ޑީއާރުޕީގެ އެކި ކަންތައްތަކާ ގުޅޭ ގޮތުން އެ ޕާޓީގެ ލީޑަރު އަހުމަދު ތަސްމީން އަލީ އަށް ޒައީމް އަލްއުސްތާޒް މައުމޫން އަބްދުލް ގައްޔޫމް މިދިޔަ ބުދަ ދުވަހު ފޮނުއްވި ސިޓީފުޅަށް ޖަވާބު ދެއްވައި ތަސްމީން ސިޓީއެއް ފޮނުއްވި ނަމަވެސް ދެން ތަސްމީނަށް ސިޓީފުޅެއް ފޮނުއްވަން ބޭނުންފުޅު ނޫން ކަމަށް މައުމޫން މިއަދު ވިދާޅުވެއްޖެ އެވެ.
"ހަވީރަ" ށް ވާހަކަ ދައްކަވަމުން މައުމޫން ވިދާޅުވީ "ސިޓީގެ ހަނގުރާމައެއް" ޕާޓީ ތެރޭގައި ބާއްވަން އެއްވެސް ގޮތަކަށް ބޭނުންފުޅު ނޫން ކަމަށާއި ތަސްމީނަށް ސިޓީފުޅެއް ފޮނުއްވީ އަނބުރައި އޭގެ ޖަވާބު ދެއްވާނެ ކަމަށް ބައްލަވާފައި ނޫން ކަމަށެވެ.
"މިހާތަނަށް ލީޑަރު ކަންތައްތައް ކުރައްވާފައިވާ ގޮތުން ލީޑަރަށް އަޅުގަނޑު ދަންނަވާލަން ބޭނުންވާ ވާހަކަތައް ވެސް ހުރީ. ޕާޓީގެ ގިނަ ކަންކަން ލީޑަރު ކުރައްވާފައި އޮތީ ރަނގަޅަކަށް ނޫން. އެހެންވެ އެ ކަންތައްތައް ލީޑަރަށް ދަންނަވާލަން އަޅުގަނޑު ސިޓީއެއް ފޮނުވީ. އެއްގޮތަކަށް ވެސް އޭގެ ޖަވާބު ލީޑަރު ދެއްވާނެ ކަމަށް ބަލާފައި އަޅުގަނޑު ފޮނުވި ސިޓީއެއް ނޫން އެއީ،" ތަސްމީނަށް މައުމޫން ފޮނުއްވި 12 ސަފުހާގެ ސިޓީއަށް އިޝާރާތް ކުރައްވައި ވިދާޅުވި އެވެ.
މައުމޫން ވިދާޅުވީ އެމަނިކުފާނުގެ ސިޓީފުޅުގެ ޖަވާބުގައި ތަސްމީން ފޮނުއްވި ސިޓީގައި ހަގީގަތާ ހިލާފު ވާހަކަތަކެއް އެބަހުރި ކަމަށެވެ. އެކަމަކު މިވަގުތު އަދި އެކަމާ ގުޅޭ ގޮތުން ވަކި އެއްޗެއް ވިދާޅުވާން ބޭނުންފުޅު ނުވާ ކަމަށް މައުމޫން ވިދާޅުވި އެވެ.
"އަޅުގަނޑު އޭގެ ހަގީގަތްތައް އެކި ފަހަރު މަތިން މެމްބަރުންނަށް އަންގައި ދެމުން ދާނަން. ލީޑަރުގެ ސިޓީގައި އެބަހުރި ހަގީގަތާ ހިލާފަށް ދައްކަވާފައިވާ ވާހަކަތައް،" މައުމޫން ވިދާޅުވި އެވެ.
ތަސްމީނަށް ފޮނުއްވި ސިޓީފުޅުގައި، ފެނިވަޑައިގަންނަވާ ގޮތަކަށް ފިޔަވަޅު އަޅުއްވާނެ ކަމަށް މައުމޫން ވިދާޅުވެފައިވާތީ އެއީ ކޮން ފިޔަވަޅުތަކެއްތޯ ދެންނެވުމުން ވިދާޅުވީ އެކަން ވެސް ވަރަށް އަވަހަށް ހާމަކުރައްވާނެ ކަމަށެވެ. އަދި ޑީއާރުޕީގެ ބޭރުން އެހެން ސިޔާސީ ޕާޓީއެއް ހައްދަވަން ދެކެވޭ ވާހަކަތަކާ ގުޅިގެން ސުވާލު ދެންނެވުމުން މައުމޫން ވިދާޅުވީ "ފަހުން އޭގެ ތަފުސީލުތައް ހާމަކުރާނަން" ކަމަށެވެ.
ޑީއާރުޕީގެ އެތެރޭގެ ކޯޅުން ވަރަށް ބޮޑުވެ މައުމޫނާއި ތަސްމީންއާ ދެ ބޭފުޅުން ބަހުގެ ހޫނު ހަމަލަތަކެއް ބަދަލުކުރައްވާ މި ދަނޑިވަޅުގައި އިދިކޮޅު ބައެއް ސިޔާސީ ޕާޓީތަކުގެ ލީޑަރުންނާ އެކު މަޝްވަރާތައް ބާއްވާ ކަމަށް ދެކެވޭ ވާހަކަތަކާ ގުޅިގެން މައުމޫން ވިދާޅުވީ "އަޅުގަނޑުގެ ގޭގެ ދޮރު ހުންނާނީ އަބަދުވެސް އެންމެންނަށް ހުޅުވިފައި" ކަމަށެވެ.
"އަޅުގަނޑު ރައީސް ކަމުގައި ހުރިއިރު ވެސް އަދި މިހާރު ވެސް އެކި ފެންވަރުގެ މީހުންނާ ބައްދަލުކޮށް މަޝްވަރާ ކުރަން. އެކި ކަންކަމާ ގުޅޭ ގޮތުން ހިޔާލު ހޯދަން. އެއީ އާންމު ކަމެއް. އެ އުސޫލުން މިހާރު ވެސް ތިޔަ ވިދާޅުވި ފަދަ ބޭފުޅުންނާ [ޖުމްހޫރީ ޕާޓީގެ ލީޑަރު ގާސިމް އިބްރާހީމް] އަޅުގަނޑު މަޝްވަރާކުރަން އެކި ކަންކަމުގައި،" މައުމޫން ވިދާޅުވި އެވެ.