުވުން ބޭއްވި ދެ ޕާޓީ އަކީ ޕާޓީ އުފެއްދުމާ ބެހޭ މަސައްކަތްތައް ކުރުމުގެ ހުއްދަ ސަރުކާރުން އިއްޔެ ދެއްވި ތިން ޕާޓީގެ ތެރެއިން ދެ ޕާޓީ ކަމަށްވާ ދިވެހި ރައްޔިތުންގެ ޕާޓީ، ދިވެހި ރައްޔިތުންގެ ޑިމޮކްރެޓިކް ޕާޓީ އެވެ.
ދިވެހި ރައްޔިތުންގެ ޕާޓީގެ ބައްދަލުވުން އޮތީ ރޭ 9 ޖެހި އިރު ގިޔާސުއްދީން ސްކޫލްގަ އެވެ. ގުރުއާނުގެ ބަރަކާތުން ފެށި މި ބައްދަލުވުމުގައި އެންމެ ފުރަތަމަ ވާހަކަ ދެއްކެވީ ރައީސުލްޖުމްހޫރިއްޔާ އަލްއުސްތާޒު މައުމޫން އަބްދުލްގައްޔޫމެވެ. ނަމަވެސް ވާހަކަފުޅު ފެށުމުގެ ކުރިން އެ މަނިކުފާނު ވިދާޅުވީ އެ މަނިކުފާނު އެ ތަނަށް ވަޑައިގެން ހުންނެވީ އަމިއްލަފުޅު ހައިސިއްޔަތުން ކަމަށެވެ. ދިވެހި ރައްޔިތެއްގެ ހައިސިއްޔަތުން ކަމަށެވެ.
މައުމޫނުގެ ވާހަކައިގައި، ސިޔާސީ ޕާޓީއެއް އުފައްދަން ހިޔާލުކުރެއްވި ސަބަބުގެ މައްްޗަށް އަލިއަޅުވާލެއްވި އެވެ. އަދި ދިވެހި ރައްޔިތުންގެ ޕާޓީގެ އުސޫލްތަކާއި އަސާސްތަކުގެ މައްޗަށް ބައްލަވައިލެއްވި އެވެ. އަދި އެ މަނިކުފާނު އިސްކޮށް ހުންނަވައިގެން ސިޔާސީ ޕާޓީއެއް އުފައްދަން އުޅުއްވުމުން ބައެއް މީހުންގެ ހިތުގައި އުފެދިދާނެ ސުވާލުތަކަކަށް ޖަވާބު ދެއްވި އެވެ.
ދިވެހި ރައްޔިތުންގެ ޕާޓީގެ ބައްދަލުވުމަކަށް މއ. ކިނބިގަސްދޮށުގޭ މައުމޫން އަބްދުލްގައްޔޫމުގެ އެނައުންސްމަންޓެއް ޓީވީން ގޮވުމުން، ވިއްސާރައިގެ ތެރޭގައި ވެސް ގިޔާސުއްދީން ސްކޫލަށް ރޭ ވަރަށް ގިނަ ބަޔަކު ގޮސް ތިއްބެވެ. ސްކޫލުގެ މައި ހޯލާއި ގޯތިތެރެ އެއްކޮށްހެން ވަނީ ފުރިފަ އެވެ.
މައުމޫނަށް ފަހު ވެސް ފަސް ބޭފުޅަކު ރޭ ވާހަކަ ދެއްކެވި އެވެ. މި ގޮތުން ވާހަކަ ދެއްކެވީ ރައްޔިތުންގެ މަޖިލީހުގެ ރައީސުލްޖުމްހޫރިއްޔާގެ މެމްބަރު ފާތުމަތު ދިޔާނާ ސައީދާއި ރައްޔިތުންގެ ހާއްސަ މަޖިލީހުގެ ވ. އަތޮޅުގެ މެމްބަރު މޫސާ ނިޒާރާއި އައްޑު އަތޮޅުގެ ބޭފުޅެއް ކަމަށްވާ ފާތުމަތު ބަދޫރާގެ އިތުރުން މުހައްމަދު ހާނިމާއި ބ. ތުޅާދޫ އަމީން އިބްރާހިމްފުޅެވެ.
މޯލްޑިވިއަން ޑިމޮކްރެޓިކް ޕާޓީ (އެމްޑީޕީގެ) ފުުރަތަމަ އާންމު ބައްދަލުވުން އޮތީ ގ. ދުންފުނިގޭގެ މައި ހަރުގޭގަ އެވެ. މި ބައްދަލުވުމުގައި އެމްޑީޕީގެ މަގުސަދުތައް ފާސްކުރުމާއި އެ ޕާޓީގެ ގަވަނިން ކައުންސިލް އިންތިހާބުކުރުމާ މެދު މަޝްވަރާކުރި އެވެ. އެ ގޮތުން ޕާޓީގެ މަގުސަދުތައް ރޭގެ ބައްދަލުވުމުގައި ފާސްވީ މެމްބަރުން ހުށަހެޅި ބައެއް އިސްލާހުތަކާ އެކު އެވެ.
ބައްދަލުވުމުގައި ވާހަކަ ދައްކަވަމުން އެމްޑީޕީގެ ޗެއާޕާސަން މުހައްމަދު ނަޝީދު (އަންނި) ހުށަހެޅުއްވީ ޕާޓީ ރަޖިސްޓަރީ ކުރާތާ 60 ދުވަހުގެ ތެރޭގައި މިހާރު އޮތް ވަގުތީ ގަވަނިން ކައުންސިލް އިސްތިއުފާ ދޭންޖެހޭނެ ކަމަށެވެ. ނަމަވެސް ވަރަށް ގިނަ މެމްބަރުންގެ ތާއީދާ އެކު ފާސްވީ 90 ދުވަހުގެ ތެރޭގައި މިހާރު އޮތް ގަވަނިން ކައުންސިލް އިސްތިއުފާ ދިނުމަށް ފަހު ޕާޓީގެ މެމްބަރުންގެ މެދުގައި އިންތިހާބު ބާއްވައިގެން އެ ކައުންސިލަށް މެމްބަރުން ހޮވުމަށެވެ.
ރޭގެ ބައްދަލުވުމުގައި އެމްޑީޕީގެ މަގުސަދުތަކާ ބެހޭ ގޮތުން ފަސް ބޭފުޅަކު ވާހަކަ ދެއްކެވި އެވެ. ވާހަކަ ދެއްކެވި ބޭފުޅުންގެ ތެރޭގައި ހިމެނިވަޑައިގަންނަވަނީ ނަޝީދުގެ އިތުރުން އިބްރާހިމް ހުސެއިން ޒަކީ އާއި ރައްޔިތުންގެ މަޖިލީހުގެ މާލޭގެ މެމްބަރު އިބްރާހިމް އިސްމާއީލާއި ލ. އަތޮޅު މެމްބަރު ރީކޯ މޫސާ މަނިކާއި އައްޑުއަތޮޅު މެމްބަރު އިބްރާހިމް ޝަރީފެވެ.
ރޭ 00: 9 ޖެހިއިރު ބޭއްވި ބައްދަލުވުމަށް ވަަރަށް ގިނަ އަދަދެއްގެ މެމްބަރުން ހާޒިރުވި އެވެ. ބައްދަލުވުމަށް ދިޔަ މީހުން ގިނަވުމުގެ ސަބަބުން، ވެހެމުންދިޔަ ވާރޭގައި ވެސް ގިނަ ބަޔަކު ދުންފިނިގޭ މަގުމަތީގައި ވެސް ތިއްބެވެ.
އިސްލާމިކް ޑިމޮކްރެޓިކް ޕާޓީގެ އާންމު ބައްދަލުވުމެއް ރޭ ނުބާއްވަ އެވެ.