ރައްޔިތުންނަށް ނަފުސާނީ ފަރުވާ ދިނުމަށް ގާއިމްކުރި "މެންޓަލް ހެލްތް ހޮޓްލައިން"އަށް އަހަރެއް ފުރެން ގާތްވެފައި ވާއިރު، އެ ހޮޓްލައިން މެދުވެރިކޮށް 3،004 މީހަކު މިހާތަނަށް ފަރުވާ ހޯދައިފިއެވެ. މިކަން ހާމަކޮށްފައި ވަނީ މިއަދު ހެލްތު މިނިސްޓްރީން ސޯޝަލް މީޑިއާގައި ކުރި ޕޯސްޓެއްގައެވެ. ނަފުސާނީ ބަލީގެ ފަރުވާ 24 ގަޑިއިރު ދިނުމަށް ތައާރަފުކުރި ހެލްޕް ލައިން އިފުތިތާހު ކޮށްފައި ވަނީ މިދިޔަ އަހަރުގެ ފެބުރުވަރީ މަހުގެ 21ވަނަ ދުވަހުގައެވެ. މި ނަންބަރަކީ، 1677 އެވެ. މި ހެލްޕްލައިން ބޭނުންކޮށްގެން ރާއްޖޭގެ، ކޮންމެ ހިސާބެއްގައި ހުރެގެން ވެސް ނަފުސާނީ ގޮތުން ބޭނުންވާ އެހީތެރިކަން ލިބޭނެކަމަށް އޭރު ހެލްތު މިނިސްޓްރީން ބުންޏެވެ. https://sun.mv/188952 ރާއްޖޭގައި ނަފުސާނީ އެހީތެރިކަމަށް ޚާއްސަކޮށްގެން މިފަދަ ހެލްޕް ލައިނެއް ފުރަތަމަ އުފައްދާފައި ވަނީ ކޮވިޑުގެ ހާލަތާ ގުޅިގެން މޯލްޑިވްސް ރެޑް ކްރެސެންޓުންނެވެ. ނަމަވެސް 24 ގަޑިއިރަށް ޚިދުމަތްދޭގޮތަށް ތާރަފުކުރެވުނު މި ހެލްޕްލައިނަކީ ރާއްޖޭގައި ނަފުސާނީ ބަލިމަޑުކަމަށް ކޮންމެ ވަގުތަކު ވެސް އެހީދެވޭ ގޮތަށް ތައާރަފުކުރި ފުރަތަމަ ހެލްޕްލައިނެވެ. ހެލްޕްލައިން ތައާރަފު ކުރުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓްރީގެ ޕާމަނަންޓް ސެކެޓްރީ، އާއިޝަތު ސާމިޔާ ވިދާޅުވީ، ރާއްޖޭގައި ވެސް ނަފުސާނީ ބަލި ތަހައްމަލުކުރަމުންދާ މީހުން ވަރަށް ގިނަ ކަމަށެވެ. އެގޮތުން އެންމެ ފަހުގެ ތަފާސްހިސާބުތަކުން ދައްކާގޮތުން ރާއްޖޭގައި ކޮންމެ ފަސް މީހަކުން އެކަކު ނަފުސާނީ ބަލި ތަހައްމަލު ކުރާ މީހެއް ކަމަށް އޭނާ ވިދާޅުވިއެވެ.