އިރާނުގެ ކޮންޓްރޯލް ނެގުމަށް އެމެރިކާގެ ސީއައިއޭއިން ކުރުދީ ބާރުތަކަށް ހަތިޔާރު ފޯރުކޮށްދިނުމަށް ނިންމާފައިވާ ކަމަށް ސީއެންއެންއިން ރިޕޯޓުކޮށްފި އެވެ.
ސީއެންއެންއިން ދާދި ދެންމެ އަކު ރިޕޯޓުކޮށްފައިވާ ގޮތުގައި އިރާނުގެ ކޮންޓްރޯލް ނެގުމަށްޓަކައި އާންމު ގަތުލުއާންމެއް ހިންގުމަށް ސީއައިއޭއިން ވަނީ ތައްޔާރުވެފައި އެވެ. އެގޮތުން ސީއައިއޭއިން މިކަން ކުރުމަށް ނިންމާފައިވަނީ ކުރުދީ ބާރުތަކާއި ގުޅިގެން ކަމަށާއި މިކަމުގެ މައުލޫމާތު އެނގޭ ގިނަ ބަޔަކު އެކަން ކަށަވަރުކޮށްދީފައިވާކަމަށް ސީއެންއެންއިން ވަނީ ރިޕޯޓުކޮށްފައެވެ.
ސީއެންއެންއިން އިތުރަށް ރިޕޯޓުކުރާ ގޮތުގައި ޓްރަމްޕުގެ ސަރުކާރުން މިހާރު އަންނަނީ އީރާނުގެ އިދިކޮޅު ޖަމާއަތްތަކާއި އިރާގުގައި ތިބި ކުރުދީ ލީޑަރުންނާ އެކު އިރާނުގެ ކޮންޓްރޯލް ހޯދުމަށް އަސްކަރީ އެހީތެރިކަން ފޯރުކޮށްދިނުމާ ގުޅޭ ގޮތުން ހަލުވި މަޝްވަރާތަކެއް ކުރަމުންނެވެ.
އިރާގު-އީރާން ބޯޑަރުގައި އީރާނުގެ ކުރުދީ ހަތިޔާރު އެޅި ޖަމާއަތްތަކުގެ އެތައްހާސް ސިފައިން ހަރަކާތްތެރިވެއެވެ. ހަނގުރާމަ ފެށުނު ފަހުން އެ ޖަމާއަތްތަކުގެ ތެރެއިން ގިނަ ޖަމާއަތްތަކުން ވަނީ އަވަސް ފިޔަވަޅުތަކެއް އަޅައި، އީރާނުގެ އަސްކަރީ ބާރުތައް ނައްތާލަށް ފާޅުގައި ގޮވާލައި ބަޔާންތައް އާންމުކޮށްފައެވެ.
އެމެރިކާއަށް މިފަދަ ތުހުމަތުތަކެއް ކުރެވިފައިވާއިރު އިއްޔެ އެމެރިކާގެ ރައީސް ޑޮނަލްޑް ޓްރަމްޕް ވަނީ ޑިމޮކްރެޓިކް ޕާޓީ އޮފް އީރާނިއަން ކުރުދީސްތާން (ކޭޑީޕީއައި) ގެ ރައީސް މުސްތަފާ ހިޖްރީއާ ފޯނުން ގުޅައި ވާހަކަ ދައްކަވާފައި ކަމަށް އީރާނުގެ ކުރުދީ އިސް އޮފިޝަލަކު ވަނީ ކަށަވަރުކޮށްދީފައި އެވެ.
ކޭޑީޕީއައި އަކީ އިރާނުގެ މަސްލަހަތު ނަގާލަން މަސައްކަތް ކުރާ ޕާޓީއެއް ކަމަށްބުނެ އައިއާރުޖީސީން އަންނަނީ ކޭޑީޕީއައިގެ ހަނގުރާމަވެރިންނަށްވެސް ހަމަލާތަކެއް ދެމުންނެވެ.
އީރާނުގެ ކުރުދީ އިދިކޮޅު ބާރުތަކުން ހުޅަނގު އީރާނުގައި ހިންގާ އެމެރިކާއާއި އިސްރާއީލުން ފަށަށް ތައްޔާރުވެފައިވާ ގްރައުންޑް އޮޕަރޭޝަނެއްގައި، ކުރިއަށް އޮތް ދުވަސްތަކުގައި ބައިވެރިވާނެ ކަމަށް ބެލެވޭ ކަމަށް އީރާނުގެ ކުރުދީންގެ އިސް އޮފިޝަލް ސީއެންއެން އަށް ވަނީ މައުލޫމާތުވެސް ދީފައި އެވެ.