ސަރުކާރު ސިޔާސީ ގޮތުން ބަލިވީތޯ ކުރީގެ ރައީސް އަލްއުސްތާޛް މައުމޫން އަބްދުލްޤައްޔޫމް ސުވާލު ކުރައްވައިފިއެވެ.
ސަރުކާރުގެ ވެސް އަދި އެއްވެސް ބޭފުޅެއްގެ ނަން ވެސް ވިދާޅުނުވެ ސަރުކާރަށް ރައްދުވާ ގޮތައް ރައީސް މައުމޫން މިއަދު ކުރެއްވި ޓްވީޓެއްގައި ވިދާޅުވީ ގުޅިފައިވާ ޕާޓީތަކުން މިކުރަނީ ޤާނޫނީ އިމުގެ ތެރެއިން ކުރާ އިސްލާހީ މަސައްކަތެއް ކަމަށެވެ.
އިތުރަށް ރައީސް މައުމޫން ވިދާޅުވީ "ފުލުހުންނާއި ސިފައިން ކޯޓުތައް އެބޭނުން ކުރަނީ ސިޔާސީ ގޮތުން ދޭނެ ޖަވާބެއް ނެތީތޯ؟ ސިޔާސީ މައިދާނުގައި ބަލިވީތޯ؟" އެވެ.
ފުލުހުންނާއި ސިފައިން އަދި ކޯޓުތަކަށް ސަރުކާރުން ނުފޫޒު ފޯރުވާކަމަށް ރައީސް މައުމޫން މީގެ ކުރިން އެތައް ފަހަރަކު ވަނީ ވިދާޅުވެފައެވެ.
އެކަމާއި ގުޅިގެން އެމަނިކުފާނަށް ފާޑުކިޔުންތައް ވެސް ވަރަށް ބޮޑަށް އަމާޒުވެފައިވެއެވެ. އެއީ އެމަނިކުފާނުގެ 30 އަހަރުގެ ވެރިކަމުގައި ފުލުހުންނާއި ސިފައިންނަށް އަދި ކޯޓުތަކަށް ވަރަށް ފާޅުކަން ބޮޑުގޮތެއްގައި ނުފޫޒު ފޯރުވިކަމަށް އެތައް ބަޔަކު އިއްތިފާގު ވާތީއެވެ.